نمک خوان تکلم ہے، فصاحت میری

نمک خوان تکلم ہے، فصاحت میری

ناطقے بند ہیں سن سن کے بلاغت میری

رنگ اڑتے ہیں وہ رنگیں ہے عبارت میری

شور جس کا ہے وہ دریا ہے طبیعت میری

عمر گزری ہے اسی دشت کی سیاحی میں

پانچویں پشت ہے شبیرؔ کی مداحی میں

ایک قطرے کو جو دوں بسط تو قلزم کردوں

بحر مواج فصاحت کا تلاطم کر دوں

ماہ کو مہر کروں ذروں کو انجم کردوں

گنگ کو، ماہر انداز تکلم کر دوں

درد سر ہوتا ہے بے رنگ نہ فریاد کریں

بلبلیں مجھ سے گلستاں کا سبق یاد کریں

اس ثنا خواں کے بزرگوں میں ہیں کیا کیا مداح

جدّ اعلیٰ سے نہ ہوگا کوئی اعلیٰ مداح

باپ مداح کا مداح ہے دادا مداح

عم ذی قدر ثنا خوانوں میں یکتا مداح

جو عنایات الٰہی سے ہوا نیک ہوا

نام بڑھتا گیا جب ایک کے بعد ایک ہوا

طبع ہر ایک کی موزوں قد زیبا موزوں

صورت سرو ازل سے ہیں سراپا موزوں

نثربے سجع نہیں، نظم معلیٰ موزوں

کہیں سکتہ نہیں آ سکتا، کجا ناموزوں

تول لے عقل کی میزاں میں جو فہمیدہ ہے

بات جو منہ سے نکلتی ہے وہ سنجیدہ ہے

خلق میں مثل خلیق اور تھا خوش گو کوئی کب

نام لے دھو لے زباں کوثر و تسنیم سے جب

بلبل گلشن زہرا و علی عاشق رب

متبع مرثیہ گوئی میں ہوئے جس کے سبب

ہو اگر ذہن میں جودت ہے کہ موزونی ہے

اس احاطے سے جو باہر ہے وہ بیرونی ہے

بھائی خوش فکرت و خوش لہجہ و پاکیزہ خصال

جن کا سینہ گہر علم سے ہے مالا مال

یہ فصاحت، یہ بلاغت، یہ سلاست یہ کمال

معجزہ گر نہ اسے کہیے تو ہے سحر حلال

اپنے موقع پہ جسے دیکھیے لاثانی ہے

لطف حضرت کا یہ ہے رحمت یزدانی ہے

کیوں نہ ہو بندۂ موروثیٔ مولا ہوں میں

قلزم رحمت معبود کا قطرہ ہوں میں

جس میں لاکھوں در و مرجاں ہیں وہ دریا ہوں میں

مدح خوانِ پسرِ حضرتِ زہرا ہوں میں

وصف جوہر کا کروں یا صفت ذات کروں

اپنے رتبے پہ نہ کیوں آپ مباہات کروں

مبتدی ہوں مجھے توقیر عطا کر یارب

شوقِ مداحیِٔ شپیر عطا کر یارب

سنگ ہو موم وہ تقریر عطا کر یارب

نظم میں رونے کی تاثیر عطاکر یا رب

جد و آبا کے سوا اور کوئی تقلید نہ ہو

لفظ مغلق نہ ہوں گنجلک نہ ہوں تعقید نہ وہ

وہ مرقع ہو کہ دیکھیں اسے گر اہل شعور

ہر ورق میں کہیں سایہ نظر آئے کہیں نور

غل ہو یہ ہے کششِ مو قلم طرۂ حور

صاف ہر رنگ سے ہو صنعت صانع کا ظہور

کوئی ناظر جو یہ نایاب نظیریں سمجھے

نقشِ ارژنگ کو کاواک لکیریں سمجھے

قلمِ فکر سے کھینچوں جو کسی بزم کا رنگ

شمعِ تصویر پہ گرنے لگیں آ آ کے پتنگ

صاف حیرت زدہ مانیؔ ہو تو بہزادؔ ہو دنگ

خوں برستا نظر آئے جو دکھاؤں صفِ جنگ

رزم ایسی ہو کہ دل سب کے پھڑک جائیں ابھی

بجلیاں تیغوں کی آنکھوں میں چمک جائیں ابھی

روزمرہ شرفا کا ہو سلامت ہو وہی

لب و لہجہ وہی سارا ہو متانت ہو وہی

سامعیں جلد سمجھ لیں جسے، صنعت ہو وہی

یعنی موقع ہو جہاں جس کا عبارت ہو وہی

لفظ بھی چست ہوں مضمون بھی عالی ہووے

مرثیہ درد کی باتوں سے نہ خالی ہووے

ہے کجی عیب مگر حسن ہے ابرو کے لیے

تیرگی بد ہے مگر نیک ہے گیسو کے لیے

سرمہ زیبا ہے فقط نرگسِ جادو کے لیے

زیب ہے خالِ سیۂ چہرۂ گلرو کے لیے

داند آنکس کہ فصاحت بہ کلامے دارد

ہر سخن موقع و ہر نکتہ مقامے دارد

بزم کا رنگ جدا، رزم کا میداں ہے جدا

یہ چمن اور ہے زخموں کا گلستاں ہے جدا

فہم کامل ہو، تو ہر نامے کا عنواں ہے جدا

مختصر پڑھ کے رلا دینے کا ساماں ہے جدا

دبدبہ بھی ہو، مصائب بھی ہوں، توصیف بھی ہو

دل بھی محفوظ ہوں، رقت بھی ہو تعریف بھی ہو

ماجرا صبحِ شہادت کا بیان کرتا ہوں

رنج و اندوہ و مصیبت کا بیاں کرتا ہوں

تشنہ کاموں کی عبادت کا بیاں کرتا ہوں

جاں نثاروں کی اطاعت کا بیاں کرتا ہوں

جن کا ہمتا نہیں، ایک ایک مصاحب ایسا

ایسے بندے نہ کبھی ہوں گے ، نہ صاحب ایسا

صبح صادق کا ہوا چرخ پہ جس وقت ظہور

زمزمے کرنے لگے یادِ الٰہی میں طیور

مثلِ خورشید برآمد ہوئے خیمے سے حضور

یک بیک پھیل گیا چار طرف دشت میں نور

شش جہت میں رخِ مولا سے ظہور حق تھا

صبح کا ذکر ہے کیا، چاند کا چہرہ فق تھا

ٹھنڈی ٹھنڈی وہ ہوائیں وہ بیاباں وہ سحر

دم بدم جھومتے تھے وجد کے عالم میں شجر

اوس نے فرشِ زمرد پہ بچھائے تھے گہر

لوٹی جاتی تھی لہکتے ہوئے سبزے پہ نظر

دشت سے جھوم کے جب بادِ صبا آتی تھی

صاف غنچوں کے چٹکنے کی صدا آتی تھی

بلبلوں کی وہ صدائیں، وہ گلوں کی خوشبو

دل کو الجھاتے تھے، سنبل کے وہ پر خم گیسو

قمریاں کہتی تھیں شمشاد پہ یاہو یاہو

فاختہ کی یہ صدا سرو پہ تھی ، کو کو کو

وقت تسبیح کا تھا عشق کا دم بھرتے تھے

اپنے معبود کی سب، حمد و ثنا کرتے تھے

آئے سجادۂ طاعت پہ امامِ دو جہاں

اس طرف طبل بجا یاں ہوئی لشکر میں اذاں

وہ مصلی کہ زباں جن کی حدیث و قرآں

وہ نمازی کہ جو ایماں کے تنِ پاک کی جاں

زاہد ایسے تھے کہ ممتاز تھے، ابراروں میں

عابد ایسے تھے کہ سجدے کیے تلواروں میں

عرشِ اعظم کو ہلاتی تھیں دعائیں ان کی

وجد کرتے تھے ملک، سن کے صدائیں ان کی

وہ عمامے، وہ قبائیں، وہ عبائیں ان کی

حوریں لیتی تھیں بصد شوق بلائیں ان کی

ذکرِ خالق میں لب ان کے جو ہلے جاتے تھے

غنچے فردوس کے شادی سے کھلے جاتے تھے

