وطن آشوب

سبزہ و برگ و لالہ و سرو و سمن کو کیا ہوا

سارا چمن اداس ہے ہائے چمن کو کیا ہوا

اک سکوت ہر طرف ہوش ربا و ہولناک

خلد وطن کے پاسباں خلد وطن کو کیا ہوا

رقص طرب کدھر گیا نغمہ طراز کیا ہوئے

غمزہ و ناز کیا ہوئے عشوہ و فن کو کیا ہوا

جس کی نوائے دلستاں زخمۂ ساز شوق تھی

کوئی بتاؤ اس بت غنچہ دہن کو کیا ہوا

چشمک دم بدم نہیں مشق خرام و رم نہیں

میرے غزال کیا ہوئے میرے ختن کو کیا ہوا

چھائی ہے کیوں فسردگی عالم حسن و عشق پر

آج وہ نل کدھر گئے آج دمن کو کیا ہوا

آنکھوں میں خوف و یاس ہے چہرہ اداس اداس ہے

عصر رواں کی لیلیٰ برقعہ فگن کو کیا ہوا

آہ خرد کدھر گئی آہ جنوں نے کیا کیا

آہ شباب خوگر دار و رسن کو کیا ہوا

کوئی بتائے عظمت خاک وطن کہاں ہے اب

کوئی بتائے غیرت اہل وطن کو کیا ہوا

کوہ وہی دمن وہی دشت وہی چمن وہی

پھر یہ مجازؔ جذبۂ حب وطن کو کیا ہوا

sabza-o-barg-o-lala-o-sarw-o-saman ko kya hua

sara chaman udas hai hae chaman ko kya hua

ik sukut har taraf hosh ruba-o-haulnak

khuld watan ke pasban khuld-e-watan ko kya hua

raqs-e-tarab kidhar gaya naghma taraz kya hue

ghamza-o-naz kya hue ishwa-o-fan ko kya hua

jis ki nawa-e-dilsitan zakhma-e-saz-e-shauq thi

koi batao us but-e-ghuncha dahan ko kya hua

chashmak-e-dam badam nahin mashq-e-khiram-o-ram nahin

mere ghazal kya hue mere khutan ko kya hua

chhai hai kyun fasurdagi alam-e-husn-o-ishq par

aj wo nal kidhar gae aj daman ko kya hua

ankhon mein khauf-o-yas hai chehra udas udas hai

asr-e-rawan ki laila barqaaa fagan ko kya hua

ah khirad kidhar gai ah junun ne kya kiya

ah shabab-e-khugar-e-dar-o-rasan ko kya hua

koi batae azmat khak-e-watan kahan hai ab

koi batae ghairat-e-ahl-e-watan ko kya hua

koh wahi daman wahi dasht wahi chaman wahi

phir ye majaz jazba-e-hub-e-watan ko kya hua