اداسی چھا گئی چہرے پہ شمع محفل کے

اداسی چھا گئی چہرے پہ شمع محفل کے

نسیم صبح سے شعلے بھڑک اٹھے دل کے

شریک حال نہیں ہے کوئی تو کیا پروا

دلیل راہ محبت ہیں ولولے دل کے

عجب نہیں کہ بپا ہو یہیں سے فتنۂ حشر

زمانے بھر میں ہیں سارے فساد اسی دل کے

نہ سنگ میل نہ نقش قدم نہ بانگ جرس

بھٹک نہ جائیں مسافر عدم کی منزل کے

خوشی کے مارے زمیں پر قدم نہیں رکھتے

جب آئے قافلے والے قریب منزل کے

نظارۂ رخ لیلیٰ مبارک اے مجنوں

نگاہ شوق نے پردے اٹھائے محمل کے

مشاہدے کو اک آئینۂ جمال دیا

کمال عشق نے جوہر دکھا دئے دل کے

زبان یاسؔ سے افسانۂ سحر سنیے

وہ رونا شمع کا پروانوں سے گلے مل کے

udasi chha gai chehre pe sham-e-mahfil ke

nasim-e-subh se shole bharak uthe dil ke

sharik-e-hal nahin hai koi to kya parwa

dalil-e-rah-e-mohabbat hain walwale dil ke

ajab nahin ke bapa ho yahin se fitna-e-hashr

zamane bhar mein hain sare fasad isi dil ke

na sang-e-mel na naqsh-e-qadam na bang-e-jaras

bhatak na jaen musafir adam ki manzil ke

khushi ke mare zamin par qadam nahin rakhte

jab ae qafile wale qarib-e-manzil ke

nazara-e-rukh-e-laila mubarak ai majnun

nigah-e-shauq ne parde uthae mahmil ke

mushahade ko ik aina-e-jamal diya

kamal-e-ishq ne jauhar dikha diye dil ke

zaban yas se afsana-e-sahar suniye

wo rona shama ka parwanon se gale mil ke