کیا جوانانِ خوش اطوار تھے، سبحان اللہ

کیا رفیقانِ وفادار تھے، سبحان اللہ

صفدر و غازی و جرار تھے، سبحان اللہ

زاہد و عابد و ابرار تھے، سبحان اللہ

زن و فرزند سے فرقت ہوئی، مسکن چھوڑا

مگر احمد کے نواسے کا نہ دامن چھوڑا

اللہ اللہ عجب فوج عجب غازی تھے

عجب اسوار تھے بے مثل، عجب تازی تھے

لائقِ مدح و سزاوارِ سر افرازی تھے

گو بہت کم تھے، پہ آمادۂِ جاں بازی تھے

پیاس ایسی تھی کہ آ آ گئی جاں ہونٹوں پر

صابر ایسے تھے کہ پھیری نہ زباں ہونٹوں پر

زہد میں حضرت سلماںؔ کے برابر کوئی

دولتِ فقر و قناعت میں ابوذرؔ کوئی

صدقِ گفتار میں عمارؔ کا ہمسر کوئی

حمزۂؔ عصر کوئی مالکِ اشترؔ کوئی

ہوں گے ایسے ہی محمدؔ کے جو شیدا ہوں گے

پھر جہاد ایسا نہ ہوگا، نہ وہ پیدا ہوں گے

گو مصیبت میں تلاطم میں، تباہی میں رہے

سرکٹے پاؤں مگر راہِ الٰہی میں رہے

یوں سرافراز، وہ سب لشکرِ شاہی میں رہے

جس طرح تیغِ دو دم دستِ سپاہی میں رہے

اس مصیبت میں نہ پایا کبھی شاکی ان کو

آبرو ساقیِٔ کوثر نے عطا کی ان کو

وہ تخشع، وہ تضرع، وہ قیام اور وہ قعود

وہ تذلل وہ دعائیں وہ رکوع اور وہ سجود

یادِ حق دل میں، تو سوکھے ہوئے ہونٹوں پہ درود

یہ دعا خالقِ اکبر سے کہ اے ربِ ودود

یوں لٹیں ہم کہ، نہ آل اور نہ اولاد رہے

مگر احمدؔ کے نواسے کا گھر آباد رہے

موم فولاد ہو آوازوں میں وہ سوز و گداز

اپنے معبود سے سجدوں میں عجب راز و نیاز

سر تو سجادوں پہ تھے عرش معلی پہ نماز

شیر دل منتخبِ دہر وحید و ممتاز

چاند شرمندہ ہو، چہرے متجلی ایسے

نہ امام ایسا ہوا پھر نہ مصلی ایسے

جب فریضے کو ادا کر چکے وہ خوش کردار

کس کے کمروں کو بصد شوق لگائے ہتھیار

جلوہ فرما ہوئے گھوڑے پہ شۂ عرش وقار

علمِ فوج کو عباس نے کھولا اک بار

دشت میں نکہتِ فردوس بریں آنے لگی

عرش تک اس کے پھریرے کی ہوا جانے لگی

لہر وہ سبز پھریرے کی، وہ پنجے کی چمک

شرم سے ابر میں چھپ جاتا تھا خورشید فلک

کہتے تھے صلِ علیٰ چرخ پہ اٹھ اٹھ کے ملک

دنگ تھے سب وہ سماں سے تھا سماں تا بہ فلک

کہیے پستی اسے جو اوج ہما نے دیکھا

وہ سماں پھر نہ کبھی ارض و سما نے دیکھا

اس طرح جب علمِ دلبرِ زہرا جائے

کس سے پھر معرکۂ رزم میں ٹھہرا جائے

سانپ دشمن کی نہ کیوں چھاتی پہ لہرا جائے

لہر میں تا بہ فلک جس کا پھریرا جائے

رفع شر کو، علم خیر بشر آیا تھا

سورۂ نصر پئے فتح و ظفر آیا تھا

وہ علم دار کہ جو شیرِ الٰہی کا خلف

گوہر بحرِ وفا، نیرِ دیں درِ نجف

فخرحمزہؔ سے نمودار کا جعفرؔ کا شرف

کس طرح چاند کہوں، چاند میں ہے عیب کلف

کس نے پایا وہ جو تھا جاہ و حشم ان کے لیے

یہ علم کے لیے تھے اور علم ان کے لیے

سرو شرمائے، قد اس طرح کا، قامت ایسی

اسد اللہ کی تصویر تھے، صورت ایسی

شیر نعروں سے دہل جاتے تھے ، صولت ایسی

جا کے پانی نہ پیا نہر پہ ہمت ایسی

جان جب تک تھی اطاعت میں رہے بھائی کی

تھے علم دار، مگر بچوں کی سقائی کی

وہ بہشتی نے کیا، جس کو وفا کہتے ہیں

ہم انہیں عاشقِ شاہِ شہدا کہتے ہیں

ان کو قبلہ تو انہیں قبلہ نما کہتے ہیں

جو بہادر ہیں، وہ شمشیرِ خدا کہتے ہیں

عشقِ سردار و علمدار کا افسانہ ہے

وہ چراغِ رہِ دیں ہے تو یہ پروانہ ہے

اک طرف اکبرِ مہرو سا جوانِ نایاب

کچھ جو بچپن تھا تو کچھ آمدِ ایام شباب

روشنی چہرے پہ ایسی کہ خجل ہو مہتاب

آنکھیں ایسی کہ رہا، نرگسِ شہلا کو حجاب

جس نے ان گیسوؤں میں رخ کی ضیا کو دیکھا

شبِ معراج میں، محبوبِ خدا کو دیکھا

ؔاے خوشا حسنِ رخِ یوسفِ کنعانِ حسن

ؔراحتِ روحِ حسین، ابن علی، جانِ حسن

ؔجسم میں زورِ علی، طبع میں احسانِ حسن

ؔہمہ تن خلقِ حسن، حسنِ حسن، شانِ حسن

تن پہ کرتی تھی نزاکت سے گرانی پوشاک

کیا بھلی لگتی تھی بچپن میں سہانی پوشاک

اللہ اللہ اسدِ حق کے نواسوں کا جلال

چاند سے چہروں پہ بل کھائے ہوئے زلفوں کے بال

نیمچے کاندھوں پہ رکھے ہوئے، مانندِ ہلال

گرچہ بچپن تھا، پہ رستم کو سمجھتے تھے وہ زال

صف سے گھوڑوں کو بڑھا کر جو پلٹ جاتے تھے

مورچے لشکرِ کفار کے ہٹ جاتے تھے

آستینوں کو چڑھائے ہوئے آمادۂ جنگ

وہی سارا اسد اللہ کا نقشہ، وہی ڈھنگ

سرخ چہرے تھے کہ شیروں کا یہی ہوتا ہے رنگ

ولولہ صف کے الٹنے کا، لڑائی کی امنگ

جسم پر تیر چلیں، نیزۂ خونخوار چلے

شوق اس کا تھا کہ جلدی کہیں تلوار چلے

یک بیک طبل بجا فوج میں گرجے بادل

کوہ تھراے، زمیں ہل گئی گونجا جنگل

پھول ڈھالوں کے چمکنے لگے تلواروں کے پھل

مرنے والوں کو نظر آنے لگی شکلِ اجل

واں کے چاؤش بڑھانے لگے دل لشکر کا

فوجِ اسلام میں نعرہ ہوا یا حیدر کا

شور میدانیوں میں تھا، کہ دلیرو نکلو!

نیزہ بازی کرو، رہواروں کو پھیرو نکلو!

نہر قابو میں ہے، اب پیاسوں کو گھیرو نکلو!

غازیو! صف سے بڑھو غول سے شیرو نکلو!

رستمو! دادِ وغا دو، کہ یہ دن داد کا ہے

سامنا حیدر کرار کی اولاد کا ہے

شور سادات میں تھا، یا شۂ مرداں مددے

کعبۂ دیں مددے، قبلۂ ایماں مددے

قوتِ بازوئے پیغمبرِ ذی شاں مددے

دم تائید ہے، اے فخرِ سلیماں مددے

تیسرا فاقہ ہے، طاقت میں کمی ہے مولا!

طلب قوتِ ثابت قدمی ہے مولا!

