نوح کا طوفان اک آنسو سے برپا کیجئے

نوح کا طوفان اک آنسو سے برپا کیجئے

جی میں آتا ہے کہ اب قطرہ کو دریا کیجئے

بے خبر بن جائیے یا عہد پورا کیجئے

جس طرح سے آپ کا جی چاہے اچھا کیجئے

عیسی دوراں سہی لیکن کوئی شاہد بھی ہو

ہم ابھی تو جی اٹھیں گے آپ اشارا کیجئے

ہو چکا ہونا تھا جو کچھ جائیے بس جائیے

مرنے والے کو نہ اب للہ رسوا کیجئے

پھر ذرا جھلکی دکھا کر اک ذرا چھپ جائیے

دل کے ہر ذرے میں آباد ایک دنیا کیجئے

دل ہمارا ہے ہم اس کے ہیں ازل سے راز دار

آپ خود آ کر سر بازار رسوا کیجئے

کون کہتا ہے کہ ان قصوں کو پھر دہرائیے

دل کی آبادی مٹا کر ذکر صحرا کیجئے

رازداری عشق میں عالمؔ نہیں چھوٹی سی بات

دل ہی دل میں سوچتا رہتا ہوں اب کیا کیجئے

nuh ka tufan ik ansu se barpa kijiye

ji mein ata hai ke ab qatra ko dariya kijiye

be khabar ban jaiye ya ahd-e-pura kijiye

jis tarah se ap ka ji chahe achchha kijiye

isa-e-dauran sahi lekin koi shahid bhi ho

ham abhi to ji uthenge ap ishara kijiye

ho chuka hona tha jo kuchh jaiye bas jaiye

marne wale ko na ab lillah ruswa kijiye

phir zara jhalki dikha kar ik zara chhup jaiye

dil ke har zarre mein abad ek duniya kijiye

dil hamara hai ham us ke hain azal se raz dar

ap khud a kar sar-e-bazar ruswa kijiye

kaun kahta hai ke in qisson ko phir dohraiye

dil ki abadi mita kar zikr-e-sahra kijiye

razdari-e-ishq mein alam nahin chhoti si bat

dil hi dil mein sochta rahta hun ab kya kijiye