نکلے ہے چشمہ جو کوئی جوش زناں پانی کا

نکلے ہے چشمہ جو کوئی جوش زناں پانی کا

یاد وہ ہے وہ کسو چشم کی گریانی کا

لطف اگر یہ ہے بتاں صندل پیشانی کا

حسن کیا صبح کے پھر چہرۂ نورانی کا

کفر کچھ چاہیے اسلام کی رونق کے لیے

حسن زنار ہے تسبیح سلیمانی کا

درہمی حال کی ہے سارے مرے دیواں میں

سیر کر تو بھی یہ مجموعہ پریشانی کا

جان گھبراتی ہے اندوہ سے تن میں کیا کیا

تنگ احوال ہے اس یوسف زندانی کا

کھیل لڑکوں کا سمجھتے تھے محبت کے تئیں

ہے بڑا حیف ہمیں اپنی بھی نادانی کا

وہ بھی جانے کہ لہو رو کے لکھا ہے مکتوب

ہم نے سر نامہ کیا کاغذ افشانی کا

اس کا منہ دیکھ رہا ہوں سو وہی دیکھوں ہوں

نقش کا سا ہے سماں میری بھی حیرانی کا

بت پرستی کو تو اسلام نہیں کہتے ہیں

معتقد کون ہے میرؔ ایسی مسلمانی کا

nikle hai chashma jo koi josh-e-zanan pani ka

yad wo hai wo kisu chashm ki giriani ka

lutf agar ye hai butan sandal-e-peshani ka

husn kya subh ke phir chehra-e-nurani ka

kufr kuchh chahiye islam ki raunaq ke liye

husn zunnar hai tasbih-e-sulaimani ka

dirhami hal ki hai sare mire diwan mein

sair kar tu bhi ye majmua pareshani ka

jan ghabrati hai andoh se tan mein kya kiya

tang ahwal hai is yusuf-e-zindani ka

khel larkon ka samajhte the mohabbat ke tain

hai bara haif hamen apni bhi nadani ka

wo bhi jane ke lahu ro ke likha hai maktub

ham ne sar nama kiya kaghaz afshani ka

us ka munh dekh raha hun so wahi dekhun hun

naqsh ka sa hai saman meri bhi hairani ka

but parasti ko to islam nahin kahte hain

motaqid kaun hai mir aisi musalmani ka