معاملات عشق

کچھ حقیقت نہ پوچھو کیا ہے عشق

حق اگر سمجھو تو خدا ہے عشق

عشق ہی عشق ہے نہیں ہے کچھ

عشق بن تم کہو کہیں ہے کچھ

عشق تھا جو رسول ہو آیا

ان نے پیغام عشق پہنچایا

عشق حق ہے کہیں نبی ہے کہیں

ہے محمدؐ کہیں علیؓ ہے کہیں

عشق عالی جناب رکھتا ہے

جبرئیل و کتاب رکھتا ہے

عشق حاضر ہے عشق غائب ہے

عشق ہی مظہر عجائب ہے

عشق کیا کیا مصیبتیں لایا

روز کو رات کرکے دکھلایا

عشق میں لوگ زہر کھاتے ہیں

عشق سے رنگ سبز پاتے ہیں

عشق سر تا قدم امید ہوا

زیر تیغ ستم شہید ہوا

مجھ سے مت پوچھ یہ کنھیں ہے عشق

عشق ہے ان ہی کو جنھیں ہے عشق

عشق سے رنگ زرد ہوتا ہے

عشق سے دل میں درد ہوتا ہے

رہتے ہیں عشق ہی میں مژگاں تر

یہیں دیکھی ہیں آنکھیں آتے بھر

عشق ہی کا خراب ہے کنعاں

عشق ہے ایک خانہ آباداں

عشق لایا ہے آفتیں کیا کیا

اس سے آئیں قیامتیں کیا کیا

قیس کیا رنج کھینچ کھینچ موا

سر پہ فرہاد کے سنا جو ہوا

عشق نے چھاتیاں جلائی ہیں

آگیں کس کس جگہ لگائی ہیں

عشق میں ایک جی کو کھو بیٹھے

ایک آنکھوں کو روکے رو بیٹھے

ایکوں کا جیب تا بہ دامن چاک

ایک ڈالے ہے سر کے اوپر خاک

شان ارفع ہیں جن کی خوار ہیں یاں

عقل والے جنوں شعار ہیں یاں

خستۂ عشق کچھ نہ میرؔ ہوئے

بادشہ عشق میں فقیر ہوئے

کوئی دل تنگ ہو کنویں میں گرا

کوئی ڈوبا کوئی گیا نہ پھرا

جب پتنگا ہوا تھا اس سے داغ

تب دیا جی کو ان نے پیش چراغ

عشق کی فاختہ ستم کش ہے

عشق سے عندلیب دم کش ہے

عشق باعث ہوا وطن چھوٹے

مرغ پکڑے گئے چمن چھوٹے

مایۂ درد و رنج سب ہے عشق

متصل رونے کا سبب ہے عشق

پڑ گئے دل جگر میں آخر چھید

کچھ نہ پایا کنھوں نے عشق کا بھید

اپنی تیغ ستم جو اینچے عشق

جامے بہتوں کے خوں میں کھینچے عشق

عشق سے قمری ہے حریف سرو

مہ سے آنکھیں لڑا رہا ہے تدرو

عشق کے دل فگار سارے ہیں

ان نے کیا کیا جوان مارے ہیں

کہیں حق ناحق ان نے خون کیے

کہیں سر پر کھڑا ہے تیغ لیے

کوئی محو گزاف ہیں اس سے

کہیں میدان صاف ہیں اس سے

اس سے یک جمع نے لیا ہے جوگ

ایک فرقے کا ہے یہ جی کا روگ

ایک کے لب پہ آہ ہے اس سے

ایک کا دن سیاہ ہے اس سے

ایک کا شیوہ اس سے نالہ کشی

ایک کو بے دمی ہے جیسے غشی

ایک ناشاد زندگانی سے

ایکوں کے دل گداز پانی سے

ایک کے پھول گل پہ نالے ہیں

ایک کے جان ہی کے لالے ہیں

ایک نے کوہ اس سے توڑ دیے

ایک تنکا کر ان نے چھوڑ دیے

چپ لگی ہے کسو کو اس کے سبب

بند رہتے نہیں کسو کے لب

کوئی باتیں کرے ہے شوق کے ساتھ

کوئی چپکا ہوا ہے ذوق کے ساتھ

ہے تواجد کسی کو حال کہیں

کہیں نقصان ہے کمال کہیں

ایک محو لباس عریانی

ایک سرگرم دامن افشانی

کسو کا ذکر کوئی ذاکر ہے

کوئی صابر ہے کوئی شاکر ہے

کہیں وسعت کہیں ہے تنگ اوقات

عشق کے ہیں گے مختلف حالات

سیر قابل ہیں اس کے دیوانے

سننے کے گوں ہیں اس کے افسانے

وصل میں جن کے دل رہیں بے جا

فصل ہو تو انھوں کا حال ہو کیا

اس بلا سے مجھے بھی کام ہوا

عاشق زار میرا نام ہوا

قصہ میرا بھی سانحہ ہے عجب

کس پہ گذرا ہے یہ ستم یہ غضب

ایک صاحب سے جی لگا میرا

ان کے عشووں نے دل ٹھگا میرا

ابتدا میں تو یہ رہی صحبت

نام سے ان کے تھی مجھے الفت

خوبی ان کی جو سب کہا کرتے

گوش میرے ادھر رہا کرتے

بخت برگشتہ پھر جو یار ہوئے

اک طرح مجھ سے وے دوچار ہوئے

کیا کہوں طرز دیکھنے کی آہ

دل جگر سے گذر گئی وہ نگاہ

چپکے منھ ان کا دیکھ رہتا میں

جی میں کیا کیا یہ کچھ نہ کہتا میں

وے تو ہر چند اپنے طور کے تھے

پر تصرف میں ایک اور کے تھے

کرتے ظاہر میں احتیاط بہت

مجھ سے بھی رکھتے اختلاط بہت

بات کی طرز میری ہی بھاتی

میری آزردگی نہ خوش آتی

پیار چتون سے پھر نکلنے لگا

دیکھنا دل کو میرے ملنے لگا

کہیں دیکھوں تو بات دیر کہیں

بے دماغ اور بے گمان رہیں

کچھ کچھ آزار مجھ کو دینے لگے

قسم اقسام مجھ سے لینے لگے

میں جو کھاتا قسم تو ہو برہم

کہنے لگتے کہ کیا گدا کی قسم

ایک دو دن میں بعد رفع ملال

لطف سے پوچھتے کہو کچھ حال

جو گذرتی تھی مجھ پہ میں کہتا

یا کوئی اشک آنکھ سے بہتا

دیکھ کر روتے آپ بھی روتے

دل دہی کرتے جب تلک سوتے

ایک مدت تلک یہ صحبت تھی

کبھو الفت کبھو یہ کلفت تھی

رفتہ رفتہ سلوک بیچ آیا

