نکلنے کو ہے دم میرا مگر ہے آرزو باقی — قمر ہلالی (Qamar Hilali)

Arooz is now on the App Store, for iPhone and iPad. Download →

نکلنے کو ہے دم میرا مگر ہے آرزو باقی

ملیں گے خاک میں لیکن رہے گی جستجو باقی

میں اپنا راز کہنے کو بلایا تھا تجھے ہمدم

مگر افسوس میں ہی رہ سکا اور ہے نہ تو باقی

یہ دنیا مٹنے والی ہے تو پھر اس پر بھروسہ کیا

فنا ہو جائیں گے سارے رہے گا تو ہی تو باقی

کراماً کاتبیں جا کر یہ عزرائیل سے کہنا

ٹھہر جاؤ ابھی کچھ یار سے ہے گفتگو باقی

وضو زاہد کا آب جو سے اور میرا ہے آنسو سے

وضو بہہ جائے گا اس کا رہے میرا وضو باقی

طہارت جسم کی گو ہو گئی ہے غسل ظاہر سے

صفائی کے لئے دل کی ابھی ہے شست و شو باقی

جلا کر آتش فرقت نے دل کی خاک اڑائی ہے

نہیں سینہ میں کچھ باقی مگر ہے ایک ہو باقی

ہلالی کر دیا تو نے قمرؔ کو ایک چلو میں

رہے محشر تلک ساقی ترا جام و سبو باقی