ادا شناس ترا بے زباں نہیں ہوتا

ادا شناس ترا بے زباں نہیں ہوتا

کہے وہ کس سے کوئی نکتہ داں نہیں ہوتا

سب ایک رنگ میں ہیں مے کدے کے خورد و کلاں

یہاں تفاوت پیر و جواں نہیں ہوتا

قمار عشق میں سب کچھ گنوا دیا میں نے

امید نفع میں خوف زیاں نہیں ہوتا

سہم رہا ہوں میں اے اہل قبر بتلا دو

زمیں تلے تو کوئی آسماں نہیں ہوتا

وہ محتسب ہو کہ واعظ وہ فلسفی ہو کہ شیخ

کسی سے بند ترا راز داں نہیں ہوتا

وہ سب کے سامنے اس سادگی سے بیٹھے ہیں

کہ دل چرانے کا ان پر گماں نہیں ہوتا

جو آپ چاہیں کہ لے لیں کسی کا مفت میں دل

تو یہ معاملہ یوں مہرباں نہیں ہوتا

جہاں فریب ہو مجذوبؔ یہ تری صورت

بتوں کے عشق کا تجھ پر گماں نہیں ہوتا

ada shanas tira be zaban nahin hota

kahe wo kis se koi nukta dan nahin hota

sab ek rang mein hain mai kade ke khurd-o-kalan

yahan tafawut pir-o-jawan nahin hota

qimar-e-ishq mein sab kuchh ganwa diya main ne

umid nafa mein khauf-e-ziyan nahin hota

sahm raha hun main ai ahl-e-qabr batla do

zamin tale to koi asman nahin hota

wo mohtasib ho ke waiz wo falsafi ho ke shaikh

kisi se band tira raz dan nahin hota

wo sab ke samne is sadgi se baithe hain

ke dil churane ka un par guman nahin hota

jo ap chahen ke le len kisi ka muft mein dil

to ye muamla yun mehrban nahin hota

jahan fareb ho majzub ye tiri surat

buton ke ishq ka tujh par guman nahin hota