ہاتھ پاؤں کو اپنے لگوایا

گاہ بے گاہ پاؤں پھیلاتے

میری آنکھوں سے تلوے ملواتے

چل کر آتے تھے جب کبھو ایدھر

پاؤں رکھتے تھے میری آنکھوں پر

دیکھنے میں تو پائمالی تھی

حسن سے چال یہ نہ خالی تھی

جلتی چھاتی تو ہوتا میں سائل

کہ ٹک اے سرو ہو ادھر مائل

کف پا رکھیے یاں تو احساں ہے

تیرے پاؤں تلے مری جاں ہے

ہنس کے سینے پہ پاؤں رکھ دیتے

دل مرا یوں بھی ہاتھ میں لیتے

کیا کہوں کیسا قد بالا ہے

قالب آرزو میں ڈھالا ہے

ایک جاگہ سے ایک جاگہ خوب

پیکر نازک اس کے سب محبوب

موے سر ایسے جی بھی کریے نیاز

بل ہی کھایا کرے یہ عمر دراز

اس کے کاکل سے حرف سر نہ کرو

کاکل صبح پر نظر نہ کرو

کچھ بھی نسبت ہے تم کو سودا ہے

کالے کوسوں کی بات کا کیا ہے

اس کی زلفوں میں دل گئے نہ پھرے

رہے سنبل کے پیچ پاچ دھرے

اس جبیں سے ہے دل کی کب جاذب

صبح صادق کے دعوے ہیں کاذب

ویسی بھوئیں کشیدہ بھی ہیں کہیں

یہ کمانیں کسو سے کھنچتی نہیں

پھری پلکوں کی اور سب کی نگاہ

چشم پر میری تیری چشم سیاہ

کہوں چتون کے دیکھنے کے طور

اس قیامت پہ وہ قیامت اور

سطح رخسار آئینے سے صاف

جو نہ ٹھہرے نگہ تو رکھیے معاف

لطف بینی کا فہم ہے دشوار

ایک باریک بینی ہے درکار

کیا جھمکتا ہے ہائے رنگ قبول

جیسے مکھڑا گلاب کا سا پھول

ہے دہن تنگی سے سخن کوتاہ

کچھ نکلتی نہیں سخن کی راہ

اس سے گل کیا چنے کوئی ہمدم

غنچۂ ناشگفتہ سے بھی کم

برگ گل سے زباں ہے نازک تر

پھول جھڑتے ہیں بات بات اوپر

کیا کہوں کم ہیں ایسے شیریں گو

وہ زباں کاش میرے منھ میں ہو

دم بدم سوے گوش اشارۂ صبح

گوہر گوش یا ستارۂ صبح

جب بناگوش ان نے دکھلایا

صبح کا سا سماں نظر آیا

ان لبوں کا مزا لیا سو بھانت

تس کے اوپر ہمارا بھی ہے دانت

تم نہ گل برگ و لعل ناب کہو

بات جب تک نہ ٹھہرے چپکے رہو

کوئی جاں بخش یوں کہے سو کہے

ہم تو مرتے ہی ان لبوں پہ رہے

کنج لب آرزوے جان و دل

آگے چلنا نگاہ کو مشکل

ان لبوں سے جو کوئی کام رکھے

قند و مصری کو کیوں نہ نام رکھے

جو حلاوت انھوں کی کہیے اب

ہم دگر سے جدا نہ ہوویں لب

جب وے کھاتے ہیں بیڑۂ پاں کو

رو نہیں دیتے لعل و مرجاں کو

ایسی ہوتی نہیں ہے سرخ لبی

رنگ گویا ٹپک پڑے گا ابھی

ہو تبسم سے لعل کا دل خوں

ہنستے دیکھا تھا سو مجھے ہے جنوں

نہیں دیکھے مسی ملے دنداں

برق ابر سیہ ہے تب خنداں

کیسے کیسے چمکتی ہے بے تہ

جگ ہنسائی کرے ہے اپنی یہ

بو اگر کیجے اس زنخ کا سیب

جائے سر سے جنون کا آسیب

رہے گردن میں ان کی میرا ہاتھ

یہ تو یارب ہے میرے جی کے ساتھ

بس چلے تو گلے لگا ہی رہوں

تیغ سے پھر جدا کریں تو نہ ہوں

اس میں ہرچند جی کا نقصاں ہے

مدعا اختلاط چسپاں ہے

خوش و پرکار کب پری ان سی

اور ہو تو کہاں ہے ہم جنسی

دیکھے ازبس برآمدہ سینے

ایسا معلوم دل جو یوں چھینے

کیا نظرگاہ کی کروں خوبی

نظریں اٹھتی نہیں یہ محبوبی

شانہ و دست و ساعد و بازو

دلکشی میں تمام یک پہلو

اس کے تو پہلو سے میں ہوکے جدا

درد پہلو سے تنگ دل ہی رہا

ہائے اس سے خدا جدا نہ کرے

دور اس سے جیوں خدا نہ کرے

یوں نہیں سرخ اس کی ہر انگشت

ڈوبی ہیں میرے خون میں یک مشت

وہ کف دست راحت جاں ہے

کاش سینے پہ رکھ دے غم یاں ہے

کیا بیاں خوبی شکم کو کرے

دیکھنے سے کبھو نہ پیٹ بھرے

صدر کے ناحیے سے لے تا ناف

چپ کی جاگہ ہے کیونکے کہیے صاف

اس سے پھر آگے غنچۂ گل ہے

یاں سخن بابت تامل ہے

پردے میں بھی جو کچھ کہا جاوے

آپ سے تو نہ ٹک رہا جاوے

گئی نظروں سے وہ کمر باریک

ہو نہ آنکھوں میں کیوں جہاں تاریک

اور کیا دل زدے کو بات آوے

کہیں یارب شتاب ہاتھ آوے

نازکی اس میاں کی کیا کہیے

بنے تو ہاتھوں میں لیے رہیے

ٹک اگر لچکے تو قیامت ہے

پھر قیامت تلک ندامت ہے

کیوں پڑی ران پر نظر تا ساق

اس بن اب زندگی ہوئی ہے شاق

پاے جاناں سے گفتگو ہے اب

خاک میں ملنے کا یہی ہے ڈھب

وہ قدم کاش فرق سر پر ہو

ساق سیمیں مری کمر پر ہو

وہ کف پا قریب ہو میرے

ٹھوکر اس کی نصیب ہو میرے

پنڈلی نازک ہے شاخ سنبل کی

پشت پا پنکھڑی سی ہے گل کی

یوں نصیبوں سے ہو حنا کا ناؤں

ورنہ ڈوبے ہیں میرے خوں سے پاؤں

ناخن پا حنائی ہیں ایسے

برگ گل پاے سرو ہوں جیسے

ہو خراماں تو اس طرف نگہیں

