Arooz is now on the App Store, for iPhone and iPad. Download →

All poetry

ادھر بھی آ

Majaz Lakhnawi (1911–1955)

یہ جہد و کشمکش یہ خروش جہاں بھی دیکھ

ادبار کی، سروں پہ گھنی بدلیاں بھی دیکھ

یہ توپ یہ تفنگ یہ تیغ و سنان بھی دیکھ

او کشتۂ نگار دل آرا ادھر بھی آ

آ، اور بگل کا نغمۂ جاں آفریں بھی سن

آ، بے کسوں کا نالۂ اندوہ کیں بھی سن

آ، باغیوں کا زمزمۂ آتشیں بھی سن

او مست ساز و بربط و نغمہ ادھر بھی آ

تقدیر کچھ ہو، کاوش تدبیر بھی تو ہے

تخریب کے لباس میں تعمیر بھی تو ہے

ظلمات کے حجاب میں تنویر بھی تو ہے

آ منتظر ہے عشرت فردا ادھر بھی آ