نظر سے صفحۂ عالم پہ خونیں داستاں لکھیے

نظر سے صفحۂ عالم پہ خونیں داستاں لکھیے

قلم سے کیا حکایات زمین و آسماں لکھیے

مٹا دے جو فضا کی تیرگی ماحول کی پستی

کوئی ایسا بھی شعر اے شاعران خوش بیاں لکھیے

بپا ہیں ہر جہت میں آتش و آہن کے ہنگامے

کہاں اس دور میں جور و جفائے مہوشاں لکھیے

خطر ہائے رہ مجنوں کا قصہ کیوں بیاں کیجیے

نظر کو ناقۂ لیلیٰ خرد کو سارباں لکھیے

یہی ہیں یادگار غنچہ و گل اس زمانے میں

انہیں سوکھے ہوئے کانٹوں سے ذکر گلستاں لکھیے

بیاں کرنے کو ہے طرز تپاک دوستاں کافی

اب اس دنیا میں کیا رنگ غرور دشمناں لکھیے

روایات کہن میں دل کشی باقی نہیں اخترؔ

نئے انداز سے تاریخ شہر گل رخاں لکھیے

nazar se safha-e-alam pe khunin dastan likhiye

qalam se kya hikayat-e-zamin-o-asman likhiye

mita de jo faza ki tirgi mahaul ki pasti

koi aisa bhi sher ai shayaran khush bayan likhiye

bapa hain har jihat mein atish-o-ahan ke hangame

kahan is daur mein jaur-o-jafa-e-mahwashan likhiye

khatar ha-e-rah-e-majnun ka qissa kyun bayan kijiye

nazar ko naqa-e-laila khirad ko sarban likhiye

yahi hain yadgar-e-ghuncha-o-gul is zamane mein

unhen sukhe hue kanton se zikr-e-gulsitan likhiye

bayan karne ko hai tarz-e-tapak-e-dostan kafi

ab is duniya mein kya rang-e-ghurur-e-dushmanan likhiye

riwayat-e-kuhan mein dil kashi baqi nahin akhtar

nae andaz se tarikh shahr-e-gul rukhan likhiye