گل کفش اس کی لوگ دیکھ رہیں

گل و بلبل سبھی تماشائی

آگئے جس طرف بہار آئی

رنگ رفتار دیکھ مجنوں ہو

طرز گفتار جیسے افسوں ہو

سر سے پاؤں تلک وہ محبوبی

ساتھ ان خوبیوں کے یہ خوبی

کہ بہت دل ہے آشناے رحم

دردمندوں کو جانے جاے رحم

اب جو ثابت ہوئی ہے میری چاہ

اس کو مدنظر ہے مجھ سے نباہ

طعن و تعریض بیچ میں آئے

کچھ نہ خاطر میں وہ مجھے لائے

رستے میں اک طرف وفا کے لیے

چلے جاتے ہیں مجھ پہ لطف کیے

نہیں آزار کی رواداری

مہرورزی ہے یا وفاداری

پر جو معشوقی آب و گل میں ہے

چھیڑ رکھنے کا شوق دل میں ہے

میں کروں تو کہیں خوش آتا ہے

تیرا آزار جی سے بھاتا ہے

خواہ ناخواہ وہ نہیں منظور

کہ رہے دل شدہ مرا رنجور

یہ بھی شوخی سے ہے گہے گاہے

پر اس انداز سے کہ جی چاہے

ایک دن فرش پر تھا میرا ہاتھ

باتیں کرتے تھے وے بھی میرے ساتھ

پاؤں سے ایک انگلی مل ڈالی

لطف سے درد وہ نہ تھا خالی

درد سے کی جو میں نے بے تابی

دست نازک سے دیر تک دابی

یاد آتے ہیں ایسے لطف جو اب

گذرے ہیں جان غم زدہ پہ غضب

تن بدن دیکھ جی نہ رہتا تھا

میں جو گستاخ ہوکے کہتا تھا

کہ یہ جاگہ تم اس فقیر کو دو

متبسم ہو کہتے وے یہ لو

یہ بھی کیا کیا خیال رکھتے ہیں

آرزوے محال رکھتے ہیں

پھر گھڑی بھر میں کہتے ہو نہ ملول

مار کھانے کی باتیں سب ہیں قبول

جب سلوک ان کا یاد آتا ہے

کیا کہوں جی ہی بھول جاتا ہے

ایک دن پان وے چباتے تھے

سرخ لب ان کے مجھ کو بھاتے تھے

کہہ اٹھا میں اگر اگال مجھے

منھ سے دو تو کرو نہال مجھے

بولے یوں ہی ہے میں کہا ہاں سچ

جھوٹا کھاتے ہیں میٹھے کی لالچ

ہنس کے اس وقت مجھ کو ٹال دیا

پھر اسی رنگ سے اگال دیا

ایسی صدرنگ مہربانی تھی

تب سیہ رو کی زندگانی تھی

اب کے سے رنگ گر فلک لاتا

خاک کے رنگ میں مجھے پاتا

منقبت ایک مجھ سے کہوایا

جس کا میں نے صلہ انھیں پایا

پھر وہی کرتے میں جو کچھ کہتا

ایک پردہ سا بیچ میں رہتا

دوستی رابطہ وفا اخلاص

ساتھ میرے تھا ان کو رابطہ خاص

میں تقاضائی ملنے کا رہتا

مختلط ہونے کو سدا کہتا

میری تسکیں تھی ہر زماں منظور

آپ بھی کرتے ملنے کا مذکور

وصل کے وعدے ہی رہا کرتے

آج کل رات دن کہا کرتے

دل تو تھا رحم آشنا ازبس

کڑھتے تھے جان کر مجھے بے کس

جانتے تھے کہ ہے یہ دل دادہ

سید خستہ خاک افتادہ

دیکھتے مجھ کو جو پریشاں دل

کہتے اے میرؔ کچھ نہیں حاصل

دیکھ ٹک تو ہی تیرا حال ہے کیا

جانے دے اب بھی یہ خیال ہے کیا

آفت جاں ہے دوستی کرنا

کب تلک گھٹ کے اس طرح مرنا

میں جو دیوانہ ان کے رو کا تھا

شیفتہ پیچ دار مو کا تھا

کچھ نہ سمجھی گئی کہن ان کی

اب جدائی جو ہے کٹھن ان کی

یاد کرتا ہوں اور روتا ہوں

وعدہ بن ہی ہلاک ہوتا ہوں

گل روؤں بن جگر ہے داغ کباب

گیسوؤں بن ہے جی کو پیچ و تاب

صورت ان کی خیال میں ہردم

خواب میں جو ہوں وہ مژہ باہم

میں تو بستر پہ دل شکستہ اداس

چاند سا منھ انھوں کا تکیے پاس

میں بچھونے پہ بے خود و بے خواب

ایک پیکر پری کا سا ہم خواب

فرش پر پاؤں یہ غبار آلود

ان میں وے دونوں پا نگارآلود

میں تو افتادہ محو عجز و نیاز

بازو میرے کسو کی بالش ناز

جلتی آنکھوں کنے گل رخسار

جس پہ کچھ بکھرے موے عنبربار

پاس منھ کے وے لال تر نازک

دست گستاخ پر کمر نازک

فرش اس گل بدن سے سب بویا

پھول میں نے بچھائے تھے گویا

شب کٹی صورت خیالی سے

دن کو ہوں میں شکستہ حالی سے

گرچہ روزانہ بھی تصور تھا

لیکن اندوہ سے مکدر تھا

کہیں تصویر سی نظر آئی

کہیں منھ پھیر جیسے شرمائی

کبھی دل ان کے روومو میں رہے

کبھی ملنے کی آرزو میں رہے

صورت حال اور کچھ ہر دم

گاہ لب خشک گاہ مژگاں نم

میں بھی مقدور تک وفا کی ہے

جان غمناک پر جفا کی ہے

برسوں تک میں پھرا ہوں سرگرداں

روز و شب دونوں تھے مجھے یکساں

نے فقط جان سے جہاں سے گیا

زن و فرزند خانماں سے گیا

کیچ پانی ہو مینھ ہو یا برسات

روز روشن ہو یا اندھیری رات

ان تلک میرے تیں پہنچ رہنا

بیٹھے منھ دیکھنا نہ کچھ کہنا

آشنا یار سارے بیگانے

کہ ہوئے میرؔ جی تو دیوانے

رشتۂ ربط انھوں نے توڑ دیا

ملنا جلنا سبھوں نے چھوڑ دیا

نظر آتے نہیں ہیں مدت سے

انس پیدا کیا ہے وحشت سے

صبح ہوتے ہی گھر سے چلتے ہیں

جیسے کھوئے گئے نکلتے ہیں

چلتے جاتے ہیں دیکھتے ہی راہ

