وصل میں وہ چھیڑنے کا حوصلہ جاتا رہا

وصل میں وہ چھیڑنے کا حوصلہ جاتا رہا

تم گلے سے کیا ملے سارا گلہ جاتا رہا

یار تک پہنچا دیا بیتابی دل نے ہمیں

اک تڑپ میں منزلوں کا فاصلہ جاتا رہا

ایک تو آنکھیں دکھائیں پھر یہ شوخی سے کہا

کہیے اب تو کم نگاہی کا گلہ جاتا رہا

روز جاتے تھے خط اپنے روز آتے تھے پیام

ایک مدت ہو گئی وہ سلسلہ جاتا رہا

رو رہے تھے دل کو ہم یاں ہوش بھی جاتے رہے

گمشدہ یوسف کے پیچھے قافلہ جاتا رہا

مڑ کے قاتل نے نہ دیکھا وار پورا ہو گیا

کشتگان نیم بسمل کا گلہ جاتا رہا

وادئ غربت کے ساتھی ہیں ہمیں دل سے عزیز

رو دئیے ہم پھوٹ کر جب آبلہ جاتا رہا

بے خودی میں محو نظارہ تھے ہم کیوں چونک اٹھے

ہائے وہ اپنا مزے کا مشغلہ جاتا رہا

کیا مہذب بن کے پیش یار بیٹھے ہیں جلیلؔ

آج وہ جوش جنوں وہ ولولہ جاتا رہا

wasl mein wo chherne ka hausla jata raha

tum gale se kya mile sara gila jata raha

yar tak pahuncha diya betabi-e-dil ne hamen

ik tarap mein manzilon ka fasla jata raha

ek to ankhen dikhaen phir ye shokhi se kaha

kahiye ab to kam nigahi ka gila jata raha

roz jate the khat apne roz ate the payam

ek muddat ho gai wo silsila jata raha

ro rahe the dil ko ham yan hosh bhi jate rahe

gumshuda yusuf ke pichhe qafila jata raha

mur ke qatil ne na dekha war pura ho gaya

kishtgan-e-nim bismil ka gila jata raha

wadi-e-ghurbat ke sathi hain hamen dil se aziz

ro diye ham phut kar jab abla jata raha

be khudi mein mahw-e-nazzara the ham kyun chaunk uthe

hae wo apna maze ka mashghala jata raha

kya mohazzab ban ke pesh-e-yar baithe hain jalil

aj wo josh-e-junun wo walwala jata raha