معجزہ وہ جو مسیحا کا دکھاتے جاتے

معجزہ وہ جو مسیحا کا دکھاتے جاتے

کہہ کے قم قبر سے مردے کو جلاتے جاتے

مرتے دم باغ مدینہ کا نظارا کرتے

دیکھ لیتے چمن خلد کو جاتے جاتے

دیکھ کر نور تجلی کو ترے دیوانے

دھجیاں دامن محشر کی اڑاتے جاتے

بن کے پروانہ مری روح نکلتی تن سے

لو جو اس شمع تجلی سے لگاتے جاتے

اک نظر دیکھتے ہی روئے محمد کی ضیا

غش پہ غش حضرت یوسف کو ہیں آتے جاتے

ہے وہ صحرائے جنوں آپ کے دیوانوں کا

حضرت خضر جہاں ٹھوکریں کھاتے جاتے

ایسا محبوب ہوا کون کہ امت کے لئے

روٹھتے آپ تو اللہ مناتے جاتے

طور پہ حضرت موسیٰ نہ کبھی جل بجھتے

آپ آنکھوں میں جو سرمہ نہ لگاتے جاتے

صف محشر میں الٰہی بہ حضور سرور

نعت پڑھ پڑھ کے یہ شہرت کی مناتے جاتے

mojiza wo jo masiha ka dikhate jate

kah ke qum qabr se murde ko jalate jate

marte dam bagh madina ka nazara karte

dekh lete chaman-e-khuld ko jate jate

dekh kar nur-e-tajalli ko tire diwane

dhajjiyan daman-e-mahshar ki urate jate

ban ke parwana miri ruh nikalti tan se

lo jo is shama tajalli se lagate jate

ik nazar dekhte hi ru-e-mohammad ki ziya

ghash pe ghash hazrat-e-yusuf ko hain ate jate

hai wo sahra-e-junun ap ke diwanon ka

hazrat-e-khizr jahan thokaren khate jate

aisa mahbub hua kaun ke ummat ke liye

ruthte ap to allah manate jate

tur pe hazrat-e-musa na kabhi jal bujhte

ap ankhon mein jo surma na lagate jate

saf-e-mahshar mein ilahi ba huzur-e-surur

naat parh parh ke ye shohrat ki manate jate