پر کہیں کی کہیں پڑے ہے نگاہ

مل گیا جو کوئی تو بچ نکلے

سڑی خبطی دوانے سچ نکلے

شوق سے ان کے حال دیگرگوں

پارہ پارہ دل و جگر سب خوں

رنگ ہر دم مزاج کا کچھ اور

کل کا کچھ اور آج کا کچھ اور

کیا بیاں کریے بے قراری کا

ذکر کیا حال اضطراری کا

جی پڑا ترسے ساتھ سونے کو

دل پریشان جمع ہونے کو

پاس ان کے رہوں تو دل کو قرار

پھر نہ ٹھہرے ٹک ایک کریے ہزار

گئی برباد عزت ان کے لیے

جلف لوگوں نے منھ پہ طعنے دیے

گھورے پر سے جو اٹھ نہ سکتے تھے

وے بھی کناس پوچ بکتے تھے

سفر آیا جو ان کے تیں درپیش

ساتھ اس رنج میں بھی تھا درویش

کیا کہوں جو اذیتیں دیکھیں

ہر قدم پر قیامتیں دیکھیں

جو پڑھے گا تسنگ نامہ یاں

ہوگی ساری حقیقت اس پہ عیاں

یاں نہ تفصیل کرنے کا تھا مقام

کہ محبت سے یاں ہے حرف کلام

بارے کچھ بڑھ گیا ہمارا ربط

ہوسکا پھر نہ دو طرف سے ضبط

تب ہوا بیچ سے یہ رفع حجاب

جب بدن میں رہی نہ مطلق تاب

ایک دن ہم وے متصل بیٹھے

اپنے دل خواہ دونوں مل بیٹھے

شوق کا سب کہا قبول ہوا

یعنی مقصود دل حصول ہوا

واسطے جس کے تھا میں آوارہ

ہاتھ آئی مرے وہ مہ پارہ

گہ گہے دست دی ہم آغوشی

ہم سری ہم کناری ہم دوشی

چند روز اس طرح رہی صحبت

پیار اخلاص رابطہ الفت

کچھ کہوں جو انھوں کی ہو تقصیر

نارسائی تھی طالعوں کی میرؔ

ہوگئے بخت اپنے برگشتہ

پھر کیا آسماں نے سرگشتہ

بات ایسی ہی اتفاق پڑی

کہ ہوئی سر پہ فرقت آن کھڑی

لگی کہنے کہ مصلحت ہے یہ

کتنے روزوں جدا تو مجھ سے رہ

یوں بھی آتا ہے عشق میں درپیش

کہ نشان بلا ہوں الفت کیش

میں اٹھایا نہیں ہے تجھ سے ہاتھ

کڑھیو مت تو ہے میری جان کے ساتھ

اس جدائی کا مجھ کو بھی غم ہے

کیا کروں آبرو مقدم ہے

میں کہوں کیا مجھے نہ اپنا ہوش

جیسے تصویر سامنے خاموش

آنسو آنکھوں میں پر پیے جاؤں

وے کہیں کچھ تو ہاں کیے جاؤں

ان سے رخصت ہوئے جو بعد شام

تیرہ دیکھا جہان کو ہر گام

دل ٹھہرتا نہ تھا ملالت تھی

جان کو رفتگی کی حالت تھی

یوں ہوا ان کے کوچے سے آنا

جیسے ہووے جہان سے جانا

اب جو گھر میں ہوں تو فسردہ سا

چارپائی پہ ہوں تو مردہ سا

جی انھوں میں فسردہ قالب یاں

متحرک ہو کیا تن بے جاں

حال دل کا کہوں جو ہمدم ہو

کروں پیغام کچھ جو محرم ہو

جی میں کچھ آیا رو کے بیٹھ رہا

دل زدہ چپکا ہوکے بیٹھ رہا

کوئی آیا جو واں سے جی آیا

سو نہ آیا کبھی کبھی آیا

دیکھیے چند یوں رہیں گے جدا

چاہے ہے کیا ہمارے حق میں خدا

خون دل کب تلک پئیں گے ہم

رنگ یہ ہے تو کیا جئیں گے ہم

آہ کیا کیا بیاں کروں خوبی

دل دہی حال پرسی محبوبی

تند ہوکر نہ بات کو کہنا

ملتفت حال زار پر رہنا

لطف مبذول حال پر ہر آن

تازہ ہر دم مروت و احسان

لب سے جاں بخش حرف سے دل جو

لطف سے پوچھنا کہ خوش ہے تو

یاد کر روؤں ان کی کون سی بات

کس طرح کاٹوں ہجر کے اوقات

ملنا ان سے ہو پھر گھٹے غم بھی

آئے جیتوں میں جانیے ہم بھی

مدت ہجر اگر تمام ہوئی

ورنہ اپنی تو صبح شام ہوئی

kuchh haqiqat na puchho kya hai ishq

haq agar samjho to khuda hai ishq

ishq hi ishq hai nahin hai kuchh

ishq ban tum kaho kahin hai kuchh

ishq tha jo rasul ho aya

un ne paigham ishq pahunchaya

ishq haq hai kahin nabi hai kahin

hai mohammad kahin ali hai kahin

ishq ali janab rakhta hai

jibrail-o-kitab rakhta hai

ishq hazir hai ishq ghaib hai

ishq hi mazhar-e-ajaib hai

ishq kya kya musibaten laya

roz ko rat karke dikhlaya

ishq mein log zahr khate hain

ishq se rang-e-sabz pate hain

ishq sar ta qadam umid hua

zer-e-tegh-e-sitam shahid hua

mujh se mat puchh ye kanhen hai ishq

ishq hai un hi ko jinhen hai ishq

ishq se rang-e-zard hota hai

ishq se dil mein dard hota hai

rahte hain ishq hi mein mizhgan tar

yahin dekhi hain ankhen ate bhar

ishq hi ka kharab hai kanan

ishq hai ek khana abadan

ishq laya hai afaten kya kiya

us se aen qayamaten kya kiya

qais kya ranj khinch khinch mua

sar pe farhad ke suna jo hua

ishq ne chhatiyan jalai hain

agin kis kis jagah lagai hain

ishq mein ek ji ko kho baithe

