نظر میں آ گئی جب سے جناب کی صورت

نظر میں آ گئی جب سے جناب کی صورت

بدل گئی دل خانہ خراب کی صورت

بھرا ہوا ہے خم دل مئے محبت سے

تمہاری آنکھ ہے جام شراب کی صورت

ہمیشہ ایک ہی حالت نہیں زمانہ کی

ہماری زیست یہاں ہے حباب کی صورت

لگی ہے آگ یہاں تک کسی کی الفت میں

بنے ہیں قلب و جگر بھی کباب کی صورت

نہ جا تو زاہد نادان سوئے مے خانہ

بگڑ نہ جائے کسی دن جناب کی صورت

ہمارے اشک نے رنگ حنا کو مات کیا

بہے ہیں آنکھ سے آنسو شہاب کی صورت

جلا دیا دل مے کش کو میرے ساقی نے

جگر کباب لہو سے شراب کی صورت

بوقت نزع قمرؔ اور لحد کے اندر بھی

ہو میرے پیش نظر بو تراب کی صورت

nazar mein a gai jab se janab ki surat

badal gai dil khana kharab ki surat

bhara hua hai kham-e-dil mai-e-mohabbat se

tumhari ankh hai jam-e-sharab ki surat

hamesha ek hi halat nahin zamana ki

hamari zist yahan hai habab ki surat

lagi hai ag yahan tak kisi ki ulfat mein

bane hain qalb-o-jigar bhi kabab ki surat

na ja to zahid nadan su-e-mai khana

bigar na jae kisi din janab ki surat

hamare ashk ne rang-e-hina ko mat kiya

bahe hain ankh se ansu shahab ki surat

jala diya dil-e-mai kash ko mere saqi ne

jigar kabab lahu se sharab ki surat

boqat-e-nazaa qamar aur lahad ke andar bhi

ho mere pesh-e-nazar bu turab ki surat