پیاس میں حرف نہ شکوے کا زباں پر لائیں

دم بدم سینوں پہ فاقوں میں سنانیں کھائیں

دل نہ تڑپے، جو دمِ نزع نہ پانی پائیں

تیرے فرزند کی تائید کریں، مرجائیں

لاشے مقتل میں ہوں لاشِ شہ دلگیر کے پاس

سر ہوں نیزے پہ سرِ حضرتِ شبیر کے پاس

سامنے بڑھ کے یکایک صفِ کفار آئی

جھوم کر تیرہ گھٹا، تاروں پہ اک بار آئی

روزِ روشن کے چھپانے کو شبِ تار آئی

تشنہ کاموں کی طرف، تیروں کی بوچھار آئی

ہنس کے منہ بھائی کا شاہِ شہدا نے دیکھا

اپنے آقا کو بہ حسرت رفقا نے دیکھا

عرض عباسؔ نے کی جوش ہے جراروں کو

تیر سب کھاتے ہیں، تولے ہوئے تلواروں کو

میہمانوں کا نہیں پاس، ستمگاروں کو

مصلحت ہو تو رضا دیجیے، غمخواروں کو

رو سیاہوں کو مٹا دیں کہ بڑھے آتے ہیں

ہم جو خاموش ہیں وہ منہ پہ چڑھے آتے ہیں

یہی ہنگامہ رہا صبح سے، تا وقتِ زوال

لاش پر لاش گری، بھر گیا میدانِ قتال

سرخرو خلق سے اٹھے، اسد اللہ کے لال

مورچے سب تہہ و بالا تھے، پرے سب پامال

کھیت ایسے بھی کسی جنگ میں کم پڑتے ہیں

جو لڑا سب یہی سمجھے کہ علی لڑتے ہیں

قاسم و اکبر و عباس کا اللہ رے جہاد

غل ہر اک ضرب پہ تھا اب ، ہوئی دنیا برباد

الاماں کا تھا کہیں شور کہیں تھی فریاد

دے گئے خلق میں مردانگیٔ حرب کی داد

گو وہ دنیا میں نہیں، عرش مقام ان کا ہے

آج تک عالمِ ایجاد میں نام ان کا ہے

دوپہر میں وہ چمن بادِ خزاں نے لوٹا

پتا پتا ہوا تاراج تو بوٹا بوٹا

باپ بیٹے سے چھٹا، بھائی سے بھائی چھوٹا

ابنِ زہراؔ کی کمر جھک گئی بازو ٹوٹا

پھر سے نہ یاور، نہ وہ جاں باز نہ وہ شیدا تھے

ظہر کے وقت حسینؔ ابنِ علی تنہا تھے

ساتھ جو جو کہ بہادر تھے، وطن سے آئے

سامنے سوتے تھے ریتی پہ سنائیں کھائے

دھوپ میں پیاس سے مثلِ گلِ تر مرجھائے

مرگئے پر نہ غریبوں نے کفن تک پائے

دھوپ پڑتی تھی یہ دن چرخ نے دکھلایا تھا

نہ تو چادرتھی کسی لاش پہ نے سایا تھا

صاحبِ فوج پہ طاری تھا عجب رنج و ملال

زرد تھا رنگ، تو آنکھیں تھیں لہو رونے سے لال

کبھی بھائی کا الم تھا، کبھی بیٹے کا خیال

کبھی دھڑکا تھا کہ لاشیں نہ کہیں ہوں پامال

کبھی بڑھتے تھے وغا کو، کبھی رک جاتے تھے

سیدھے ہوتے تھے کبھی، اور کبھی جھک جاتے تھے

بڑھ کے چلاتے تھے بے درد کہ اب آپ آئیں

جوہر تیغِ شہنشاہِ نجف دکھلائیں

مرنے والے نہیں جیتے جو سنائیں کھائیں

کاٹ لیں آپ کا سر تن سے تو فرصت پائیں

پسرِ سعد سے وعدہ ہے، صلا لینے کا

حکم ہے خیمۂ اقدس کے جلا دینے کا

شہ نے فرمایا، مجھے خود ہے شہادت منظور

نہ لڑائی کی ہوس ہے، نہ شجاعت کا غرور

جنگ منظور نہ تھی ان سے پہ اب ہوں مجبور

خیر، لڑ لو کہ ستاتے ہیں یہ بے جرم و قصور

ذبح کرنے کے لیے لشکرِ ناری آئے

کہیں جلدی مرے سر دینے کی باری آئے

حکم پانا تھا کہ شیروں نے اڑائے تازی

مثل شہباز گیا ایک کے بعد اک غازی

واہ ری حرب، خوشا ضرب، زہے جانبازی

اڑ گیا ہاتھ بڑھا جو پئے دست اندازی

لوٹتے رن میں سر و جسم نظر آتے تھے

ایک حملے میں قدم فوج کے جم جاتے تھے

جس پہ غصہ میں گئے صید پہ شہباز گرا

یہ کماں کٹ کے گری، وہ قدر انداز گرا

جب گرا خاک پہ گھوڑے سے، تو ممتاز گرا

نہ اٹھا پھر کبھی، جو تفرقہ پرداز گرا

ہاتھ منہ کٹ گئے، سر اڑ گئے جی چھوٹ گئے

مورچے ہو گئے پامال، پرے ٹوٹ گئے

بعد غیروں کے عزیزوں نے کیا عزمِ نبرد

سر کو نہیوڑا کے بھرا سبطِ نبیؐ نے دم سرد

ہوک اٹھی کبھی سینے میں، تو دل میں کبھی درد

سرخ ہوتا تھا کبھی چاند سا چہرہ کبھی زرد

کوئی گل رو تو کوئی سرو سہی بالا تھا

وہ بچھڑنے لگے، گودی میں جنہیں پالا تھا

زلفوں والا تھا کوئی، کوئی مرادوں والا

کوئی بھائی کا پسر، کوئی بہن کا پالا

چاند سا منہ جو کسی کا تھا تو گیسو ہالا

کوئی قامت میں بہت کم کوئی قد میں بالا

نوجواں کون سا خوش رو و خوش انداز نہ تھا

کتنے ایسے تھے کہ سبزہ ابھی آغاز نہ تھا

ہاتھ وہ بچوں کا، اور چھوٹی سی وہ تلواریں

موم کردیتی تھیں فولاد کہ جن کی دھاریں

آب ہو شیر کا زہرہ ہے، جسے وہ للکاریں

بجلیاں کوند رہی ہیں کسے نیزہ ماریں

کس بشاشت سے ہزاروں یہ، دلیر آتے ہیں

بچے آتے ہیں کہ بپھرے ہوئے شیر آتے ہیں

شہ نے فرمایا کہ سر کاٹ لو، حاضر ہوں میں

نہ تو لڑنے میں، نہ مرجانے میں قاصر ہوں میں

فوج بھی اب نہیں بے یاور و ناصر ہوں میں

شہر و صحرا بھی تمہارا ہے، مسافر ہوں میں

لوٹ لو پھونک دو، تاراج کرو بہتر ہے

کلمہ گویو! یہ تمہارے ہی نبی کا گھر ہے

کئی سیدانیاں خیمے میں ہیں پردے والی

جن کا رتبہ ہے زمانے میں ہر اک پر حالی

اب نہ وارث کوئی سر پر ہے، نہ کوی والی

ان کو دیجو! کوئی رہ جائے جو خیمہ خالی

یہ نبی زادیاں بے پردہ نہ ہوئیں جس میں

ایک گوشہ ہو کہ سب بیٹھ کے روئیں جس میں

سن کے ان باتوں کا اعدا نے دیا جو کہ جواب

گر لکھوں اس کو تو ہو جائے جگر سنگ کا آب

قلب تھرا گیا ہر گز نہ رہی ضبط کی تاب

دیکھ کر رہ گئے گردوں کو، شۂ عرش جناب

اشک خالی اسے کرتے ہیں جو دل بھر آئے

آپ رونے کے لیے خیمے کے در پر آئے

تھم کے چلائے کہ اے زینبؑ و ام کلثوم

تم سے رخصت کو پھر آیا ہے حسینِ مظلوم

آ مرے قتل کے درپے ہے یہ سب لشکرِ شوم

ہاں جگادو اسے غش ہو جو سکینہ معصوم

نہیں ملتا جو زمانے سے گزر جاتا ہے

کہہ دو عابدؔ سے کہ مرنے کو پدر جاتا ہے

یہ صدا سن کے حرم خیمے سے، مضطر دوڑے

شہ کی آواز پہ سب بے کس و بے پر دوڑے

گر پڑیں سر سے ردائیں تو کھلے سر دوڑے

بچے روتے ہوئے ماؤں کے برابر دوڑے

رو کے چلائی سکینہ شہ والا آؤ!

میں تمہیں ڈھونڈتی تھی، دیر سے بابا آؤ!

آؤ اچھے مرے بابا، میں تمہاری واری

دیکھو تم بن ہیں گلے تک مرے آنسو جاری

آج یہ کیا ہے کہ بھولے مرے خاطر داری

ہاتھ پھیلا کے کہو! آ مری بیٹی پیاری

منہ چھپانے کی ہے کیا وجہ نہ شرماؤ تم

اب میں پانی بھی نہ مانگوں گی، چلے آؤ تم

دیکھ کر پردہ سے یہ کہنے لگی، زینبِؑ زار

ابنِ زہراؔ تری مظلومی و غربت کے نثار

آؤ چادر سے کروں پاک، میں چہرے کا غبار

شہ نے فرمایا، بہن مر گئے سب مونس و یار

تم نے پالا تھا جسے، ہم اسے رو آئے ہیں

علی اکبرؑ سے جگر بند کو کھو آئے ہیں

منہ دکھائیں کسے، سب سے ہے ندامت زینبؔ

گھر میں آنے کی نہیں، بھائی کو مہلت زینبؔ

کھینچ لائی ہے سکینہ کی محبت زینبؔ

بھائی جاتا ہے، دکھا دو ہمیں صورت زینبؔ

نہ تو سر کھولو، نہ منہ پیٹو، نہ فریاد کرو

بھول جاؤ ہمیں، اللہ کو اب یاد کرو

صبر سے خوش ہے خدا، اے مری غم خوار بہن

سہل ہوجاتا ہے، جو امر ہو دشوار بہن

اپنی ماں کا ہے طریقہ، تمہیں درکار بہن

پھر میں کہتا ہوں سکینہ سے خبردار بہن

ناز پرور ہے مرے بعد الم اس پہ نہ ہو

بُندے کانوں سے اتارو کہ ستم اس پہ نہ ہو

کہیو عابد سے یہ پیغام مرا بعد سلام

غش تھے تم پھر گئے دروازے تلک آ کے امام

قید میں پھنس کے نہ گھبرائیو اے گل اندام

کاٹیو صبر و رضا سے، سفرِ کوفہ و شام

ناؤ منجدھار میں ہے شور طلاطم جانو!

نا خدا جاتا ہے، گھر جانے اور اب تم جانو!

