نمود و بود کو عاقل حباب سمجھے ہیں

نمود و بود کو عاقل حباب سمجھے ہیں

وہ جاگتے ہیں جو دنیا کو خواب سمجھے ہیں

کبھی برا نہیں جانا کسی کو اپنے سوا

ہر ایک ذرے کو ہم آفتاب سمجھے ہیں

عجب نہیں ہے جو شیشوں میں بھر کے لے جائیں

ان آنسوؤں کو فرشتے گلاب سمجھے ہیں

زمانہ ایک طرح پر کبھی نہیں رہتا

اسی کو اہل جہاں انقلاب سمجھے ہیں

انہیں کو دار بقا کی ہے پختگی کا خیال

جو بے ثباتی دہر خراب سمجھے ہیں

شباب کھو کے بھی غفلت وہی ہے پیروں کو

سحر کی نیند کو بھی شب کا خواب سمجھے ہیں

لحد میں آئیں نکیرین آئیں بسم اللہ

ہر اک سوال کا ہم بھی جواب سمجھے ہیں

اگر غرور ہے اعدا کو اپنی کثرت پر

تو اس حیات کو ہم بھی حباب سمجھے ہیں

نہ کچھ خبر ہے حدیثوں کی ان سفیہوں کو

نہ یہ معانی ام الکتاب سمجھے ہیں

کبھی شقی متمتع نہ ہوں گے دنیا سے

جسے یہ آب اسے ہم سراب سمجھے ہیں

مزیل عقل ہے دنیا کی دولت اے منعم

اسی کے نشے کو صوفی شراب سمجھے ہیں

حرارتیں ہیں مآل حلاوت دنیا

وہ زہر ہے جسے ہم شہد ناب سمجھے ہیں

انیسؔ مخمل و دیبا سے کیا فقیروں کو

اسی زمین کو ہم فرش خواب سمجھے ہیں

numud-o-bud ko aqil habab samjhe hain

wo jagte hain jo duniya ko khwab samjhe hain

kabhi bura nahin jana kisi ko apne siwa

har ek zarre ko ham aftab samjhe hain

ajab nahin hai jo shishon mein bhar ke le jaen

un ansuon ko farishte gulab samjhe hain

zamana ek tarah par kabhi nahin rahta

usi ko ahl-e-jahan inqilab samjhe hain

unhen ko dar-e-baqa ki hai pukhtagi ka khayal

jo be sabati dahr kharab samjhe hain

shabab kho ke bhi ghaflat wahi hai pairon ko

sahar ki nind ko bhi shab ka khwab samjhe hain

lahad mein aen nakirain aen bism-e-allah

har ik sawal ka ham bhi jawab samjhe hain

agar ghurur hai aada ko apni kasrat par

to is hayat ko ham bhi habab samjhe hain

na kuchh khabar hai hadison ki in sifihun ko

na ye maani um alkitab samjhe hain

kabhi shaqi mutamatte na honge duniya se

jise ye ab use ham sarab samjhe hain

mazel aql hai duniya ki daulat ai munam

usi ke nashe ko sufi sharab samjhe hain

hararaten hain maal-e-halawat-e-duniya

wo zahr hai jise ham shahd nab samjhe hain

unnis-e-makhmal-o-diba se kya faqiron ko

isi zamin ko ham farsh-e-khwab samjhe hain