موج نکہت کی صبا دیکھ سواری تیار

موج نکہت کی صبا دیکھ سواری تیار

خار سے کی ہے گل تر نے کٹاری تیار

کہہ دو مجنوں سے کرے اپنی سواری تیار

آج یاں ہوتی ہے لیلیٰ کی سواری تیار

ہاتھ دونوں کف افسوس کی صورت لکھے

کی جو نقاش نے تصویر ہماری تیار

تیغ کو سان پہ رکھا تھا تبھی قاتل نے

گردن اپنی نہ ہوئی تھی ابھی ساری تیار

لب جاں بخش کی تیرے جو صفا کو دیکھے

آب حیواں ہو پئے آئینہ داری تیار

کس مسی زیب کا گلشن سے سنا ہے جانا

برگ سوسن نے جو پھر کی ہے کٹاری تیار

ہم سبک روح اسیروں کے لیے لازم ہے

قفس گل کو کرے باد بہاری تیار

ہار کیوں اس کے گلے کا میں نہ ہوں زر گر نے

کی ہے زنجیر گلے کی ترے بھاری تیار

اے اجل زیست کا کیا ان سے تو مانگے ہے حساب

جو ہیں ہر دم پئے انفاس شماری تیار

سرخ نیفے سے پئے صید دل بو الہوساں

کمر اس کی ہوئی جوں یوز شکاری تیار

جوں جوں بڑھتے ہیں مرے دست جنوں کے ناخن

ووں ووں ہوتے ہیں پئے سینہ فگاری تیار

پتلیاں جائے ستاروں کی ٹکی ہیں اس میں

دیدہ ریزی سے ہوئی کفش تمہاری تیار

ہو خجل کیونکہ نہ نعماں کہ گلابی لالہ

مے سے کرتی ہے تری چشم خماری تیار

از برائے کمر نازک رشک رگ گل

باغباں کیجو تو پھولوں کی کٹاری تیار

لکھ بہ تبدیل قوافی غزل اک مصحفیؔ اور

نافۂ نقطہ سے کر مشک تتاری تیار

mauj-e-nikhat ki saba dekh sawari tayyar

khar se ki hai gul-e-tar ne katari tayyar

kah do majnun se kare apni sawari tayyar

aj yan hoti hai laila ki sawari tayyar

hath donon kaf-e-afsos ki surat likhe

ki jo naqqash ne taswir hamari tayyar

tegh ko san pe rakha tha tabhi qatil ne

gardan apni na hui thi abhi sari tayyar

lab-e-jan bakhsh ki tere jo safa ko dekhe

ab-e-haiwan ho piye aina dari tayyar

kis missi zeb ka gulshan se suna hai jana

barg-e-sosan ne jo phir ki hai katari tayyar

ham subuk ruh asiron ke liye lazim hai

qafas-e-gul ko kare bad-e-bahari tayyar

har kyun us ke gale ka main na hun zar gar ne

ki hai zanjir gale ki tire bhari tayyar

ai ajal zist ka kya un se to mange hai hisab

jo hain har dam piye anfas shumari tayyar

surkh nefe se piye said-e-dil-e-bu ilahosan

kamar us ki hui jun yoz shikari tayyar

jun jun barhte hain mire dast-e-junun ke nakhun

wun wun hote hain piye sina figari tayyar

putliyan jae sitaron ki tiki hain is mein

dida rezi se hui kafsh tumhari tayyar

ho khajil kyunke na noman ke gulabi lala

mai se karti hai tiri chashm-e-khumari tayyar

az bara-e-kamar-e-nazuk rashk-e-rag-e-gul

baghban kijo to phulon ki katari tayyar

likh ba tabdil quufi ghazal ik mushafi aur

nafa-e-nuqta se kar mushk tatari tayyar