کہہ کے یہ باگ پھرآئی طرفِ لشکرِ شام

پڑ گیا خیمۂ ناموس نبی میں کہرام

رن میں گھوڑے کو اڑاتے ہوئے آئے جو امام

رعب سے فوج کے دل ہل گئے کانپے اندام

سر جھکے ان کے جو کامل تھے زباں دانی میں

اڑ گئے ہوش فصیحوں کے رجز خوانی میں

تھا یہ نعرہ کہ محمد کا نواسا ہوں میں

مجھ کو پہچانو! کہ خالق کا شناسا ہوں میں

زخمی ہونے سے نہ مرنے سے ہراسا ہوں میں

تیسرا دن ہے یہ گرمی میں کہ پیاسا ہوں میں

چین کیا چیز ہے، آرام کسے کہتے ہیں؟

اس پہ شکوہ نہیں کچھ، صبر اسے کہتے ہیں

اس کا پیارا ہوں جو ہے ساقیِٔ حوضِ کوثر

اس کا بیٹا ہوں، جو ہے فاتحِ بابِ خیبر

اس کا فرزند ہوں کی جس نے مہم بدر کی سر

اس کا دلبر ہوں میں، دی جس کو نبی نے دختر

صاحبِ تخت ہوئے، تیغ ملی، تاج ملا

دوش احمدؔ پہ انہیں رتبۂ معراج ملا

بے وطن ہوں نہ مسافر کو ستاؤ اللہ

قتل کیوں کرتے ہو تم، کون سا میرا ہے گناہ

اب نہ یاور ہے کوئی ساتھ نہ لشکر نہ سپاہ

تم کو لازم ہے غریبوں پہ ترحم کی نگاہ

ہاتھ آئے گا نہ انعام، نہ زر پاؤگے

یاد رکھو! مرا سر کاٹ کے پچھتاؤگے

نہ بھی ختم ہوئی تھی یہ مسلسل تقریر

حجت اللہ کے فرزند پہ چلنے لگے تیر

چوم کر تیغ کے قبضے کو پکارے شبیر

لو خبردار! چمکتی ہے علیؔ کی شمشیر

پسرِ فاتحِ صفین و حنین آتا ہے

لو صفیں باندھ کے روکو تو حسینؔ آتا ہے

لو کھنچو تیغِ دوسر، فوج پہ آفت آئی

لو ہلا، قائمۂ عرش، قیامت آئی

فتح تسلیم کو، آداب کو نصرت آئی

فخر سے غاشیہ برداری کو شوکت آئی

چوم لوں پاؤں، جلال اس تگ و دو میں آیا

ہاتھ جوڑے ہوئے اقبال جلو میں آیا

آپ سیدھے جو ہوئے رخش نے بدلے تیور

دونوں آنکھیں ابل آئیں کہ ڈرے بانیِٔ شر

تھوتھنی مل گئی سینے سے کیا، دُم کو چنور

مثلِ طاؤس اڑا، گاہ اِدھر، گاہ اُدھر

دم بدم گرد نسیمِ سحری پھرتی تھی

جھوم کر پھرتا تھا، گویا کہ پری پھرتی تھی

ابر ڈھالوں کا اٹھا تیغِ دو پیکر چمکی

برق چھپتی ہے، یہ چمکی تو برابر چمکی

سوئے پستی کبھی کوندی، کبھی سر پر چمکی

کبھی انبوہ کے اندر، کبھی باہر چمکی

جس طرف آئی وہ ناگن اسے ڈستے دیکھا

مینہ سروں کا صفِ دشمن میں برستے دیکھا

دھار ایسی کی رواں ہوتا ہے دھارا جیسے

گھاٹ وہ گھاٹ کہ دریا کا کنارا جیسے

چمک ایسی کہ حسینوں کا اشارا جیسے

روشنی وہ کہ گرے ٹوٹ کے تارا جیسے

کوندنا برق کا شمشیر کی ضو میں دیکھا

کبھی ایسا نہیں دم خم مہ نو میں دیکھا

اک اشارے میں، برابر کوئی دو تھا کوئی چار

نہ پیادہ کوئی بچتا تھا سلامت نہ سوار

برق گرتی تھی کہ چلتی تھی صفوں پر تلوار

غضب اللہ علیہم کے عیاں تھے آثار

موت ہر غول کو برباد کیے جاتی تھی

آگ گھیرے ہوئے دوزخ میں لیے جاتی تھی

تیغیں آری ہوئی ڈھالوں کے اڑے پرکالے

بند سب بھول گئے خوف سے نیزوں والے

جو بڑھے ہاتھ سرِ دست قلم کر ڈالے

تیغ کہتی تھی، یہ سب ہیں مرے دیکھے بھالے

صف بہ صف باندھ کے نیزوں کو عبث تولے ہیں

ایسے عقدے مرے ناخن نے بہت کھولے ہیں

جب کبھی جائزۂِ فوج ستم لیتی ہوں

موت سے رحم نہ کرنے کی قسم لیتی ہوں

دو زبانوں سے سدا کارِ قلم لیتی ہوں

چہرے کٹ چکتے ہیں، لشکر کے تو دم لیتی ہوں

ہر طرف ہو کے، عدم کے سفری ہوتے ہیں

طبقلیں کٹتی ہیں، چہرے نظری ہوتے ہیں

وہ برش وہ چمک اس کی وہ صفائی اس کی

کسی تلوار نے تیزی نہیں پائی اس کی

اس کا بازو جو اڑایا، تو کلائی اس کی

مل گئی جس کے گلے سے اجل آئی اس کی

صورتِ مرگ کسی نے بھی نہ آتے دیکھا

سر پہ چمکی تو کمر سے اسے جاتے دیکھا

کبھی ڈھالوں پہ گری اور کبھی تلواروں پر

پیدلوں پر کبھی آئی کبھی اسواروں پر

کبھی ترکش پہ رکھا منہ، کبھی سوفاروں پر

کبھی سر کاٹ کے آ پہنچی کمانداروں پر

گر کے اس غول سے اٹھی تو اس انبوہ میں تھی

کبھی دریا میں، کبھی بر میں، کبھی کوہ میں تھی

کبھی چہرہ کبھی شانہ، کبھی پیکر کاٹا

کبھی در آئی جگر میں، تو کبھی سر کاٹا

کبھی مغفر، کبھی جوشن، کبھی بکتر کاٹا

طول میں راکب و مرکب کا برابر کاٹا

برشِ تیغ کا غسل، قاف سے تا قاف رہا

پی گئی خون ہزاروں کا، پہ منہ صاف رہا

نہ رکی خود پہ وہ، اور نہ سر پر ٹھہری

نہ کسی تیغ پہ دم بھر، نہ سپر پر ٹھہری

نہ جبیں پر نہ گلے پر، نہ جگر پر ٹھہری

کاٹ کر زین کو، گھوڑے کی کمر پر ٹھہری

جان گھبرا کے تنِ دشمنِ دیں سے نکلی

ہاتھ بھر ڈوب کے تلوار، زمیں سے نکلی

کٹ گئی، تیغ تلے جب صفِ دشمن آئی

یک بیک فصلِ فراقِ سر و گردن آئی

بگڑی اس طرح لڑائی کہ نہ کچھ بن آئی

تیغ کیا آئی کہ اڑتی ہوئی ناگن آئی

غل تھا بھاگو کہ یہ ہنگام ٹھہرنے کا نہیں

زہر اس کا جو چڑھے گا تو اترنے کا نہیں

وہ چمک اس کی، سروں کا وہ برسنا، ہرسو

گھاٹ سے تیغ کے، اک حشر بپا تھا لبِ جو

آب میں صورت آتش تھی، جلا دینے کی خو

اور دم بڑھتا تھا، پیتی تھی جو اعدا کا لہو

کبھی جوشن، تو کبھی صدرِ کشادہ کاٹا

جب چلی ضربتِ سابق سے زیادہ کاٹا

تنِ تنہا شۂ دیں لاکھ سواروں سے لڑے

بے سپر برچھیوں والوں کی قطاروں سے لڑے

صورتِ شیر خدا، ظلم شعاروں سے لڑے

دو سے اک لڑ نہیں سکتا، یہ ہزاروں سے لڑے

گر ہو غالب، تو ہزاروں پہ وہی غالب ہو

جو دل و جانِ علیؔ ابن ابی طالبؔ ہو

تیسرے فاقے میں یہ جنگ، یہ حملے یہ جدال

پیاس وہ پیاس کہ نیلم تھے سراسرلب لعل

دھوپ وہ دھوپ کہ سوکھے ہوئے تھے تازہ نہال

لُو وہ لُو جس کی حرارت سے پگھلتے تھے جبال

سنگ ریزوں میں، تب و تاب تھی انگاروں کی

سر پہ یا دھوپ تھی، یا چھاؤں تھی تلواروں کی

شیر سے تھے کبھی جنگل میں، ترائی میں کبھی

ڈھال کو چہرے پہ روکا نہ لڑائی میں کبھی

تیغ حیدر نے کمی کی نہ صفائی میں کبھی

فرق آیا نہ سر و تن کی جدائی میں کبھی

کبھی ابرو کا بھی ایسا نہ اشارا دیکھا

جس پہ اک وار کیا اس کو دوبارا دیکھا

آنکھ وہ آنکھ کہ شیروں کی جلالت جس میں

رخش وہ رخش، کہ سب برق کی سرعت جس میں

تیغ وہ تیغ، عیاں موت کی صورت جس میں

ہاتھ وہ ہاتھ، ید اللہ کی طاقت جس میں

روک لے دار، جگر کیا کسی بے پیر کا ہے

زور وہ، جس میں اثر فاطمہؔ کے شیر کا ہے

جنگ میں پیاس کا صدمہ شۂ دیں سے پوچھو

تنِ تنہا کی وغا، لشکرِ کیں سے پوچھا

زلزلہ دشت پر آفت کا، زمیں سے پوچھو

ضربِ شمشیر دو سر، روحِ امیں سے پوچھو

باپ اس فوج میں تنہا، پسر اس لشکر میں

کربلا میں یہ تلاطم ہوا، یا خیبر میں

اسد اللہ کے صدقے، شہ والا کے نثار

وہی حملے تھے، وہی زور، وہی تھی تلوار

فتحِ حیدر نے کیا جنگ میں خیبر کا حصار

مورچے فوج کے، حضرت نے بھی توڑے کئی بار

کیوں نہ ہو احمدِ مرسل کے نواسے تھے حسینؔ

فرق اتنا تھا کہ دو روز کے پیاسے تھے حسینؔ

ہر طرف فوج میں غل تھا کہ دہای مولا!

ہم نے دیکھی ترے ہاتھوں کی صفائی مولا!

الاماں خوب سزا جنگ کی پائی مولا!

آپ کرتے ہیں بروں سے بھی بھلائی مولا!

