منہ نہ ڈھانکو اب تو صورت دیکھ لی

منہ نہ ڈھانکو اب تو صورت دیکھ لی

دیکھ لی اے حور طلعت دیکھ لی

شکل بدلی اور صورت ہو گئی

اک نظر جس نے وہ صورت دیکھ لی

ایک بت سجدہ نہیں کرتا تجھے

بس خدایا تیری قدرت دیکھ لی

ہے عیاں حال سگ اصحاب کہف

جانور کی آدمیت دیکھ لی

چار دن بھی تو نہ تم سے نبھ سکی

آپ کی صاحب سلامت دیکھ لی

جانتے تھے ہم نہ ایذا ہجر کی

وہ بھی صاحب کی بدولت دیکھ لی

گھورتے ہیں اب نگاہ قہر سے

چار دن چشم عنایت دیکھ لی

کیوں اجل اب زہر پسواتا ہوں میں

راہ تیری ایک مدت دیکھ لی

کھل گئی بندے پہ قدر و منزلت

تھی جو صاحب کی حقیقت دیکھ لی

جا کے گھر جھوٹوں نہ پوچھی بات تک

بس تری جھوٹی محبت دیکھ لی

اس سے کہہ عادت سے جو واقف نہ ہو

دیکھ لی خو تیری خصلت دیکھ لی

بحر ہستی میں فقط مثل حباب

ہے مجھے اک دم کی مہلت دیکھ لی

آپ حیراں ہوگا اپنے حسن کا

آئینہ میں گر وہ صورت دیکھ لی

چاندنی راتوں میں چلاتا پھرا

چاند سی جس نے وہ صورت دیکھ لی

پھر وہی ہے بوریا اور اپنا فقر

چار دن کی جاہ و حشمت دیکھ لی

کیوں چراتا ہے وہ کافر مجھ سے آنکھ

کیا نگاہ چشم حسرت دیکھ لی

یاد آیا رندؔ وہ پیماں شکن

گر کہیں باہم محبت دیکھ لی

munh na dhanko ab to surat dekh li

dekh li ai hur talat dekh li

shakl badli aur surat ho gai

ik nazar jis ne wo surat dekh li

ek but sajda nahin karta tujhe

bas khudaya teri qudrat dekh li

hai ayan hal-e-sag-e-ashab-e-kahf

janwar ki admiyyat dekh li

char din bhi to na tum se nibh saki

ap ki sahab salamat dekh li

jante the ham na iza hijr ki

wo bhi sahab ki badaulat dekh li

ghorate hain ab nigah-e-qahr se

char din chashm-e-inayat dekh li

kyun ajal ab zahr piswata hun main

rah teri ek muddat dekh li

khul gai bande pe qadar-o-manzilat

thi jo sahab ki haqiqat dekh li

ja ke ghar jhuton na puchhi bat tak

bas tiri jhuti mohabbat dekh li

us se kah adat se jo waqif na ho

dekh li khu teri khaslat dekh li

bahr-e-hasti mein faqat misl-e-habab

hai mujhe ik dam ki mohlat dekh li

ap hairan hoga apne husn ka

aina mein gar wo surat dekh li

chandni raton mein chillata phira

chand si jis ne wo surat dekh li

phir wahi hai boriya aur apna faqr

char din ki jah-o-hashmat dekh li

kyun churata hai wo kafir mujh se ankh

kya nigah-e-chashm-e-hasrat dekh li

yad aya rind wo paiman shikan

gar kahin baham mohabbat dekh li