نمائش میں

وہ کچھ دوشیزگان ناز پرور

کھڑی ہیں اک بساطی کی دکاں پر

نظر کے سامنے ہے ایک محشر

اور اک محشر ہے میرے دل کے اندر

سنہرا کام رنگیں ساریوں پر

بساط آسماں پر ماہ و اختر

جمال و حسن کے پر رعب تیور

نمایاں چاند سی پیشانیوں پر

وہ رخساروں پہ ہلکی ہلکی سرخی

لبوں میں پر فشاں روح گل تر

سیہ زلفوں میں روح سنبلستاں

نظر سر چشمۂ تسنیم و کوثر

ادائے ناز غرق کیف صہبا

سیہ مژگاں شراب آلودہ نشتر

چمک تاروں کی چشم سرمگیں میں

جھلک چاندی کی جسم مرمریں میں

وہ خوشبو آ رہی ہے پیرہن سے

فضا ہے دور تک جس سے معطر

تبسم اور ہنسی کے نرم طوفاں

فضاؤں میں مسلسل بارش زر

نشاط رنگ و بو سے چور آنکھیں

شراب ناب سے لبریز ساغر

وہ محرابیں سی سینوں پر نمایاں

فضائے نور میں کیوپڈ کے شہ پر

نفس کے آمد و شد سے تلاطم

شب مہتاب میں جیسے سمندر

ستاروں کی نگاہیں جھک گئی ہیں

زمیں پھر خندہ زن ہے آسماں پر

کوئی آئینہ دار حسن فارس

کسی میں حسن یونانی کے جوہر

کسی میں عکس معصوم کلیسا

کسی میں پرتو اصنام آذر

یہ شیریں ہے وہ نوشابہ ہے شاید

نہیں یاں فرق فرہاد و سکندر

یہ اپنے حسن میں عذرائے وامق

وہ اپنے ناز میں سلمائے اخترؔ

یہ تابانی میں خورشید درخشاں

وہ رعنائی میں اس سے بھی فزوں تر

ہنسی اس کی طلوع صبح خنداں

نوا اس کی سرود کیف آور

یہ شعلہ آفریں وہ برق افگن

یہ آئینہ جبیں وہ ماہ پیکر

وہ جنبش سی ہوئی کچھ آنچلوں کو

وہ لہریں سی اٹھیں کچھ ساریوں پر

خرام ناز سے نغمے جگاتی

وہ چل دیں ایک جانب مسکرا کر

کسی کی حسرتیں پامال کرتی

کسی کی حسرتیں ہمراہ لے کر

کبھی آنکھیں دکانوں پر جمی ہیں

کبھی خود اپنی ہی برنائیوں پر

ادھر ہم نے اک آہ سرد کھینچی

ہنسی پھر آ گئی اپنے کئے پر

wo kuchh doshezgan-e-naz parwar

khari hain ik bisati ki dukan par

nazar ke samne hai ek mahshar

aur ik mahshar hai mere dil ke andar

sunahra kam rangin sariyon par

bisat-e-asman par mah-o-akhtar

jamal-o-husn ke par rob tewar

numayan chand si peshaniyon par

wo rukhsaron pe halki halki surkhi

labon mein par fishan ruh-e-gul-e-tar

siyah zulfon mein ruh-e-sumbulsitan

nazar sar chashma-e-tasnim-o-kausar

ada-e-naz gharq-e-kaif-e-sahba

siyah mizhgan sharab aluda nashtar

chamak taron ki chashm-e-surmagin mein

jhalak chandi ki jism-e-marmarin mein

wo khushbu a rahi hai pairahan se

faza hai dur tak jis se muattar

tabassum aur hansi ke narm tufan

fazaon mein musalsal barish-e-zar

nishat-e-rang-o-bu se chur ankhen

sharab-e-nab se labrez saghar

wo mehraben si sinon par numayan

faza-e-nur mein kiyupid ke shah par

nafas ke amad-o-shud se talatum

shab-e-mahtab mein jaise samundar

sitaron ki nigahen jhuk gai hain

zamin phir khanda zan hai asman par

koi aina dar-e-husn faris

kisi mein husn yunani ke jauhar

kisi mein aks maasum-e-kalisa

kisi mein partau asnam-e-azar

ye shirin hai wo naushaba hai shayad

nahin yan farq-e-farhad-o-sikandar

ye apne husn mein azra-e-wamiq

wo apne naz mein salma-e-akhtar

ye tabani mein khurshid-e-darakhshan

wo raanai mein us se bhi fuzun tar

hansi us ki tulu-e-subh-e-khandan

nawa us ki surud-e-kaif-e-awar

ye shola afrin wo barq afgan

ye aina jabin wo mah paikar

wo jumbish si hui kuchh anchalon ko

wo lahren si uthen kuchh sariyon par

khiram-e-naz se naghme jagati

wo chal den ek janib muskura kar

kisi ki hasraten pamal karti

kisi ki hasraten hamrah le kar

kabhi ankhen dukanon par jami hain

kabhi khud apni hi barnaiyon par

idhar ham ne ik ah-e-sard khinchi

hansi phir a gai apne kiye par