ek ankhon ko roke ro baithe

ekon ka jeb ta ba daman-e-chak

ek dale hai sar ke upar khak

shan-e-arfaa hain jin ki khwar hain yan

aql wale junun shiar hain yan

khasta-e-ishq kuchh na mir hue

badshah ishq mein faqir hue

koi dil-e-tang ho kuen mein gira

koi duba koi gaya na phira

jab patanga hua tha us se dagh

tab diya ji ko un ne pesh-e-charagh

ishq ki fakhta sitam kash hai

ishq se andalib dam kash hai

ishq bais hua watan chhote

murgh pakre gae chaman chhote

maya-e-dard-o-ranj sab hai ishq

muttasil rone ka sabab hai ishq

par gae dil jigar mein akhir chhed

kuchh na paya kanhon ne ishq ka bhed

apni tegh-e-sitam jo enche ishq

jame bahuton ke khun mein khinche ishq

ishq se qamari hai harif-e-sarw

mah se ankhen lara raha hai tadro

ishq ke dil figar sare hain

un ne kya kya jawan mare hain

kahin haq nahaq un ne khun kiye

kahin sar par khara hai tegh liye

koi mahw-e-gazuf hain us se

kahin maidan saf hain us se

us se yak jama ne liya hai jog

ek firqe ka hai ye ji ka rog

ek ke lab pe ah hai us se

ek ka din siyah hai us se

ek ka shewa us se nala kashi

ek ko be dami hai jaise ghashi

ek nashad zindagani se

ekon ke dil gudaz pani se

ek ke phul gul pe nale hain

ek ke jan hi ke lale hain

ek ne koh us se tor diye

ek tinka kar un ne chhor diye

chup lagi hai kisu ko us ke sabab

band rahte nahin kisu ke lab

koi baten kare hai shauq ke sath

koi chipka hua hai zauq ke sath

hai tawajud kisi ko hal kahin

kahin nuqsan hai kamal kahin

ek mahw-e-libas-e-uryani

ek sargarm-e-daman afshani

kisu ka zikr koi zakir hai

koi sabir hai koi shakir hai

kahin wusat kahin hai tang auqat

ishq ke hain ge mukhtalif halat

sair qabil hain us ke diwane

sunne ke gun hain us ke afsane

wasl mein jin ke dil rahen be ja

fasl ho to inhon ka hal ho kya

is bala se mujhe bhi kam hua

ashiq-e-zar mera nam hua

qissa mera bhi saneha hai ajab

kis pe gazra hai ye sitam ye ghazab

ek sahab se ji laga mera

un ke ishwon ne dil thaga mera

ibtida mein to ye rahi sohbat

nam se un ke thi mujhe ulfat

khubi un ki jo sab kaha karte

gosh mere idhar raha karte

bakht-e-bargashta phir jo yar hue

ik tarah mujh se we dochar hue

kya kahun tarz dekhne ki ah

dil jigar se guzar gai wo nigah

chupke munh un ka dekh rahta main

ji mein kya kya ye kuchh na kahta main

we to har chand apne taur ke the

par tasarruf mein ek aur ke the

karte zahir mein ehtiyat bahut

mujh se bhi rakhte ikhtilat bahut

bat ki tarz meri hi bhati

meri azurdagi na khush ati

pyar chitwan se phir nikalne laga

dekhna dil ko mere milne laga

kahin dekhun to bat der kahin

be dimagh aur be guman rahen

kuchh kuchh azar mujh ko dene lage

qism aqsam mujh se lene lage

main jo khata qasam to ho barham

kahne lagte ke kya gada ki qasam

ek do din mein baad raf-e-malal

lutf se puchhte kaho kuchh hal

jo guzarti thi mujh pe main kahta

ya koi ashk ankh se bahta

dekh kar rote ap bhi rote

dil dahi karte jab talak sote

ek muddat talak ye sohbat thi

kabhu ulfat kabhu ye kulfat thi

rafta rafta suluk bech aya

hath paon ko apne lagwaya

gah be gah paon phailate

meri ankhon se talwe malwate

chal kar ate the jab kabhu idhar

paon rakhte the meri ankhon par

dekhne mein to paimali thi

husn se chal ye na khali thi

jalti chhati to hota main sail

ke tuk ai sarw ho idhar mail

kaf-e-pa rakhiye yan to ehsan hai

tere paon tale miri jan hai

hans ke sine pe paon rakh dete

dil mira yun bhi hath mein lete

kya kahun kaisa qad-e-bala hai

qalib-e-arzu mein dhala hai

ek jagah se ek jagah khub

