وصل کی امید بڑھتے بڑھتے تھک کر رہ گئی
ثاقب لکھنویوصل کی امید بڑھتے بڑھتے تھک کر رہ گئی
صبح کاذب اور کیا کرتی چمک کر رہ گئی
دل شب غم کاٹ لایا دم ہوا لیکن ہوا
اک کلی تھی جو سحر ہوتے مہک کر رہ گئی
نا شناس روئے خوش حالی ہے طبع غم نصیب
جب مسرت سامنے آئی جھجک کر رہ گئی
مجھ کو جلنے دے ابھی اے موت کیوں دنیا کہے
آگ کیسی تھی جو سینے میں بھڑک کر رہ گئی
کوئی کیا دیکھے بہار روئے قاتل بعد ذبح
کیوں کھلے وہ آنکھ جو حسرت سے تک کر رہ گئی
میرے دل کے زخم اور ان کی شماتت دیکھیے
ہنس دیئے کشت تمنا جب لہک کر رہ گئی
کیا تمنا تھی یہ بیتابی جسے رکنا پڑا
تنگ تھا صحن قفس بلبل پھڑک کر رہ گئی
لوگ کہتے ہیں کھلا تھا رات بھر باب قبول
کس طرف میری دعا ثاقبؔ بھٹک کر رہ گئی
wasl ki ummid barhte barhte thak kar rah gai
subh-e-kazib aur kiya karti chamak kar rah gai
dil-e-shab gham kat laya dam hua lekin hua
ik kali thi jo sahar hote mahak kar rah gai
na shanas ru-e-khush hali hai tab-e-gham nasib
jab masarrat samne ai jhijak kar rah gai
mujh ko jalne de abhi ai maut kyun duniya kahe
ag kaisi thi jo sine mein bharak kar rah gai
koi kya dekhe bahar-e-ru-e-qatil baad zabh
kyun khule wo ankh jo hasrat se tak kar rah gai
mere dil ke zakhm aur un ki shumatat dekhiye
hans diye kisht-e-tamanna jab lahak kar rah gai
kya tamanna thi ye betabi jise rukna para
tang tha sehn-e-qafas bulbul pharak kar rah gai
log kahte hain khula tha rat bhar bab-e-qubul
kis taraf meri dua saqib bhatak kar rah gai