نپٹ یہ ماجرا یارو کڑا ہے — شاہ مبارک آبرو (Shah Mubarak Abru)

نپٹ یہ ماجرا یارو کڑا ہے

مسافر دشمنوں میں آ پڑا ہے

رقیب اپنے اوپر ہوتے ہیں مغرور

غلط جاناں ہے حق سب سیں بڑا ہے

جو وہ بولے سوئی وہ بولتا ہے

رقیب اب بھوت ہو کر سر چڑھا ہے

خدا حافظ ہے میرے دل کا یارو

پتھر سیں جا کے یہ شیشہ لڑا ہے

برنگ ماہیٔ بے آب نس دن

سجن نیں دل ہمارا تڑپھڑا ہے

رقیباں کی نہیں فوجاں کا وسواس

ادھر سیں عاشقاں کا بھی دھڑا ہے

کرے کیا آبروؔ کیوں کر ملن ہو

رقیباں کے صنم بس میں پڑا ہے