نسیم صبح گلشن میں گلوں سے کھیلتی ہوگی

نسیم صبح گلشن میں گلوں سے کھیلتی ہوگی

کسی کی آخری ہچکی کسی کی دل لگی ہوگی

تجھے دانستہ محفل میں جو دیکھا ہو تو مجرم ہوں

نظر آخر نظر ہے بے ارادہ اٹھ گئی ہوگی

مزہ آ جائے گا محشر میں کچھ سننے سنانے کا

زباں ہوگی ہماری اور کہانی آپ کی ہوگی

یہی عالم رہا پردہ نشینی کا تو ظاہر ہے

خدائی آپ سے ہوگی نہ ہم سے بندگی ہوگی

تعجب کیا لگی جو آگ اے سیمابؔ سینے میں

ہزاروں دل میں انگارے بھرے تھے لگ گئی ہوگی

nasim-e-subh gulshan mein gulon se khelti hogi

kisi ki akhiri hichki kisi ki dil lagi hogi

tujhe danista mahfil mein jo dekha ho to mujrim hun

nazar akhir nazar hai be irada uth gai hogi

maza a jaega mahshar mein kuchh sunne sunane ka

zaban hogi hamari aur kahani ap ki hogi

yahi alam raha parda nashini ka to zahir hai

khudai ap se hogi na ham se bandagi hogi

taajjub kya lagi jo ag ai simab sine mein

hazaron dil mein angare bhare the lag gai hogi