آئی بہار دور ہو ساقی شراب کا

آئی بہار دور ہو ساقی شراب کا

دریا بہا دے بزم میں اشک کباب کا

اس آفتاب رخ پہ نظر اپنی پڑتے ہی

شبنم کی طرح اڑ گیا پردہ حجاب کا

کس بے وفا پہ مرتا ہے کیا کیجیے اسے

گھر اور ہو کہیں دل خانہ خراب کا

کرنے تو دو سوال کریں ہیں تو کیا

عاشق ہوں میں بھی اک بت خانہ خراب کا

ہر دم وہ مجھ کو دیکھ کے ابرو چڑھاتے ہیں

پیاسا ہے خنجر ان کا مرے خون ناب کا

قدموں کو چومتا اے صنم آتے جاتے میں

کیوں سنگ میں بنا نہیں تیری جناب کا

صدمے فراق یار کے کیا کم ہیں اے نسیمؔ

محشر میں مجھ کو خوف نہیں کچھ حساب کا

ai bahar dur ho saqi sharab ka

dariya baha de bazm mein ashk-e-kabab ka

is aftab rukh pe nazar apni parte hi

shabnam ki tarah ur gaya parda hijab ka

kis be wafa pe marta hai kya kijiye use

ghar aur ho kahin dil khana kharab ka

karne to do sawal karen hain to kya

ashiq hun main bhi ik but-e-khana kharab ka

har dam wo mujh ko dekh ke abru charhate hain

pyasa hai khanjar un ka mire khun-e-nab ka

qadmon ko chumta ai sanam ate jate mein

kyun sang mein bana nahin teri janab ka

sadme firaq-e-yar ke kya kam hain ai nasim

mahshar mein mujh ko khauf nahin kuchh hisab ka