وفا کا بندہ ہوں الفت کا پاسدار ہوں میں

وفا کا بندہ ہوں الفت کا پاسدار ہوں میں

حریف قمری و پروانۂ ہزار ہوں میں

جدا جدا نظر آتی ہے جلوۂ تاثیر

قرار ہو گیا موسیٰ کو بے قرار ہوں میں

خمار جس سے نہ واقف ہو وہ سرور ہیں آپ

سرور جس سے نہ آگاہ ہو وہ خمار ہوں میں

سما گیا ہے یہ سودا عجیب سر میں مرے

کرم کا اہل ستم سے امیدوار ہوں میں

عوض دوا کے دعا دے گیا طبیب مجھے

کہا جو میں نے غم ہجر سے دو چار ہوں میں

شباب کر دیا میرا تباہ الفت نے

خزاں کے ہاتھ کی بوئی ہوئی بہار ہوں میں

قرار داد گریباں ہوئی یہ دامن سے

کہ پرزے پرزے اگر ہو تو تار تار ہوں میں

مرے مزار کو سمجھا نہ جائے ایک مزار

ہزار حسرت و ارماں کا خود مزار ہوں میں

ظہیرؔ و ارشدؔ و غالبؔ کا ہوں جگر گوشہ

جناب داغؔ کا تلمیذ و یادگار ہوں میں

امیر کرتے ہیں عزت مری ہوں وہ سائلؔ

گلوں کے پہلو میں رہتا ہوں ایسا خار ہوں میں

wafa ka banda hun ulfat ka pasdar hun main

harif-e-qamari-o-parwana-e-hazar hun main

juda juda nazar ati hai jalwa-e-tasir

qarar ho gaya musa ko be qarar hun main

khumar jis se na waqif ho wo surur hain ap

surur jis se na agah ho wo khumar hun main

sama gaya hai ye sauda ajib sar mein mire

karam ka ahl-e-sitam se umidwar hun main

ewaz dawa ke dua de gaya tabib mujhe

kaha jo main ne gham-e-hijr se do char hun main

shabab kar diya mera tabah ulfat ne

khizan ke hath ki boi hui bahar hun main

qarar dad gareban hui ye daman se

ke purze purze agar ho to tar tar hun main

mire mazar ko samjha na jae ek mazar

hazar hasrat-o-arman ka khud mazar hun main

zahir-o-arshad-o-ghalib ka hun jigar gosha

janab dagh ka talmiz-o-yadgar hun main

amir karte hain izzat miri hun wo sail

gulon ke pahlu mein rahta hun aisa khar hun main