ہاتھ ہم باندھتے ہیں پھینک کے شمشیروں کو

بخشیے امتِ نا اہل کی تقصیروں کو

آتی ہاتف کی یہ آواز کہ اے عرشِ مقام

یہ وغا تیسرے فاقے میں، بشر کا نہیں کام

اے محمدؔ کے جگر بند، امام ابنِ امام

لوحِ محفوظ پہ مرقوم ہے، صابر ترا نام

اب نہیں حکم لعینوں سے وغا کرنے کا

ہاں! یہی وقت ہے وعدے کے وفا کرنے کا

آج ہے آٹھوں بہشتوں کی نئی تیاری

نخل سرسبز ہیں فردوس میں نہریں جاری

شب سے حوریں ہیں مکلل بجواہر ساری

خانۂ دوست میں ہے، دوست کی مہانداری

پیشوائی کو رسول الثقلین آتے ہیں

عرش تک شور یہی ہے کہ حسینؔ آتے ہیں

تھم گئے سن کے یہ آواز شۂ جن و بشر

روک کر تیغ کو فرمایا کہ حاضر ہے یہ سر

عید ہو جلد اگر ذبح کریں بانیِ شر

شمرِؔ اظلم ہے کدھر؟ کھینچ کے آئے خنجر

ہے وہ عاشق جو فدا ہونے کو موجود رہے

بس مری فتح یہی ہے کہ وہ خوشنود رہے

کہہ کے یہ میان میں مولا نے رکھی تیغِ دو دم

ہاتھ اٹھا کر یہ اشارہ کیا گھوڑے کو کہ تھم

رہ گیا سر کو جھکا کر فرسِ تیز قدم

چار جانب سے مسافر پہ چلے تیرِ ستم

نیزے یوں گرد تھے جسے گلِ تر خاروں میں

گھر گئے سبطِ نبی، ظلم کی تلواروں میں

پہلے تیروں سے کمانداروں نے چھاتی چھانی

نیزے پہلو پہ لگاتے تھے ستم کے بانی

سر پہ تلواریں چلیں، زخمی ہوئی پیشانی

خوں سے تر ہو گیا حضرت کا رخِ نورانی

جسم سب چور تھا، پرزے تھے زرہ جامے کے

پیچ کٹ کٹ کے کھلے جاتے تھے عمامے کے

برچھیاں مارتے تھے، گھاٹ پہ جو تھے پہرے

کس طرف جائے، کہاں تیغوں میں بیکس ٹھہرے

ایک ہزار اور کوئی سو زخم تھے تن پر گہرے

دیکھنے والوں کے ہو جاتے تھے، پانی زہرے

خوں میں ڈوبا ہوا وہ مصحفِ رخ سارا تھا

جزو ہر اک تن شبیر کا سی پارا تھا

ہاتھ سے باگ جدا تھی، تو رکابوں سے قدم

غش میں سیدھے کبھی ہوتے تھے فرس پر کبھی خم

بہتے تھے پہلوؤں سے، خوں کے دڑیڑے پیہم

کوئی بیکس کا مددگار نہ تھا ہائے ستم

مارے تلواروں کے مہلت تھی نہ دم لینے کی

کوششیں ہوتی تھیں کعبے کے گرادینے کی

دشت سے آتی تھی زہراؔ کی صدا ہائے حسینؔ

میرے بیکس، میرے بے بس، مرے دکھ پائے حسینؔ

در سے چلاتی تھی زینبؔ مرے ماں جائے حسینؔ

کون تیغوں سے بچا کر تجھے لے آئے حسینؔ

فاطمہؔ رو رہی ہیں، ہاتھوں سے پہلو تھامے

حکم گر ہو تو بہن دوڑ کے بازو تھامے

ہائے سیدا ترا تن اور ستم کے بھالے

کس کو چلاؤں کہ جیتے نہیں مرنے والے

اس پہ یہ ظلم دکھوں سے جسے زہراؔ پالے

کون سر سے ترے تلواروں کی آفت ٹالے

کون فریاد سنے بے سر و سامانوں کی

یاں تو بستی بھی نہیں کوئی مسلمانوں کی

نہ رہا جب کہ ٹھہرنے کا فرس پر یارا

گرپڑا خاک پہ، وہ عرش خدا کا تارا

غش سے کچھ دیر میں چونکا جو علیؔ کا پیارا

نیزہ سینے پہ، سناں ابنِ انس نے مارا

واں تو نیزے کی انی پشت سے باہر نکلی

یاں بہن خیمے کی ڈیوڑھی سے کھلے سر نکلی

کھینچ کر سینے سے نیزہ جو ہٹا دشمنِ دیں

جھک کے حضرت نے رکھی خاک پہ سجدے میں جبیں

تیز کرتا ہوا خنجر کو بڑھا شمر لعیں

آسماں ہل گئے تھرا گئی مقتل کی زمیں

کیا کہوں تیغ کو کس طرح گلے پر رکھا

پاؤں قرآں پہ رکھا، حلق پہ خنجر رکھا

ڈھانپ کر ہاتھوں سے منہ بنتِ علی چلائی

ذبح ہوتے ہو مرے سامنے ہے ہے بھائی

ضربِ اول تھی کہ تکبیر کی آواز آئی

گر پڑی خاک پہ غش کھا کے علی کی جائی

آنکھ کھولی تھی کہ ہنگامۂ محشر دیکھا

سر اٹھایا تو سرِ شہ کو سناں پر دیکھا

رو کے چلائی کہ ہے ہے ہمرے مظلوم حسینؔ

فوجِ اعدا میں، ترے قتل کی ہے دھوم حسینؔ

کچھ مجھے آنکھوں سے ہوتا نہیں معلوم حسینؔ

ہائے میں رہ گئی دیدار سے محروم حسینؔ

مڑ کے دیکھو کہ مصیبت میں پڑی ہوں بھائی

ننگے سر بلوۂ اعدا میں کھڑی ہوں بھائی

بس انیسؔ آگے نہ لکھ زینبِ ناشاد کے بین

قتل ہو جانے پہ بھی دھوپ میں تھی لاشِ حسینؔ

قبر میں بھی نہ ملا احمدِؔ مختار کو چین

گھر جلا، قید ہوئی، آلِ رسول الثقلین

کتنے گھر شاہ کے مر جانے سے برباد ہوئے

لٹ گئے یوں کہ نہ سادات پھر آباد ہوئے

namak khwan-e-takallum hai, fasahat meri

natiqe band hain sun sun ke balaghat meri

rang urte hain wo rangin hai ibarat meri

shor jis ka hai wo dariya hai tabiat meri

umr guzri hai isi dasht ki sayyahi mein

panchwin pusht hai shabbir ki maddahi mein

ek qatre ko jo dun bast to qulzum kardon

bahr-e-mawwaj fasahat ka talatum kar dun

mah ko mehr karun zarron ko anjum kardon

gang ko, mahir andaz-e-takallum kar dun

dard-e-sar hota hai be rang na fariyad karen

bulbulen mujh se gulistan ka sabaq yad karen

is sana khwan ke buzurgon mein hain kya kya maddah

jadd aala se na hoga koi aala maddah

bap maddah ka maddah hai dada maddah

amma-e-zi qadr sana khwanon mein yakta maddah

jo inayat-e-ilahi se hua nek hua

nam barhta gaya jab ek ke baad ek hua

taba har ek ki mauzun qad-e-zeba mauzun

surat-e-sarw-e-azal se hain sarapa mauzun

nasrbe saja nahin, nazm-e-mualla mauzun

kahin sakta nahin a sakta, kuja namauzun

tol le aql ki mizan mein jo fahmida hai

bat jo munh se nikalti hai wo sanjida hai

khalq mein misl-e-khaliq aur tha khush go koi kab

nam le dho le zaban kausar-o-tasnim se jab

bulbul-e-gulshan-e-zahra-o-ali ashiq rab

muttabe marsiya goi mein hue jis ke sabab

ho agar zehn mein jaudat hai ke mauzuni hai

is ihate se jo bahar hai wo beruni hai

bhai khush fikrat-o-khush lahja-o-pakiza khisal

jin ka sina guhar-e-ilm se hai mala mal

ye fasahat, ye balaghat, ye salasat ye kamal

mojiza gar na use kahiye to hai sehr halal

apne mauqaa pe jise dekhiye lasani hai

lutf hazrat ka ye hai rahmat-e-yazdani hai

kyun na ho banda-e-maurusi-e-maula hun main

qulzum-e-rahmat-e-maabud ka qatra hun main

jis mein lakhon dar-o-marjan hain wo dariya hun main

madh khwan-e-pisar-e-hazrat-e-zahra hun main

wasf-e-jauhar ka karun ya sifat zat karun

apne rutbe pe na kyun ap mubahat karun

mubtadi hun mujhe tauqir ata kar yarab

shauq-e-maddahi shaper ata kar yarab

sang ho mom wo taqrir ata kar yarab

nazm mein rone ki tasir atakar ya rab

jadd-o-aba ke siwa aur koi taqlid na ho

lafz mughlaq na hun gunjlak na hun taaqid na wo

wo muraqqaa ho ke dekhen use gar ahl-e-shuur

har waraq mein kahin saya nazar ae kahin nur

ghul ho ye hai kashish-e-mu-e-qalam turra-e-hur

saf har rang se ho sanat-e-sane ka zuhur

koi nazir jo ye nayab naziren samjhe

naqsh-e-arzhang ko kawak lakiren samjhe

qalam-e-fikr se khinchun jo kisi bazm ka rang

sham-e-taswir pe girne lagen a a ke patang

saf hairat zada mani ho to behzad ho dang

khun barasta nazar ae jo dikhaun saf-e-jang

razm aisi ho ke dil sab ke pharak jaen abhi

bijliyan teghon ki ankhon mein chamak jaen abhi

rozmarra shurafa ka ho salamat ho wahi

lab-o-lahja wahi sara ho matanat ho wahi

samiin jald samajh len jise, sanat ho wahi

yaani mauqaa ho jahan jis ka ibarat ho wahi

lafz bhi chust hun mazmun bhi ali howe

marsiya dard ki baton se na khali howe

hai kaji aib magar husn hai abru ke liye

tirgi bad hai magar nek hai gesu ke liye

surma zeba hai faqat nargis-e-jadu ke liye

zeb hai khal-e-siyah-e-chehra-e-gulru ke liye

danad ankis ke fasahat ba kalamai darad

har sukhan mauqaa-o-har nukta maqame darad

bazm ka rang juda, razm ka maidan hai juda

ye chaman aur hai zakhmon ka gulistan hai juda

fahm-e-kamil ho, to har name ka unwan hai juda

mukhtasar parh ke rula dene ka saman hai juda

dabdaba bhi ho, masaib bhi hun, tausif bhi ho

