نرگس مستانہ
Jigar Moradabadi (1890–1960)اپنا ہی سا اے نرگس مستانہ بنا دے
میں جب تجھے جانوں مجھے دیوانہ بنا دے
ہر قید سے ہر رسم سے بیگانہ بنا دے
اک برق ادا خرمن ہستی پہ گرا کر
نظروں کو مری طور کا افسانہ بنا دے
ہر دل ہے تری بزم میں لبریز مئے عشق
اک اور بھی پیمانہ سے پیمانہ بنا دے
تو ساقی مے خانہ بھی تو نشہ و مے بھی
میں تشنۂ ہستی مجھے مستانہ بنا دے
اللہ نے تجھ کو مے و مے خانہ بنایا
تو ساری فضا کو مے و مے خانہ بنا دے
تو ساقئ مے خانہ ہے میں رند بلا نوش
میرے لئے مے خانہ کو پیمانہ بنا دے
یا دیدہ و دل میں مرے تو آپ سما جا
یا پھر دل و دیدہ ہی کو ویرانہ بنا دے
قطرے میں وہ دریا ہے جو عالم کو ڈبو دے
ذرے میں وہ صحرا ہے کہ دیوانہ بنا دے
لیکن مجھے ہر قید تعین سے بچا کر
جو چاہے وہ اے نرگس مستانہ بنا دے
عالم تو ہے دیوانہ جگر! حسن کی خاطر
تو اپنے لئے حسن کو دیوانہ بنا دے
کب تک نگہ یار نہ ہوگی متبسم
تو اپنا ہر انداز حریفانہ بنا دے
منکر تو نہ بن حسن کے اعجاز نظر کا
کہنے کے لئے اپنے کو بیگانہ بنا دے
جب تک کرم خاص کا دریا نہ امنڈ آئے
تو اور بھی حال اپنا سفیہانہ بنا دے
بت خانے آ نکلے تو کعبہ کی بنا ڈال
کعبے میں پہنچ جائے تو بت خانہ بنا دے
جو موج اٹھے دل سے ترے جوش طلب میں
سر رکھ کے وہیں سجدۂ شکرانہ بنا دے
جب مائل الطاف نظر آئے وہ خودبیں
تو ہر نگہ شوق کو افسانہ بنا دے
کونین بھی مل جائے تو دامن کو نہ پھیلا
کونین کو بھولا ہوا افسانہ بنا دے
پھر عرض کر اس طرح جگرؔ شوق و ادب سے
بے باک اگر جرأت رندانہ بنا دے
تجھ کو نگہ یار! قسم میرے جنوں کی
ناصح کو بھی میرا ہی سا دیوانہ بنا دے
میں ہوں ترے قدموں میں مجھے کچھ نہیں کہنا
اب جو بھی ترا لطف کریمانہ بنا دے
apna hi sa ai nargis-e-mastana bana de
main jab tujhe janun mujhe diwana bana de
har qaid se har rasm se begana bana de
ik barq ada khirman-e-hasti pe gira kar
nazron ko miri tur ka afsana bana de
har dil hai tiri bazm mein labrez mai-e-ishq
ik aur bhi paimana se paimana bana de
tu saqi-e-mai khana bhi to nasha-o-mai bhi
main tishna-e-hasti mujhe mastana bana de
allah ne tujh ko mai-o-mai khana banaya
tu sari faza ko mai-o-mai khana bana de
tu saqi-e-mai khana hai main rind-e-bala nosh
mere liye mai khana ko paimana bana de
ya dida-o-dil mein mire to ap sama ja
ya phir dil-o-dida hi ko wirana bana de
qatre mein wo dariya hai jo alam ko dubo de
zarre mein wo sahra hai ke diwana bana de
lekin mujhe har qaid-e-taayyun se bacha kar
jo chahe wo ai nargis-e-mastana bana de
alam to hai diwana jigar! husn ki khatir
tu apne liye husn ko diwana bana de
kab tak nigah-e-yar na hogi mutabassim
tu apna har andaz-e-harifana bana de
munkir to na ban husn ke ejaz nazar ka
kahne ke liye apne ko begana bana de
jab tak karam khas ka dariya na umand ae
tu aur bhi hal apna safehana bana de
but khane a nikle to kaaba ki bana dal
kaabe mein pahunch jae to but khana bana de
jo mauj uthe dil se tire josh-e-talab mein
sar rakh ke wahin sajda-e-shukrana bana de
jab mail altaf nazar ae wo khudbin
to har nigah-e-shauq ko afsana bana de
kaunain bhi mil jae to daman ko na phaila
kaunain ko bhula hua afsana bana de
phir arz kar is tarah jigar shauq-o-adab se
be bak agar jurat-e-rindana bana de
tujh ko nigah-e-yar! qasam mere junun ki
naseh ko bhi mera hi sa diwana bana de
main hun tire qadmon mein mujhe kuchh nahin kahna
ab jo bhi tira lutf karimana bana de