paikar-e-nazuk us ke sab mahbub

mue sar aise ji bhi kariye niyaz

bal hi khaya kare ye umr-e-daraz

us ke kakul se harf sar na karo

kakul-e-subh par nazar na karo

kuchh bhi nisbat hai tum ko sauda hai

kale koson ki bat ka kya hai

us ki zulfon mein dil gae na phire

rahe sumbul ke pech pach dhare

is jabin se hai dil ki kab jazib

subh-e-sadiq ke daawe hain kazib

waisi bhuen kashida bhi hain kahin

ye kamanen kisu se khinchti nahin

phiri palkon ki aur sab ki nigah

chashm par meri teri chashm-e-siyah

kahun chitwan ke dekhne ke tur

is qayamat pe wo qayamat aur

sath-e-rukhsar aine se saf

jo na thahre nigah to rakhiye muaf

lutf bini ka fahm hai dushwar

ek barik bini hai darkar

kya jhamakta hai hae rang-e-qubul

jaise mukhra gulab ka sa phul

hai dahan tangi se sukhan kotah

kuchh nikalti nahin sukhan ki rah

us se gul kya chune koi hamdam

ghuncha-e-nashagufta se bhi kam

barg-e-gul se zaban hai nazuk tar

phul jharte hain bat bat upar

kya kahun kam hain aise shirin go

wo zaban kash mere munh mein ho

dam badam siwe gosh ishara-e-subh

gauhar-e-gosh ya sitara-e-subh

jab binagosh un ne dikhlaya

subh ka sa saman nazar aya

un labon ka maza liya so bhant

tis ke upar hamara bhi hai dant

tum na gul barg-o-laal-e-nab kaho

bat jab tak na thahre chupke raho

koi jan bakhsh yun kahe so kahe

ham to marte hi un labon pe rahe

kunj-e-lab arzawe jan-o-dil

age chalna nigah ko mushkil

un labon se jo koi kam rakhe

qand-o-misri ko kyun na nam rakhe

jo halawat inhon ki kahiye ab

ham digar se juda na howen lab

jab we khate hain bera-e-pan ko

ro nahin dete laal-o-marjan ko

aisi hoti nahin hai surkh labi

rang goya tapak parega abhi

ho tabassum se laal ka dil-e-khun

hanste dekha tha so mujhe hai junun

nahin dekhe missi mile dandan

barq-e-abr-e-siyah hai tab khandan

kaise kaise chamakti hai be tah

jag hansai kare hai apni ye

bu agar kije is zanakh ka seb

jae sar se junun ka aseb

rahe gardan mein un ki mera hath

ye to yarab hai mere ji ke sath

bas chale to gale laga hi rahun

tegh se phir juda karen to na hun

is mein harchand ji ka nuqsan hai

muddaa ikhtilat chaspan hai

khush-o-parkar kab pari un si

aur ho to kahan hai ham jinsi

dekhe azbas baramda sine

aisa maalum dil jo yun chhine

kya nazargah ki karun khubi

nazren uthti nahin ye mahbubi

shana-o-dast-o-said-o-bazu

dilkashi mein tamam yak pahlu

us ke to pahlu se main hoke juda

dard-e-pahlu se tang dil hi raha

hae us se khuda juda na kare

dur us se jyun khuda na kare

yun nahin surkh us ki har angusht

dubi hain mere khun mein yak musht

wo kaf-e-dast-e-rahat-e-jan hai

kash sine pe rakh de gham yan hai

kya bayan khubi shikam ko kare

dekhne se kabhu na pet bhare

sadr ke nahaye se le ta naf

chup ki jagah hai kyunke kahiye saf

us se phir age ghuncha-e-gul hai

yan sukhan babat-e-taammul hai

parde mein bhi jo kuchh kaha jawe

ap se to na tuk raha jawe

gai nazron se wo kamar barik

ho na ankhon mein kyun jahan tarik

aur kiya dil zide ko bat awe

kahin yarab shitab hath awe

nazuki is miyan ki kya kahiye

bane to hathon mein liye rahiye

tuk agar lachke to qayamat hai

phir qayamat talak nadamat hai

kyun pari ran par nazar ta saq

is ban ab zindagi hui hai shaq

pae janan se guftugu hai ab

khak mein milne ka yahi hai dhab

wo qadam kash farq-e-sar par ho

saq simin miri kamar par ho

wo kaf-e-pa qarib ho mere

thokar us ki nasib ho mere

pindli nazuk hai shakh sumbul ki

pusht-e-pa pankhuri si hai gul ki

yun nasibon se ho hina ka naun

warna dube hain mere khun se paon

