نذر دل

اپنے دل کو دونوں عالم سے اٹھا سکتا ہوں میں

کیا سمجھتی ہو کہ تم کو بھی بھلا سکتا ہوں میں

کون تم سے چھین سکتا ہے مجھے کیا وہم ہے

خود زلیخا سے بھی تو دامن بچا سکتا ہوں میں

دل میں تم پیدا کرو پہلے مری سی جرأتیں

اور پھر دیکھو کہ تم کو کیا بنا سکتا ہوں میں

دفن کر سکتا ہوں سینے میں تمہارے راز کو

اور تم چاہو تو افسانہ بنا سکتا ہوں میں

میں قسم کھاتا ہوں اپنے نطق کے اعجاز کی

تم کو بزم ماہ و انجم میں بٹھا سکتا ہوں میں

سر پہ رکھ سکتا ہوں تاج کشور نورانیاں

محفل خورشید کو نیچا دکھا سکتا ہوں میں

میں بہت سرکش ہوں لیکن اک تمہارے واسطے

دل بجھا سکتا ہوں میں آنکھیں بچا سکتا ہوں میں

تم اگر روٹھو تو اک تم کو منانے کے لئے

گیت گا سکتا ہوں میں آنسو بہا سکتا ہوں میں

جذب ہے دل میں مرے دونوں جہاں کا سوز و ساز

بربط فطرت کا ہر نغمہ سنا سکتا ہوں میں

تم سمجھتی ہو کہ ہیں پردے بہت سے درمیاں

میں یہ کہتا ہوں کہ ہر پردہ اٹھا سکتا ہوں میں

تم کہ بن سکتی ہو ہر محفل میں فردوس نظر

مجھ کو یہ دعویٰ کہ ہر محفل پہ چھا سکتا ہوں میں

آؤ مل کر انقلاب تازہ تر پیدا کریں

دہر پر اس طرح چھا جائیں کہ سب دیکھا کریں

apne dil ko donon alam se utha sakta hun main

kya samajhti ho ke tum ko bhi bhula sakta hun main

kaun tum se chhin sakta hai mujhe kya wahm hai

khud zulekha se bhi to daman bacha sakta hun main

dil mein tum paida karo pahle miri si juraten

aur phir dekho ke tum ko kya bana sakta hun main

dafn kar sakta hun sine mein tumhare raz ko

aur tum chaho to afsana bana sakta hun main

main qasam khata hun apne nutq ke ejaz ki

tum ko bazm-e-mah-o-anjum mein bitha sakta hun main

sar pe rakh sakta hun taj-e-kishwar-e-nuraniyan

mahfil-e-khurshid ko nicha dikha sakta hun main

main bahut sarkash hun lekin ik tumhare waste

dil bujha sakta hun main ankhen bacha sakta hun main

tum agar rutho to ik tum ko manane ke liye

git ga sakta hun main ansu baha sakta hun main

jazb hai dil mein mire donon jahan ka soz-o-saz

barbat-e-fitrat ka har naghma suna sakta hun main

tum samajhti ho ke hain parde bahut se darmiyan

main ye kahta hun ke har parda utha sakta hun main

tum ke ban sakti ho har mahfil mein firdaus-e-nazar

mujh ko ye daawa ke har mahfil pe chha sakta hun main

ao mil kar inqilab-e-taza tar paida karen

dahr par is tarah chha jaen ke sab dekha karen