منہ مرا ایک ایک تکتا تھا

منہ مرا ایک ایک تکتا تھا

اس کی محفل میں میں تماشا تھا

ہم جو تجھ سے پھریں خدا سے پھریں

یاد ہے کچھ یہ قول کس کا تھا

وصل میں بھی رہا فراق کا غم

شام ہی سے سحر کا کھٹکا تھا

اپنی آنکھوں کا کچھ قصور نہیں

حسن ہی دل فریب اس کا تھا

فاتحہ پڑھ رہے تھے وہ جب تک

میری تربت پر ایک میلا تھا

نامہ بر نامہ جب دیا تو نے

کچھ زبانی بھی اس نے پوچھا تھا

اب کچھ اس کا بھی اعتبار نہیں

پہلے دل پر بڑا بھروسا تھا

وہ جو رک رک کے پوچھتے تھے حال

دل میں رہ رہ کے درد اٹھتا تھا

جوٹھا وعدہ بھی اے حفیظؔ ان کا

زندگی کا مری سہارا تھا

munh mira ek ek takta tha

us ki mahfil mein main tamasha tha

ham jo tujh se phiren khuda se phiren

yad hai kuchh ye qaul kis ka tha

wasl mein bhi raha firaq ka gham

sham hi se sahar ka khatka tha

apni ankhon ka kuchh qusur nahin

husn hi dil fareb us ka tha

fatiha parh rahe the wo jab tak

meri turbat par ek maila tha

nama bar nama jab diya tu ne

kuchh zabani bhi us ne puchha tha

ab kuchh us ka bhi etibar nahin

pahle dil par bara bharosa tha

wo jo ruk ruk ke puchhte the hal

dil mein rah rah ke dard uthta tha

jotha waada bhi ai hafiz un ka

zindagi ka miri sahara tha