منہ ڈھانپ کے میں جو رو رہا ہوں

منہ ڈھانپ کے میں جو رو رہا ہوں

اک پردہ نشیں کا مبتلا ہوں

کیا ہجر میں ناتواں ہوا ہوں

تنکا نہ اٹھے وہ کہربا ہوں

تیری سی نہ بو کسی میں پائی

سارے پھولوں کو سونگھتا ہوں

بلبل ہے چمن میں ایک ہم درد

میں بھی کسی گل کا مبتلا ہوں

آئینہ ہے جسم صاف اس کا

کیونکر نہ کہے میں خود نما ہوں

کہتا ہے یہ مشتری فلک پر

یوسف ترے ہاتھ میں بکا ہوں

رخسار وہ رکھ کے سو گیا تھا

گل تکیوں کو روز سونگھتا ہوں

خط لکھ کے جو ہے تلاش قاصد

مانند قلم میں پھر رہا ہوں

مر جان کہی دیکھ دیکھ وہ ہاتھ

مہندی کی طرح میں پس گیا ہوں

اتنی تو جفائیں کر نہ اے بت

آخر میں بندۂ خدا ہوں

اب تو مجھے غیب داں کہیں سب

میں تیری کمر کو دیکھتا ہوں

گویاؔ ہوں وقت کا سلیماں

پریوں پر حکم کر رہا ہوں

munh dhanp ke main jo ro raha hun

ik parda nashin ka mubtala hun

kya hijr mein natawan hua hun

tinka na uthe wo kohrba hun

teri si na bu kisi mein pai

sare phulon ko sunghta hun

bulbul hai chaman mein ek ham dard

main bhi kisi gul ka mubtala hun

aina hai jism saf us ka

kyunkar na kahe mein khud numa hun

kahta hai ye mushtari falak par

yusuf tire hath mein buka hun

rukhsar wo rakh ke so gaya tha

gul takiyon ko roz sunghta hun

khat likh ke jo hai talash qasid

manind-e-qalam mein phir raha hun

mar jan kahi dekh dekh wo hath

mehndi ki tarah main pas gaya hun

itni to jafaen kar na ai but

akhir mein banda-e-khuda hun

ab to mujhe ghaib dan kahin sab

main teri kamar ko dekhta hun

goya hun waqt ka sulaiman

pariyon par hukm kar raha hun