نگاہ برق نہیں چہرہ آفتاب نہیں

نگاہ برق نہیں چہرہ آفتاب نہیں

وہ آدمی ہے مگر دیکھنے کی تاب نہیں

گنہ گنہ نہ رہا اتنی بادہ نوشی کی

اب ایک شغل ہے کچھ لذت شراب نہیں

ہمیں تو دور سے آنکھیں دکھائی جاتی ہیں

نقاب لپٹی ہے اس پر کوئی عتاب نہیں

پیے بغیر چڑھی رہتی ہے حسینوں کو

وہاں شباب ہے کیا کم اگر شراب نہیں

بہار دیتا ہے چھن چھن کے نور چہرے کا

سر نقاب ہے جو کچھ تہ نقاب نہیں

وہ اپنے عکس کو آواز دے کے کہتے ہیں

ترا جواب تو میں ہوں مرا جواب نہیں

اسے بھی آپ کے ہونٹوں کا پڑ گیا چسکا

ہزار چھوڑیئے چھٹنے کی اب شراب نہیں

بتوں سے پردہ اٹھانے کی بحث ہے بے کار

کھلی دلیل ہے کعبہ بھی بے نقاب نہیں

جلیلؔ ختم نہ ہو دور جام مینائی

کہ اس شراب سے بڑھ کر کوئی شراب نہیں

nigah barq nahin chehra aftab nahin

wo admi hai magar dekhne ki tab nahin

gunah gunah na raha itni bada noshi ki

ab ek shaghl hai kuchh lazzat-e-sharab nahin

hamen to dur se ankhen dikhai jati hain

naqab lipti hai us par koi itab nahin

piye baghair charhi rahti hai hasinon ko

wahan shabab hai kya kam agar sharab nahin

bahar deta hai chhin chhin ke nur chehre ka

sar-e-naqab hai jo kuchh tah-e-naqab nahin

wo apne aks ko awaz de ke kahte hain

tira jawab to main hun mira jawab nahin

use bhi ap ke honton ka par gaya chaska

hazar chhoriye chhutne ki ab sharab nahin

buton se parda uthane ki bahs hai be kar

khuli dalil hai kaaba bhi be naqab nahin

jalil khatm na ho daur-e-jam-e-minai

ke is sharab se barh kar koi sharab nahin