وفائے دوستاں کیسی جفائے دشمناں کیسی

وفائے دوستاں کیسی جفائے دشمناں کیسی

نہ پوچھا ہو کسی نے جس کو اس کی داستاں کیسی

کچھ ایسا احترام درد الفت ہے مرے دل کو

خموشی حکمراں ہے آہ و فریاد و فغاں کیسی

کسی کو فکر آزادی نہیں اس قید رنگیں سے

دل عالم پہ ہے چھائی ہوئی مہر بتاں کیسی

بھلا ہی دیتے ہیں اس کو جو گزرا بزم عالم سے

ہے سب کو اپنی اپنی فکر یاد رفتگاں کیسی

تمہارا مدعا ہی جب سمجھ میں کچھ نہیں آیا

تو پھر مجھ پر نظر ڈالی یہ تم نے مہرباں کیسی

ابھی ہوتے اگر دنیا میں داغؔ دہلوی زندہ

تو وہ سب کو بتا دیتے ہے وحشتؔ کی زباں کیسی

wafa-e-dostan kaisi jafa-e-dushmanan kaisi

na puchha ho kisi ne jis ko us ki dastan kaisi

kuchh aisa ehtiram-e-dard-e-ulfat hai mire dil ko

khamoshi hukmaran hai ah-o-fariyad-o-fughan kaisi

kisi ko fikr-e-azadi nahin is qaid-e-rangin se

dil-e-alam pe hai chhai hui mehr-e-butan kaisi

bhala hi dete hain us ko jo guzra bazm-e-alam se

hai sab ko apni apni fikr yad-e-raftagan kaisi

tumhara muddaa hi jab samajh mein kuchh nahin aya

to phir mujh par nazar dali ye tum ne mehrban kaisi

abhi hote agar duniya mein dagh duhulwi zinda

to wo sab ko bata dete hai wahshat ki zaban kaisi