nakhun-e-pa hinai hain aise

barg-e-gul pae sarw hun jaise

ho khiraman to is taraf nighen

gul-e-kafsh us ki log dekh rahen

gul-o-bulbul sabhi tamashai

age jis taraf bahar ai

rang raftar dekh majnun ho

tarz-e-guftar jaise afsun ho

sar se paon talak wo mahbubi

sath in khubiyon ke ye khubi

ke bahut dil hai ashna-e-rahm

dardmandon ko jane jae rahm

ab jo sabit hui hai meri chah

us ko maddinazar hai mujh se nibah

taan-o-taariz bich mein ae

kuchh na khatir mein wo mujhe lae

raste mein ik taraf wafa ke liye

chale jate hain mujh pe lutf kiye

nahin azar ki rawadari

mehrwarzi hai ya wafadari

par jo maashuqi ab-o-gul mein hai

chher rakhne ka shauq-e-dil mein hai

main karun to kahin khush ata hai

tera azar ji se bhata hai

khwah nakhwah wo nahin manzur

ke rahe dil shuda mira ranjur

ye bhi shokhi se hai gahe gahe

par is andaz se ke ji chahe

ek din farsh par tha mera hath

baten karte the we bhi mere sath

paon se ek ungli mil dali

lutf se dard wo na tha khali

dard se ki jo main ne be tabi

dast-e-nazuk se der tak dabi

yad ate hain aise lutf jo ab

gazre hain jan-e-gham zada pe ghazab

tan badan dekh ji na rahta tha

main jo gustakh hoke kahta tha

ke ye jagah tum is faqir ko do

mutabassim ho kahte we ye lo

ye bhi kya kya khayal rakhte hain

arzawe muhal rakhte hain

phir ghari bhar mein kahte ho na malul

mar khane ki baten sab hain qubul

jab suluk un ka yad ata hai

kya kahun ji hi bhul jata hai

ek din pan we chabate the

surkh lab un ke mujh ko bhate the

kah utha mein agar ugal mujhe

munh se do to karo nihal mujhe

bole yun hi hai main kaha han sach

jhuta khate hain mithe ki lalach

hans ke is waqt mujh ko tal diya

phir isi rang se ugal diya

aisi sadrang mehrbani thi

tab siyah ru ki zindagani thi

ab ke se rang gar falak lata

khak ke rang mein mujhe pata

manqabat ek mujh se kahwaya

jis ka main ne sila unhen paya

phir wahi karte mein jo kuchh kahta

ek parda sa bich mein rahta

dosti rabta wafa ikhlas

sath mere tha un ko rabta khas

main taqazai milne ka rahta

mukhtalat hone ko sada kahta

meri taskin thi har zaman manzur

ap bhi karte milne ka mazkur

wasl ke waade hi raha karte

aj kal rat din kaha karte

dil to tha rahm ashna azbas

karhte the jan kar mujhe be kis

jante the ke hai ye dil dada

sayyad-e-khasta khak uftada

dekhte mujh ko jo pareshan dil

kahte ai mir kuchh nahin hasil

dekh tuk tu hi tera hal hai kya

jane de ab bhi ye khayal hai kya

afat-e-jan hai dosti karna

kab talak ghut ke is tarah marna

main jo diwana un ke ro ka tha

shefta pech dar mu ka tha

kuchh na samjhi gai kuhan un ki

ab judai jo hai kathin un ki

yad karta hun aur rota hun

waada ban hi halak hota hun

gul roun ban jigar hai dagh kabab

gesuon ban hai ji ko pech-o-tab

surat un ki khayal mein hardam

khwab mein jo hun wo mizha baham

main to bistar pe dil shikasta udas

chand sa munh inhon ka takiye pas

main bichhaune pe be khud-o-be khwab

ek paikar pari ka sa ham khwab

farsh par paon ye ghubar alud

un mein we donon pa nigaralud

main to uftada mahw-e-ijz-o-niyaz

bazu mere kisu ki balish-e-naz

jalti ankhon kanne gul-e-rukhsar

jis pe kuchh bikhre mue ambarbar

pas munh ke we lal tar nazuk

dast-e-gustakh par kamar nazuk

farsh us gul badan se sab boya

phul main ne bichhae the goya

shab kati surat-e-khayali se

din ko hun main shikasta hali se

garche rozana bhi tasawwur tha

lekin andoh se mukaddar tha

kahin taswir si nazar ai

kahin munh pher jaise sharmai

kabhi dil un ke rowmo mein rahe

kabhi milne ki arzu mein rahe

