وصل میں بگڑے بنے یار کے اکثر گیسو

وصل میں بگڑے بنے یار کے اکثر گیسو

الجھے سلجھے مری تقدیر سے شب بھر گیسو

میں نہ مانوں گا یہ ظلمت اسے کس دن ہو نصیب

ہو گئے ہوں گے شریک شب محشر گیسو

کہنے سننے سے اگر وصل ہوا بھی تو کیا

ضد سے بیٹھے وہ بنایا کیے شب بھر گیسو

چاہتے ہیں کہ پریشاں پس مردن بھی رہوں

کھول دیتے ہیں مری گور پر آ کر گیسو

اڑ چلا اور بھی وہ رشک پری زاداں سے

بن گئے حسن کے پرواز کو شہپر گیسو

آرزو ہے کہ شب قدر ہو یا شام امید

کچھ دکھائے نہ خدا تیرے دکھا کر گیسو

یہ بھی تقدیر کے ہیں پیچ وگرنہ تسلیمؔ

مجھ سا آزاد ہو پابند معنبر گیسو

wasl mein bigre bane yar ke aksar gesu

uljhe suljhe miri taqdir se shab bhar gesu

main na manunga ye zulmat use kis din ho nasib

ho gae honge sharik-e-shab-e-mahshar gesu

kahne sunne se agar wasl hua bhi to kiya

zid se baithe wo banaya kiye shab bhar gesu

chahte hain ke pareshan pas murdan bhi rahun

khol dete hain miri gor par a kar gesu

ur chala aur bhi wo rashk-e-pari zadan se

ban gae husn ke parwaz ko shahpar gesu

arzu hai ke shab-e-qadr ho ya sham-e-umid

kuchh dikhae na khuda tere dikha kar gesu

ye bhi taqdir ke hain pech wagarna taslim

mujh sa azad ho paband-e-muambar gesu