منہ چھپاؤ نہ تم نقاب میں جان

منہ چھپاؤ نہ تم نقاب میں جان

یوں ہی عاشق کی ہے عذاب میں جان

جوں سی چٹکی میں لے کے مل ڈالی

ہم سے عاشق کی ہے عذاب میں جان

خوبیٔ حسن نے تری نہ رکھی

باقی اک ذرہ شیخ و شاب میں جان

کس کی زلفوں کے پیچ و تاب سے ہے

رات دن میری پیچ و تاب میں جان

سخت مشتاق ہے تمہارا دل

منہ دکھاؤ کبھی تو خواب میں جان

ایک دن تم نے کی نہ بات کبھو

مر گئے ہم تو اس حجاب میں جان

نت ترے انتظار غسل سے ہے

بحر کے دیدۂ حباب میں جان

مہ نے اے شہسوار عرصۂ حسن

عاقبت دی تری رکاب میں جان

اس نے بھر کر نگاہ دیکھا تھا

نہیں اس دن سے آفتاب میں جان

سر آتش جو اشک ریزاں تھا

کسی عاشق کی تھی کباب میں جان

مصحفیؔ تھا ز بسکہ عاشق شعر

مرتے مرتے رہی کتاب میں جان

munh chhupao na tum naqab mein jan

yun hi ashiq ki hai azab mein jan

jun si chutki mein le ke mil dali

ham se ashiq ki hai azab mein jan

khubi-e-husn ne tiri na rakhi

baqi ik zarra shaikh-o-shab mein jan

kis ki zulfon ke pech-o-tab se hai

rat din meri pech-o-tab mein jan

sakht mushtaq hai tumhara dil

munh dikhao kabhi to khwab mein jan

ek din tum ne ki na bat kabhu

mar gae ham to is hijab mein jan

nit tire intizar ghusl se hai

bahr ke dida-e-habab mein jan

mah ne ai shahsawar-e-arsa-e-husn

aqibat di tiri rikab mein jan

us ne bhar kar nigah dekha tha

nahin us din se aftab mein jan

sar-e-atish jo ashk rezan tha

kisi ashiq ki thi kabab mein jan

mushafi tha ze baske ashiq sher

marte marte rahi kitab mein jan