موت اپنی جان اے دل گردش افلاک کو

موت اپنی جان اے دل گردش افلاک کو

ڈوبنے کا خوف ہے گرداب میں تیراک کو

خود خجل ہو جس کو روشن دل سے ہو ناحق غبار

منہ پہ پڑتی ہے جو منہ پر پھینکتے ہیں خاک کو

مر گئے پر بھی تہ و بالا رہا اپنا غبار

شیشۂ ساعت میں رکھتے ہیں ہماری خاک کو

بستۂ فتراک ہوتے ہیں ہزاروں بلبلیں

جان کر باب گلستاں حلقۂ فتراک کو

کیا عجب گر استخواں روشن ہوں داغ عشق سے

اک شرر شعلہ بناتا ہے خس و خاشاک کو

خوب سا جی کھول کر آوارہ کر اے عشق یار

خوف رسوائی نہیں اصلاً دل بیباک کو

ہجر میں پیتا ہوں خون دل مئے گلگوں کی رنگ

دور ساغر جانتا ہوں گردش افلاک کو

کیا نہیں تعزیر ملتی ہے گناہ عشق کی

آتش فرقت جہنم ہے دل غم ناک کو

کیجئے نالے برنگ بلبل اے دل گر کبھی

ٹکڑے ٹکڑے مثل گل کر لے تیری پوشاک کو

روند ڈالا ہے زمین شعر سے تا چرخ فکر

روک لے عرشؔ اب عنان توسن چالاک کو

maut apni jan ai dil gardish-e-aflak ko

dubne ka khauf hai girdab mein tairak ko

khud khajil ho jis ko raushan dil se ho nahaq ghubar

munh pe parti hai jo munh par phenkte hain khak ko

mar gae par bhi tah-o-bala raha apna ghubar

shisha-e-saat mein rakhte hain hamari khak ko

basta-e-fitrak hote hain hazaron bulbulen

jan kar bab-e-gulistan halqa-e-fitrak ko

kya ajab gar ustukhwan raushan hun dagh-e-ishq se

ik sharar shola banata hai khas-o-khashak ko

khub sa ji khol kar awara kar ai ishq-e-yar

khauf-e-ruswai nahin aslan dil-e-bebak ko

hijr mein pita hun khun-e-dil mai gulgun ki rang

daur-e-saghar janta hun gardish-e-aflak ko

kya nahin taazir milti hai gunah-e-ishq ki

atish-e-furqat jahannam hai dil-e-gham nak ko

kijiye nale barang-e-bulbul ai dil gar kabhi

tukre tukre misl-e-gul kar le teri poshak ko

raund dala hai zamin-e-sher se ta charkh-e-fikr

rok le arsh ab inan-e-tosun-e-chalak ko