surat-e-hal aur kuchh har dam

gah lab khushk gah-e-mizhgan nam

main bhi maqdur tak wafa ki hai

jan ghamnak par jafa ki hai

barson tak main phira hun sargardan

roz-o-shab donon the mujhe yaksan

ne faqat jan se jahan se gaya

zan-o-farzand khanuman se gaya

kaich pani ho minh ho ya barsat

roz-e-raushan ho ya andheri rat

un talak mere tin pahunch rahna

baithe munh dekhna na kuchh kahna

ashna yar sare begane

ke hue mir ji to diwane

rishta-e-rabt inhon ne tor diya

milna jalna sabhon ne chhor diya

nazar ate nahin hain muddat se

uns paida kya hai wahshat se

subh hote hi ghar se chalte hain

jaise khoe gae nikalte hain

chalte jate hain dekhte hi rah

par kahin ki kahin pare hai nigah

mil gaya jo koi to bach nikle

sari khabti diwane sach nikle

shauq se un ke hal degragon

para para-e-dil-o-jigar sab khun

rang har dam mizaj ka kuchh aur

kal ka kuchh aur aj ka kuchh aur

kya bayan kariye be qarari ka

zikr kya hal iztirari ka

ji para tarse sath sone ko

dil pareshan jama hone ko

pas un ke rahun to dil ko qarar

phir na thahre tuk ek kariye hazar

gai barbad izzat un ke liye

jalaf logon ne munh pe taane diye

ghore par se jo uth na sakte the

we bhi kannas poch bikte the

safar aya jo un ke tin darpesh

sath is ranj mein bhi tha darwesh

kya kahun jo aziyyaten dekhen

har qadam par qayamaten dekhen

jo parhega tisnag nama yan

hogi sari haqiqat us pe ayan

yan na tafsil karne ka tha maqam

ke mohabbat se yan hai harf-e-kalam

bare kuchh barh gaya hamara rabt

hawaska phir na do taraf se zabt

tab hua bich se ye rafa hijab

jab badan mein rahi na mutlaq tab

ek din ham we muttasil baithe

apne dil khwah donon mil baithe

shauq ka sab kaha qubul hua

yaani maqsud-e-dil husul hua

waste jis ke tha main awara

hath ai mire wo mah para

gah gahe dast di ham aghoshi

ham siri ham kinari ham doshi

chand roz is tarah rahi sohbat

pyar ikhlas rabta ulfat

kuchh kahun jo inhon ki ho taqsir

narasai thi talion ki mir

hogae bakht apne bargashta

phir kya asman ne sargashta

bat aisi hi ittifaq pari

ke hui sar pe furqat an khari

lagi kahne ke maslahat hai ye

kitne rozon juda to mujh se rah

yun bhi ata hai ishq mein darpesh

ke nishan-e-bala hun ulfat kesh

main uthaya nahin hai tujh se hath

karhiyo mat to hai meri jan ke sath

is judai ka mujh ko bhi gham hai

kya karun abru muqaddim hai

main kahun kya mujhe na apna hosh

jaise taswir samne khamosh

ansu ankhon mein par piye jaun

we kahin kuchh to han kiye jaun

un se rukhsat hue jo baad-e-sham

tira dekha jahan ko har gam

dil thaharta na tha malalat thi

jan ko raftagi ki halat thi

yun hua un ke kuche se ana

jaise howe jahan se jana

ab jo ghar mein hun to fasurda sa

charpai pe hun to murda sa

ji inhon mein fasurda qalib yan

mutaharrik ho kya tan-e-be jan

hal-e-dil ka kahun jo hamdam ho

karun paigham kuchh jo mahram ho

ji mein kuchh aya ro ke baith raha

dil zada chipka hoke baith raha

koi aya jo wan se ji aya

so na aya kabhi kabhi aya

dekhiye chand yun rahenge juda

chahe hai kya hamare haq mein khuda

khun-e-dil kab talak piyen ge ham

rang ye hai to kya jiyen ge ham

ah kya kya bayan karun khubi

dil dahi hal parsi mahbubi

tund hokar na bat ko kahna

multafat hal-e-zar par rahna

lutf mabzul hal par har an

taza har dam murawwat-o-ehsan

lab se jan bakhsh harf se dil jo

lutf se puchhna ke khush hai tu

yad kar roun un ki kaun si bat

kis tarah katun hijr ke auqat

milna un se ho phir ghate gham bhi

ae jiton mein janiye ham bhi

muddat-e-hijr agar tamam hui

warna apni to subh sham hui