نور ایماں سرمۂ چشم دل و جاں کیجئے

نور ایماں سرمۂ چشم دل و جاں کیجئے

پردہ‌ دار حسن یکتا چشم حیراں کیجئے

مشکلات راہ کو ہمت سے آساں کیجئے

طے فنا کی منزلیں افتان‌‌ و خیزاں کیجئے

بے حجابانہ خود آرائی کے ساماں کیجئے

مظہر شان تجلی بزم امکاں کیجئے

ہیں من و تو جلوہ ہائے حسن وحدت کا حجاب

شمع بزم خود شناسی نور عرفاں کیجئے

جلوہ ہائے‌‌ طور کی تکرار یا تجدید ہو

لن ترانی سے مساوی کفر و ایماں کیجئے

شرک گر منظور ہے اور ہے انا الحق ناقبول

دار پر منصور کو کھچوائیے ہاں کیجئے

خود نمائی ناز ہے انداز خود آرائیاں

جلوۂ جاں سے منور قلب انساں کیجئے

کیف مستی میں کہ عرفان جنوں میں الغرض

وا ہر اک بند‌ نقاب روئے جاناں کیجئے

کر دیا رحمت نے نورانی مرا ظلمت کدہ

نوش جاں جام صفا سے آب حیواں کیجئے

رہروان جادۂ عشق و فنا منصور ہیں

آرزو ہائے دو عالم ان پہ قرباں کیجئے

ہم ہیں ہندی اور ہمارا ملک ہے ہندوستاں

ہند میں پیدا تصوف کے زباں داں کیجئے

مستیاں ساحرؔ کی ہیں جام مئے توحید سے

ہو سکے تو ایسے کافر کو مسلماں کیجئے

nur-e-iman surma-e-chashm-e-dil-o-jan kijiye

parda dar-e-husn-e-yakta chashm-e-hairan kijiye

mushkilat-e-rah ko himmat se asan kijiye

tai fana ki manzilen iftan-o-khezan kijiye

be hijabana khud arai ke saman kijiye

mazhar-e-shan-e-tajalli bazm-e-imkan kijiye

hain man-o-to jalwa ha-e-husn wahdat ka hijab

sham-e-bazm-e-khud shanasi nur-e-irfan kijiye

jalwa ha-e-tur ki takrar ya tajdid ho

lan tarani se musawi kufr-o-iman kijiye

shirk gar manzur hai aur hai ana alhaq naqubul

dar par mansur ko khichwaiye han kijiye

khud numai naz hai andaz-e-khud araiyan

jalwa-e-jan se munawwar qalb-e-insan kijiye

kaif-e-masti mein ke irfan-e-junun mein algharaz

wa har ik band-e-naqab-e-roe janan kijiye

kar diya rahmat ne nurani mira zulmat kada

nosh-e-jan jam-e-safa se ab-e-haiwan kijiye

rahrawan-e-jada-e-ishq-o-fana mansur hain

arzu ha-e-do alam un pe qurban kijiye

ham hain hindi aur hamara mulk hai hindostan

hind mein paida tasawwuf ke zaban dan kijiye

mastiyan sahir ki hain jam-e-mai-e-tauhid se

ho sake to aise kafir ko musalman kijiye