نشتر کی نوک دل میں اتارے چلے گئے

نشتر کی نوک دل میں اتارے چلے گئے

ہم یوں عروس غم کو سنوارے چلے گئے

آیا نہ ہاتھ گوشۂ دامان التفات

لیکن فقیر ہاتھ پسارے چلے گئے

قائم رہیں بوصف کرم بھی حدود ناز

دریا کے ساتھ ساتھ کنارے چلے گئے

دل کو تمہیں نے ہاتھ میں لے کر مسل دیا

ہم سادہ دل تمہیں کو پکارے چلے گئے

چلنا رہ حیات پہ دشوار تھا مگر

تیرے متاع غم کے سہارے چلے گئے

آیا ترا خیال مٹے نقش ماسوا

ابھرا افق سے چاند ستارے چلے گئے

محفل کو ناگوار تھی عرض شکست دل

محفل سے اٹھ کے درد کے مارے چلے گئے

ہاں اے زمین گور غریباں جواب دے

کیوں مجھ سے روٹھ کر مرے پیارے چلے گئے

عابدؔ زمانہ ہم کو مٹاتا چلا گیا

ہم نقش زندگی کو ابھارے چلے گئے

nashtar ki nok dil mein utare chale gae

ham yun urus-e-gham ko sanware chale gae

aya na hath gosha-e-daman-e-iltifat

lekin faqir hath pasare chale gae

qaim rahen busaf karam bhi hudud-e-naz

dariya ke sath sath kinare chale gae

dil ko tumhen ne hath mein le kar masal diya

ham sada dil tumhen ko pukare chale gae

chalna rah-e-hayat pe dushwar tha magar

tere mata-e-gham ke sahare chale gae

aya tira khayal mite naqsh-e-masiwa

ubhra ufuq se chand sitare chale gae

mahfil ko nagawar thi arz-e-shikast-e-dil

mahfil se uth ke dard ke mare chale gae

han ai zamin-e-gor-e-ghariban jawab de

kyun mujh se ruth kar mire pyare chale gae

abid zamana ham ko mitata chala gaya

ham naqsh zindagi ko ubhare chale gae