ادھر آ کر شکار افگن ہمارا

ادھر آ کر شکار افگن ہمارا

مشبک کر گیا ہے تن ہمارا

گریباں سے رہا کوتہ تو پھر ہے

ہمارے ہاتھ میں دامن ہمارا

گئے جوں شمع اس مجلس میں جتنے

سبھوں پر حال ہے روشن ہمارا

بلا جس چشم کو کہتے ہیں مردم

وہ ہے عین بلا مسکن ہمارا

ہوا رونے سے راز دوستی فاش

ہمارا گریہ تھا دشمن ہمارا

بہت چاہا تھا ابر تر نے لیکن

نہ منت کش ہوا گلشن ہمارا

چمن میں ہم بھی زنجیری رہے ہیں

سنا ہوگا کبھو شیون ہمارا

کیا تھا ریختہ پردہ سخن کا

سو ٹھہرا ہے یہی اب فن ہمارا

نہ بہکے میکدے میں میرؔ کیوں کر

گرو سو جا ہے پیراہن ہمارا

idhar a kar shikar afgan hamara

mushabbak kar gaya hai tan hamara

gareban se raha kotah to phir hai

hamare hath mein daman hamara

gae jun shama is majlis mein jitne

sabhon par hal hai raushan hamara

bala jis chashm ko kahte hain mardum

wo hai ain-e-bala maskan hamara

hawa rone se raz-e-dosti fash

hamara girya tha dushman hamara

bahut chaha tha abr-e-tar ne lekin

na minnat kash hua gulshan hamara

chaman mein ham bhi zanjiri rahe hain

suna hoga kabhu shewan hamara

kya tha rekhta parda sukhan ka

so thahra hai yahi ab fan hamara

na bahke maikade mein mir kyun kar

giro so ja hai pairahan hamara