dil bhi mahfuz hun, riqqat bhi ho taarif bhi ho

majra subh-e-shahadat ka bayan karta hun

ranj-o-andoh-o-musibat ka bayan karta hun

tishna kamon ki ibadat ka bayan karta hun

jan nisaron ki itaat ka bayan karta hun

jin ka hamta nahin, ek ek musahib aisa

aise bande na kabhi honge, na sahab aisa

subh-e-sadiq ka hua charkh pe jis waqt-e-zuhur

zamzame karne lage yad-e-ilahi mein tuyur

misl-e-khurshid baramad hue kheme se huzur

yak bayak phail gaya char taraf dasht mein nur

shash jihat mein rukh-e-maula se zuhur-e-haq tha

subh ka zikr hai kya, chand ka chehra faq tha

thandi thandi wo hawaen wo bayaban wo sahar

dam badam jhumte the wajd ke alam mein shajar

os ne farsh-e-zamurrad pe bichhae the guhar

lauti jati thi lahakte hue sabze pe nazar

dasht se jhum ke jab bad-e-saba ati thi

saf ghunchon ke chatakne ki sada ati thi

bulbulon ki wo sadaen, wo gulon ki khushbu

dil ko uljhate the, sumbul ke wo par kham gesu

qamariyan kahti thin shamshad pe yahu yahu

fakhta ki ye sada sarw pe thi, ko ko ko

waqt tasbih ka tha ishq ka dam bharte the

apne maabud ki sab, hamd-o-sana karte the

ae sajjada-e-taat pe imam-e-do jahan

is taraf tabal baja yan hui lashkar mein azan

wo musalli ke zaban jin ki hadis-o-quran

wo namazi ke jo iman ke tan-e-pak ki jan

zahid aise the ke mumtaz the, abraron mein

abid aise the ke sajde kiye talwaron mein

arsh-e-aazam ko hilati thin duaen un ki

wajd karte the malak, sun ke sadaen un ki

wo ammame, wo qabaen, wo abaen un ki

huren leti thin basad shauq balaen un ki

zikr-e-khaliq mein lab un ke jo hile jate the

ghunche firdaus ke shadi se khule jate the

kya jawanan-e-khush atwar the, subhan allah

kya rafiqan-e-wafadar the, subhan allah

safdar-o-ghazi-o-jarrar the, subhan allah

zahid-o-abid-o-abrar the, subhan allah

zan-o-farzand se furqat hui, maskan chhora

magar ahmad ke nawase ka na daman chhora

allah allah ajab fauj ajab ghazi the

ajab aswar the be misl, ajab tazi the

laiq-e-madh-o-sazawar-e-sar afrazi the

go bahut kam the, pe amada-e-jan bazi the

pyas aisi thi ke a a gai jan honton par

sabir aise the ke pheri na zaban honton par

zohd mein hazrat sullaman ke barabar koi

daulat-e-faqr-o-qanaat mein abozar koi

sidq-e-guftar mein ammaar ka hamsar koi

hamza asr koi malik-e-ashtar koi

honge aise hi mohammad ke jo shaida honge

phir jihad aisa na hoga, na wo paida honge

go musibat mein talatum mein, tabahi mein rahe

sarkate paon magar rah-e-ilahi mein rahe

yun sarafraz, wo sab lashkar-e-shahi mein rahe

jis tarah tegh-e-do dam dast-e-sipahi mein rahe

is musibat mein na paya kabhi shaki un ko

abru saqi-e-kausar ne ata ki un ko

wo takhashsho, wo tazarro, wo qayam aur wo qod

wo tazallul wo duaen wo ruku aur wo sujud

yad-e-haq dil mein, to sukhe hue honton pe durud

ye dua khaliq-e-akbar se ke ai rab-e-wadud

yun luten ham ke, na al aur na aulad rahe

magar ahmad ke nawase ka ghar abad rahe

mom faulad ho awazon mein wo soz-o-gudaz

apne maabud se sajdon mein ajab raz-o-niyaz

sar to sajjadon pe the arsh-e-mualla pe namaz

sher dil muntakhab-e-dahr wahid-o-mumtaz

chand sharminda ho, chehre mutajalli aise

na imam aisa hua phir na musalli aise

jab farize ko ada kar chuke wo khush kirdar

kis ke kamron ko basad shauq lagae hathiyar

jalwa farma hue ghore pe shah-e-arsh waqar

ilm-e-fauj ko abbas ne khola ik bar

dasht mein nikhat-e-firdaus-e-barin ane lagi

arsh tak us ke pharere ki hawa jane lagi

lahr wo sabz pharere ki, wo panje ki chamak

sharm se abr mein chhup jata tha khurshid-e-falak

kahte the sal-e-ali charkh pe uth uth ke malak

dang the sab wo saman se tha saman ta ba falak

kahiye pasti use jo auj-e-huma ne dekha

wo saman phir na kabhi arz-o-sama ne dekha

is tarah jab ilm-e-dilbar-e-zahra jae

kis se phir marka-e-razm mein thahra jae

sanp dushman ki na kyun chhati pe lahra jae

lahr mein ta ba falak jis ka pharera jae

rafa shar ko, ilm-e-khair bashar aya tha

sura-e-nasr piye fath-o-zafar aya tha

wo alam dar ke jo sher-e-ilahi ka khalaf

gauhar bahr-e-wafa, nayar-e-din dar-e-najaf

fakhrhamza se numudar ka jaafar ka sharaf

kis tarah chand kahun, chand mein hai aib kalaf

kis ne paya wo jo tha jah-o-hasham un ke liye

ye alam ke liye the aur alam un ke liye

sarw sharmae, qad is tarah ka, qamat aisi

asad allah ki taswir the, surat aisi

sher naaron se duhul jate the, saulat aisi

ja ke pani na piya nahr pe himmat aisi

jan jab tak thi itaat mein rahe bhai ki

the alam dar, magar bachchon ki saqqai ki

wo bahishti ne kiya, jis ko wafa kahte hain

ham unhen ashiq-e-shah-e-shuhada kahte hain

un ko qibla to unhen qibla numa kahte hain

jo bahadur hain, wo shamshir-e-khuda kahte hain

ishq-e-sardar-o-alamdar ka afsana hai

wo charagh-e-rah-e-din hai to ye parwana hai

ik taraf akbar-e-mehro sa jawan-e-nayab

kuchh jo bachpan tha to kuchh amad-e-ayyam-e-shabab

raushni chehre pe aisi ke khajil ho mahtab

ankhen aisi ke raha, nargis-e-shahla ko hijab

jis ne un gesuon mein rukh ki ziya ko dekha

shab-e-meraj mein, mahbub-e-khuda ko dekha

ai khusha husn-e-rukh-e-yusuf-e-kanan-e-husn

rahat-e-ruh-e-hasin, ibn-e-ali, jan-e-husn

jism mein zor-e-ali, taba mein ehsan-e-husn

hama tan khalq-e-husn, husn-e-husn, shan-e-husn

tan pe karti thi nazakat se girani poshak

kya bhali lagti thi bachpan mein suhani poshak

allah allah asad-e-haq ke nawason ka jalal

chand se chehron pe bal khae hue zulfon ke bal

nimache kandhon pe rakhe hue, manind-e-hilal

garche bachpan tha, pe rustam ko samajhte the wo zal

saf se ghoron ko barha kar jo palat jate the

morche lashkar-e-kuffar ke hat jate the

astinon ko charhae hue amada-e-jang

wahi sara asad allah ka naqsha, wahi dhang

surkh chehre the ke sheron ka yahi hota hai rang

walwala saf ke ulatne ka, larai ki umang

jism par tir chalen, neza-e-khunkhwar chale

shauq us ka tha ke jaldi kahin talwar chale

yak bayak tabal baja fauj mein garje badal

koh-e-tharai, zamin hal gai gunja jangal

phul dhalon ke chamakne lage talwaron ke phal

marne walon ko nazar ane lagi shakl-e-ajal

wan ke chaosh barhane lage dil lashkar ka

fauj-e-islam mein naara hua ya haidar ka

shor maidaniyon mein tha, ke dilero niklo!

neza bazi karo, rahoarron ko phero niklo!

nahr qabu mein hai, ab pyason ko ghero niklo!

ghaziyo! saf se barho ghaul se shero niklo!

rustamo! dad-e-wagha do, ke ye din dad ka hai

samna haidar-e-karrar ki aulad ka hai

shor-e-sadat mein tha, ya shah-e-mardan madde

kaaba-e-din madde, qibla-e-iman madde

quwwat-e-bazu-e-paighambar-e-zi shan madde

dam-e-taid hai, ai fakhr-e-sulaiman madde

tisra faqa hai, taqat mein kami hai maula!

talab quwwat-e-sabit qadami hai maula!

