وصل کی شب بھی ادائے رسم حرماں میں رہا

وصل کی شب بھی ادائے رسم حرماں میں رہا

صبح تک میں التماس شوق پنہاں میں رہا

مر گئے لاکھوں شہید ناز کچھ پروا نہیں

وہ تماشائے ہلال عید قرباں میں رہا

کام اپنا کر چکی بیماریٔ عشق بتاں

میں فریب نسخۂ و تاثیر درماں میں رہا

واہ رے پاس وفا اللہ ری شرم آرزو

ہر نفس ہم راہیٔ عمر گریزاں میں رہا

کیا پڑھے اشعار تسلیمؔ جگر افگار نے

شور تحسیں ہر طرف بزم سخنداں میں رہا

wasl ki shab bhi ada-e-rasm-e-hirman mein raha

subh tak main iltimas-e-shauq pinhan mein raha

mar gae lakhon shahid-e-naz kuchh parwa nahin

wo tamasha-e-hilal-e-eid qurban mein raha

kam apna kar chuki bimari-e-ishq-e-butan

main fareb-e-nuskha-e-o tasir darman mein raha

wah re pas-e-wafa allah ri sharm-e-arzu

har nafas ham rahi-e-umr-e-gurezan mein raha

kya parhe ashar taslim-e-jigar afgar ne

shor-e-tahsin har taraf bazm-e-sukhandan mein raha