مصیبتیں تو اٹھا کر بڑی بڑی بھولے

مصیبتیں تو اٹھا کر بڑی بڑی بھولے

مگر فراق کی ایذا نہ اک گھڑی بھولے

نہ ہوگی اس لب رنگیں کی آب و تاب نصیب

نہ اپنے رنگ پہ پھولوں کی پنکھڑی بھولے

کسی نے پیار سے باہیں گلے میں ڈال جو دیں

تمام ہجر کے صدمے ہم اس گھڑی بھولے

ابھی وہ یاد ہیں ساماں ہمیں اسیری کے

ابھی نہ طوق نہ بیڑی نہ ہتھ کڑی بھولے

تمہیں جو دیکھ لیا غم غلط ہوا اپنا

تمہیں جو پا گئے سب رنج اس گھڑی بھولے

بری بلا ہے یہ چشم سیاہ کی گردش

اسے جو دیکھ لے آہو تو چوکڑی بھولے

گری تھی شیخ کی تسبیح میکدے میں رات

خبر نہیں کہ کہاں نشے میں چھڑی بھولے

حفیظؔ وہ دم رخصت یہ کہتے جاتے ہیں

کہ میری یاد نہ دل سے کوئی گھڑی بھولے

musibaten to utha kar bari bari bhule

magar firaq ki iza na ik ghari bhule

na hogi us lab rangin ki ab-o-tab nasib

na apne rang pe phulon ki pankhuri bhule

kisi ne pyar se bahen gale mein dal jo den

tamam hijr ke sadme ham us ghari bhule

abhi wo yad hain saman hamen asiri ke

abhi na tauq na beri na hath kari bhule

tumhen jo dekh liya gham ghalat hua apna

tumhen jo pa gae sab ranj us ghari bhule

buri bala hai ye chashm-e-siyah ki gardish

use jo dekh le ahu to chaukari bhule

giri thi shaikh ki tasbih maikade mein rat

khabar nahin ke kahan nashe mein chhiri bhule

hafiz wo dam-e-rukhsat ye kahte jate hain

ke meri yad na dil se koi ghari bhule