pyas mein harf na shikwe ka zaban par laen

dam badam sinon pe faqon mein sinanen khaen

dil na tarpe, jo dam-e-nazaa na pani paen

tere farzand ki taid karen, marjaen

lashe maqtal mein hun lash-e-shah-e-dilgir ke pas

sar hun neze pe sar-e-hazrat-e-shabbir ke pas

samne barh ke yakayak saf-e-kuffar ai

jhum kar tira ghata, taron pe ik bar ai

roz-e-raushan ke chhupane ko shab-e-tar ai

tishna kamon ki taraf, tiron ki bauchhar ai

hans ke munh bhai ka shah-e-shuhada ne dekha

apne aqa ku ba hasrat rufaqa ne dekha

arz abbas ne ki josh hai jarraron ko

tir sab khate hain, tole hue talwaron ko

mehmanon ka nahin pas, sitamgaron ko

maslahat ho to raza dijiye, ghamkhwaron ko

ro siyahon ko mita den ke barhe ate hain

ham jo khamosh hain wo munh pe charhe ate hain

yahi hangama raha subh se, ta waqt-e-zawal

lash par lash giri, bhar gaya maidan-e-qital

surkhru khalq se uthe, asad allah ke lal

morche sab tah-o-bala the, pare sab pamal

khet aise bhi kisi jang mein kam parte hain

jo lara sab yahi samjhe ke ali larte hain

qasim-o-akbar-o-abbas ka allah re jihad

ghul har ik zarb pe tha ab, hui duniya barbad

alaman ka tha kahin shor kahin thi fariyad

de gae khalq mein mardanagi-e-harb ki dad

go wo duniya mein nahin, arsh-e-maqam un ka hai

aj tak alam-e-ijad mein nam un ka hai

dopahar mein wo chaman bad-e-khizan ne lauta

patta patta hua taraj to buta buta

bap bete se chhuta, bhai se bhai chhota

ibn-e-zahra ki kamar jhuk gai bazu tuta

phir se na yawar, na wo jan baz na wo shaida the

zohr ke waqt hasin ibn-e-ali tanha the

sath jo jo ke bahadur the, watan se ae

samne sote the reti pe sunaen khae

dhup mein pyas se misl-e-gul-e-tar murjhae

margae par na gharibon ne kafan tak pae

dhup parti thi ye din charkh ne dikhlaya tha

na to chadarthi kisi lash pe ne saya tha

sahab-e-fauj pe tari tha ajab ranj-o-malal

zard tha rang, to ankhen thin lahu rone se lal

kabhi bhai ka alam tha, kabhi bete ka khayal

kabhi dharka tha ke lashen na kahin hun pamal

kabhi barhte the wagha ko, kabhi ruk jate the

sidhe hote the kabhi, aur kabhi jhuk jate the

barh ke chillate the be dard ke ab ap aen

jauhar-e-tegh-e-shahanshah-e-najaf dikhlaen

marne wale nahin jite jo sunaen khaen

kat len ap ka sar tan se to fursat paen

pisar-e-saad se waada hai, sala lene ka

hukm hai khema-e-aqdas ke jala dene ka

shah ne farmaya, mujhe khud hai shahadat manzur

na larai ki hawas hai, na shujaat ka ghurur

jang manzur na thi un se pe ab hun majbur

khair, lar lo ke satate hain ye be jurm-o-qusur

zabh karne ke liye lashkar-e-nari ae

kahin jaldi mire sar dene ki bari ae

hukm pana tha ke sheron ne urae tazi

misl-e-shahbaz gaya ek ke baad ik ghazi

wah ri harb, khusha zarb, zahe janbazi

ur gaya hath barha jo piye dast-e-andazi

lautte ran mein sar-o-jism nazar ate the

ek hamle mein qadam fauj ke jam jate the

jis pe ghussa mein gae said pe shahbaz gira

ye kaman kat ke giri, wo qadar andaz gira

jab gira khak pe ghore se, to mumtaz gira

na utha phir kabhi, jo tafriqa pardaz gira

hath munh kat gae, sar ur gae ji chhut gae

morche ho gae pamal, pare tut gae

baad ghairon ke azizon ne kiya azm-e-nabard

sar ko nahewra ke bhara sibt-e-nabi ne dam-e-sard

huk uthi kabhi sine mein, to dil mein kabhi dard

surkh hota tha kabhi chand sa chehra kabhi zard

koi gul ru to koi sarw sahi bala tha

wo bichharne lage, godi mein jinhen pala tha

zulfon wala tha koi, koi muradon wala

koi bhai ka pisar, koi bahan ka pala

chand sa munh jo kisi ka tha to gesu hala

koi qamat mein bahut kam koi qad mein bala

naujawan kaun sa khush ro-o-khush andaz na tha

kitne aise the ke sabza abhi aghaz na tha

hath wo bachchon ka, aur chhoti si wo talwaren

mom kardeti thin faulad ke jin ki dharen

ab ho sher ka zohra hai, jise wo lalkaren

bijliyan kaund rahi hain kise neza maren

kis bashashat se hazaron ye, diler ate hain

bachche ate hain ke biphre hue sher ate hain

shah ne farmaya ke sar kat lo, hazir hun main

na to larne mein, na marjane mein qasir hun main

fauj bhi ab nahin be yawar-o-nasir hun main

shahr-o-sahra bhi tumhara hai, musafir hun main

laut lo phunk do, taraj karo behtar hai

kalima goyu! ye tumhare hi nabi ka ghar hai

kai sayyadaniyan kheme mein hain parde wali

jin ka rutba hai zamane mein har ik par hali

ab na waris koi sar par hai, na kawi wali

un ko dijo! koi rah jae jo khema khali

ye nabi zadiyan be parda na huin jis mein

ek gosha ho ke sab baith ke roen jis mein

sun ke in baton ka aada ne diya jo ke jawab

gar likhun us ko to ho jae jigar sang ka ab

qalb tharra gaya har gaz na rahi zabt ki tab

dekh kar rah gae gardun ko, shah-e-arsh-e-janab

ashk khali use karte hain jo dil bhar ae

ap rone ke liye kheme ke dar par ae

tham ke chillae ke ai zinib-o-um-e-kulsum

tum se rukhsat ko phir aya hai hasin-e-mazlum

a mire qatl ke darpe hai ye sab lashkar-e-shum

han jagado use ghash ho jo sakina maasum

nahin milta jo zamane se guzar jata hai

kah do abid se ke marne ko pidar jata hai

ye sada sun ke haram kheme se, muztar daure

shah ki awaz pe sab be kis-o-be par daure

gar paren sar se ridaen to khule sar daure

bachche rote hue maon ke barabar daure

ro ke chillai sakina shah wala ao!

main tumhen dhundti thi, der se baba ao!

ao achchhe mire baba, mein tumhari wari

dekho tum ban hain gale tak mire ansu jari

aj ye kya hai ke bhule mire khatir dari

hath phaila ke kaho! a miri beti pyari

munh chhupane ki hai kya wajh na sharmao tum

ab main pani bhi na mangungi, chale ao tum

dekh kar parda se ye kahne lagi, zenbi zar

ibn-e-zahra tiri mazlumi-o-ghurbat ke nisar

ao chadar se karun pak, mein chehre ka ghubar

shah ne farmaya, bahan mar gae sab munis-o-yar

tum ne pala tha jise, ham use ro ae hain

ali akbar se jigar band ko kho ae hain

munh dikhaen kise, sab se hai nadamat zinib

ghar mein ane ki nahin, bhai ko mohlat zinib

khinch lai hai sakina ki mohabbat zinib

bhai jata hai, dikha do hamen surat zinib

na to sar kholo, na munh pito, na fariyad karo

bhul jao hamen, allah ko ab yad karo

sabr se khush hai khuda, ai miri gham khwar bahan

sahl hojata hai, jo amar ho dushwar bahan

apni man ka hai tariqa, tumhen darkar bahan

phir main kahta hun sakina se khabardar bahan

naz parwar hai mire baad alam us pe na ho

bande kanon se utaro ke sitam us pe na ho

kahiyo abid se ye paigham mira baad salam

ghash the tum phir gae darwaze talak a ke imam

qaid mein phans ke na ghabraiyo ai gul andam

katiyo sabr-o-raza se, safar-e-kofa-o-sham

nao manjdhar mein hai shor-e-talatam jano!

na khuda jata hai, ghar jane aur ab tum jano!

kah ke ye bag phirai taraf-e-lashkar-e-sham

par gaya khema-e-namus-e-nabi mein kohram

ran mein ghore ko urate hue ae jo imam

rob se fauj ke dil hal gae kanpe andam

sar jhuke un ke jo kamil the zaban dani mein

ur gae hosh fasihon ke rajaz khwani mein

tha ye naara ke mohammad ka nawasa hun main

mujh ko pahchano! ke khaliq ka shanasa hun main

zakhmi hone se na marne se harasa hun main

tisra din hai ye garmi mein ke pyasa hun main

chain kya chiz hai, aram kise kahte hain?

