ادا میں بانکپن انداز میں اک آن پیدا کر

ادا میں بانکپن انداز میں اک آن پیدا کر

تجھے معشوق بننا ہے تو پوری شان پیدا کر

کہاں کا وصل کیسی آرزو اے دل وہ کہتے ہیں

نہ میں حسرت کروں پوری نہ تو ارمان پیدا کر

ہمارا انتخاب اچھا نہیں اے دل تو پھر تو ہی

خیال یار سے بہتر کوئی مہمان پیدا کر

مجھے ہے رشک اس کو بھی رقیب اپنا سمجھتا ہوں

نہ دیکھے جو تجھے ایسا کوئی دربان پیدا کر

خیال ضبط الفت ہے تو احسنؔ پھر خطر کیسا

نہ دھڑکے دل بھی سینے میں وہ اطمینان پیدا کر

ada mein bankpan andaz mein ik an paida kar

tujhe maashuq banna hai to puri shan paida kar

kahan ka wasl kaisi arzu ai dil wo kahte hain

na main hasrat karun puri na to arman paida kar

hamara intikhab achchha nahin ai dil to phir tu hi

khayal-e-yar se behtar koi mehman paida kar

mujhe hai rashk us ko bhi raqib apna samajhta hun

na dekhe jo tujhe aisa koi darban paida kar

khayal-e-zabt-e-ulfat hai to ahsan phir khatar kaisa

na dharke dil bhi sine mein wo itminan paida kar