نظارہ جو ہوتا ہے لب بام تمہارا

نظارہ جو ہوتا ہے لب بام تمہارا

دنیا میں اچھلتا ہے بہت نام تمہارا

درباں ہے نہ ہے غیر بد انجام تمہارا

کام آئے گا آخر یہی ناکام تمہارا

دشنام سنو دے کے دل اے حسن پرستوں

یہ کام تمہارا ہے وہ انعام تمہارا

آغاز محبت ہے ہو خوش حضرت دل کیا

اچھا نظر آتا نہیں انجام تمہارا

احسنؔ کی طبیعت سے ابھی تم نہیں واقف

ہے دل سے دعا گو سحر و شام تمہارا

nazzara jo hota hai lab-e-bam tumhara

duniya mein uchhalta hai bahut nam tumhara

darban hai na hai ghair bad anjam tumhara

kam aega akhir yahi nakam tumhara

dushnam suno de ke dil ai husn paraston

ye kam tumhara hai wo inam tumhara

aghaz-e-mohabbat hai ho khush hazrat dil kya

achchha nazar ata nahin anjam tumhara

ahsan ki tabiat se abhi tum nahin waqif

hai dil se dua go sahar-o-sham tumhara