us pe shikwa nahin kuchh, sabr use kahte hain

us ka pyara hun jo hai saqi hauz-e-kausar

us ka beta hun, jo hai fateh-e-bab-e-khaibar

us ka farzand hun ki jis ne muhim badr ki sar

us ka dilbar hun main, di jis ko nabi ne dukhtar

sahab-e-takht hue, tegh mili, taj mila

dosh ahmad pe unhen rutba-e-meraj-e-mila

be watan hun na musafir ko satao allah

qatl kyun karte ho tum, kaun sa mera hai gunah

ab na yawar hai koi sath na lashkar na sipah

tum ko lazim hai gharibon pe tarahhum ki nigah

hath aega na inam, na zar paoge

yad rakho! mira sar kat ke pachhtaoge

na bhi khatm hui thi ye musalsal taqrir

hujjat allah ke farzand pe chalne lage tir

chum kar tegh ke qabze ko pukare shabbir

lo khabardar! chamakti hai ali ki shamshir

pisar-e-fateh-e-siffin-o-hunain ata hai

lo safen bandh ke roko to hasin ata hai

lo khincho tegh-e-dusar, fauj pe afat ai

lo hila, qaima-e-arsh, qayamat ai

fath taslim ko, adab ko nusrat ai

fakhr se ghashiya bardari ko shaukat ai

chum lun paon, jalal is tag-o-do mein aya

hath jore hue iqbal jilau mein aya

ap sidhe jo hue rakhsh ne badle tewar

donon ankhen ubal aen ke dare bani-e-shar

thuthani mil gai sine se kya, dum ko chanwar

misl-e-taus ura, gah idhar, gah idhar

dam badam gard-e-nasim-e-sahari phirti thi

jhum kar phirta tha, goya ke pari phirti thi

abr dhalon ka utha tegh-e-do paikar chamki

barq chhupti hai, ye chamki to barabar chamki

su-e-pasti kabhi kaundi, kabhi sar par chamki

kabhi amboh ke andar, kabhi bahar chamki

jis taraf ai wo nagin use daste dekha

menh saron ka saf-e-dushman mein baraste dekha

dhar aisi ki rawan hota hai dhara jaise

ghat wo ghat ke dariya ka kinara jaise

chamak aisi ke hasinon ka ishara jaise

raushni wo ke gire tut ke tara jaise

kaundna barq ka shamshir ki zau mein dekha

kabhi aisa nahin dam kham mah-e-nau mein dekha

ik ishare mein, barabar koi do tha koi char

na piyada koi bachta tha salamat na sawar

barq girti thi ke chalti thi safon par talwar

ghazab allah alaihim ke ayan the asar

maut har ghaul ko barbad kiye jati thi

ag ghere hue dozakh mein liye jati thi

teghen ari hui dhalon ke ure parkale

band sab bhul gae khauf se nezon wale

jo barhe hath sar-e-dast-e-qalam kar dale

tegh kahti thi, ye sab hain mire dekhe bhale

saf ba saf bandh ke nezon ko abas tole hain

aise uqde mire nakhun ne bahut khole hain

jab kabhi jaiza-e-fauj-e-sitam leti hun

maut se rahm na karne ki qasam leti hun

do zabanon se sada kar-e-qalam leti hun

chehre kat chukte hain, lashkar ke to dam leti hun

har taraf ho ke, adam ke safari hote hain

tabaqlen katti hain, chehre nazari hote hain

wo barash wo chamak us ki wo safai us ki

kisi talwar ne tezi nahin pai us ki

us ka bazu jo uraya, to kalai us ki

mil gai jis ke gale se ajal ai us ki

surat-e-marg kisi ne bhi na ate dekha

sar pe chamki to kamar se use jate dekha

kabhi dhalon pe giri aur kabhi talwaron par

paidalon par kabhi ai kabhi aswaron par

kabhi tarkash pe rakha munh, kabhi sofaron par

kabhi sar kat ke a pahunchi kamandaron par

gir ke is ghaul se uthi to is amboh mein thi

kabhi dariya mein, kabhi bar mein, kabhi koh mein thi

kabhi chehra kabhi shana, kabhi paikar kata

kabhi dar ai jigar mein, to kabhi sar kata

kabhi mighfar, kabhi joshan, kabhi baktar kata

tul mein rakib-o-murakkab ka barabar kata

barash-e-tegh ka ghusl, qaf se ta qaf raha

pi gai khun hazaron ka, pe munh saf raha

na ruki khud pe wo, aur na sar par thahri

na kisi tegh pe dam bhar, na sipar par thahri

na jabin par na gale par, na jigar par thahri

kat kar zain ko, ghore ki kamar par thahri

jan ghabra ke tan-e-dushman-e-din se nikli

hath bhar dub ke talwar, zamin se nikli

kat gai, tegh tale jab saf-e-dushman ai

yak bayak fasl-e-firaq-e-sar-o-gardan ai

bigri is tarah larai ke na kuchh ban ai

tegh kya ai ke urti hui nagin ai

ghul tha bhago ke ye hangam thaharne ka nahin

zahr us ka jo charhega to utarne ka nahin

wo chamak us ki, saron ka wo barasna, harso

ghat se tegh ke, ik hashr bapa tha lab-e-jo

ab mein surat-e-atish thi, jala dene ki khu

aur dam barhta tha, piti thi jo aada ka lahu

kabhi joshan, to kabhi sadr-e-kushada kata

jab chali zarbat-e-sabiq se ziyada kata

tan-e-tanha shah-e-din lakh sawaron se lare

be sipar barchhiyon walon ki qataron se lare

surat-e-sher-e-khuda, zulm shiaron se lare

do se ik lar nahin sakta, ye hazaron se lare

gar ho ghalib, to hazaron pe wahi ghalib ho

jo dil-o-jan-e-ali ibn-e-ubi talib ho

tisre faqe mein ye jang, ye hamle ye jidal

pyas wo pyas ke nilam the sarasarlab laal

dhup wo dhup ke sukhe hue the taza nihal

lu wo lu jis ki hararat se pighalte the jabal

sang rezon mein, tab-o-tab thi angaron ki

sar pe ya dhup thi, ya chhaon thi talwaron ki

sher se the kabhi jangal mein, tirai mein kabhi

dhal ko chehre pe roka na larai mein kabhi

tegh-e-haidar ne kami ki na safai mein kabhi

farq aya na sar-o-tan ki judai mein kabhi

kabhi abru ka bhi aisa na ishara dekha

jis pe ik war kiya us ko dobara dekha

ankh wo ankh ke sheron ki jalalat jis mein

rakhsh wo rakhsh, ke sab barq ki surat jis mein

tegh wo tegh, ayan maut ki surat jis mein

hath wo hath, yad allah ki taqat jis mein

rok le dar, jigar kya kisi be pir ka hai

zor wo, jis mein asar fatima ke sher ka hai

jang mein pyas ka sadma shah-e-din se puchho

tan-e-tanha ki wagha, lashkar-e-kin se puchha

zalzala dasht par afat ka, zamin se puchho

zarb-e-shamshir-e-do sar, ruh-e-amin se puchho

bap is fauj mein tanha, pisar is lashkar mein

karbala mein ye talatum hua, ya khaibar mein

asad allah ke sadqe, shah-e-wala ke nisar

wahi hamle the, wahi zor, wahi thi talwar

fath-e-haidar ne kiya jang mein khaibar ka hisar

morche fauj ke, hazrat ne bhi tore kai bar

kyun na ho ahmad-e-mursal ke nawase the hasin

farq itna tha ke do roz ke pyase the hasin

har taraf fauj mein ghul tha ke dai maula!

ham ne dekhi tire hathon ki safai maula!

alaman khub saza jang ki pai maula!

ap karte hain buron se bhi bhalai maula!

hath ham bandhte hain phenk ke shamshiron ko

bakhshiye ummat-e-na ahl ki taqsiron ko

ati hataf ki ye awaz ke ai arsh-e-maqam

ye wagha tisre faqe mein, bashar ka nahin kam

ai mohammad ke jigar band, imam-e-ibn-e-imam

lauh-e-mahfuz pe marqum hai, sabir tira nam

ab nahin hukm lainon se wagha karne ka

han! yahi waqt hai waade ke wafa karne ka

aj hai athon bahishton ki nai tayyari

nakhl-e-sarsabz hain firdaus mein nahren jari

shab se huren hain mukallal bajoahur sari

khana-e-dost mein hai, dost ki mahandari

peshwai ko rasul alssaqalain ate hain

arsh tak shor yahi hai ke hasin ate hain

tham gae sun ke ye awaz shah-e-jin-o-bashar

rok kar tegh ko farmaya ke hazir hai ye sar

eid ho jald agar zabh karen bani-e-shar

shimr-e-azlam hai kidhar? khinch ke ae khanjar

hai wo ashiq jo fida hone ko maujud rahe

bas miri fath yahi hai ke wo khushnud rahe

kah ke ye miyan mein maula ne rakhi tegh-e-do dam

hath utha kar ye ishara kiya ghore ko ke tham

rah gaya sar ko jhuka kar faras-e-tez qadam

char janib se musafir pe chale tir-e-sitam

neze yun gard the jise gul-e-tar kharon mein

ghar gae sibt-e-nabi, zulm ki talwaron mein

pahle tiron se kamandaron ne chhati chhani

neze pahlu pe lagate the sitam ke bani

sar pe talwaren chalen, zakhmi hui peshani

khun se tar ho gaya hazrat ka rukh-e-nurani

jism sab chur tha, purze the zira jame ke

pech kat kat ke khule jate the ammame ke

barchhiyan marte the, ghat pe jo the pahre

kis taraf jae, kahan teghon mein bekas thahre

ek hazar aur koi so zakhm the tan par gahre

dekhne walon ke ho jate the, pani zahre

khun mein duba hua wo mushaf-e-rukh sara tha

juzw har ik tan-e-shabbir ka si para tha

hath se bag juda thi, to rikabon se qadam

ghash mein sidhe kabhi hote the faras par kabhi kham

bahte the pahluon se, khun ke darere paiham

koi bekas ka madadgar na tha hae sitam

mare talwaron ke mohlat thi na dam lene ki

koshishen hoti thin kaabe ke giradene ki

dasht se ati thi zahra ki sada ha-e-hasin

mere bekas, mere be bas, mire dukh pae hasin

dar se chillati thi zinib mire man jae hasin

kaun teghon se bacha kar tujhe le ae hasin

fatima ro rahi hain, hathon se pahlu thame

hukm gar ho to bahan daur ke bazu thame

hae sida tira tan aur sitam ke bhale

kis ko chillaun ke jite nahin marne wale

us pe ye zulm dukhon se jise zahra pale

kaun sar se tire talwaron ki afat tale

kaun fariyad sune be sar-o-samanon ki

yan to basti bhi nahin koi musalmanon ki

na raha jab ke thaharne ka faras par yara

garpara khak pe, wo arsh-e-khuda ka tara

ghash se kuchh der mein chaunka jo ali ka pyara

neza sine pe, sinan ibn-e-uns ne mara

wan to neze ki ani pusht se bahar nikli

yan bahan kheme ki dewrhi se khule sar nikli

khinch kar sine se neza jo hata dushman-e-din

jhuk ke hazrat ne rakhi khak pe sajde mein jabin

tez karta hua khanjar ko barha shimr lain

asman hal gae tharra gai maqtal ki zamin

kya kahun tegh ko kis tarah gale par rakha

paon quran pe rakha, halq pe khanjar rakha

dhanp kar hathon se munh bint-e-ali chillai

zabh hote ho mire samne hai hai bhai

zarb-e-awwal thi ke takbir ki awaz ai

gir pari khak pe ghash kha ke ali ki jai

ankh kholi thi ke hangama-e-mahshar dekha

sar uthaya to sar-e-shah ko sinan par dekha

ro ke chillai ke hai hai hamre mazlum hasin

fauj-e-aada mein, tire qatl ki hai dhum hasin

kuchh mujhe ankhon se hota nahin maalum hasin

hae mein rah gai didar se mahrum hasin

mur ke dekho ke musibat mein pari hun bhai

nange sar balwo-e-aada mein khari hun bhai

bas unnis age na likh zinib-e-nashad ke bain

qatl ho jane pe bhi dhup mein thi lash-e-hasin

qabr mein bhi na mila ahmad-e-mukhtar ko chain

ghar jala, qaid hui, al-e-rasul alssaqalain

kitne ghar shah ke mar jane se barbad hue

lut gae yun ke na sadat phir abad hue