ادا پریوں کی صورت حور کی آنکھیں غزالوں کی

ادا پریوں کی صورت حور کی آنکھیں غزالوں کی

غرض مانگے کی ہر اک چیز ہے ان حسن والوں کی

بجائے رقص مے خانے میں ہے گردش پیالوں کی

تکلف بر طرف یہ بزم ہے اللہ والوں کی

نشاں جب مٹ گیا تربت کا آئے فاتحہ پڑھنے

انہیں کب یاد آئی ہیں وفائیں مرنے والوں کی

ہوا دو گز کفن منعم کو حاصل مال دنیا سے

بندھی رکھی ہی آخر رہ گئی گٹھری دوشالوں کی

دکھا کر دل مرا پھر آپ ہی عذر جفا کرنا

ارے کافر تری اک چال ہے یہ لاکھ چالوں کی

ابھی تم کو بہت کچھ ناز ہے ترچھی نگاہوں پر

مگر دیکھی نہیں تاثیر تم نے میرے نالوں کی

ترے ہوتے ہوئے یہ بات غیرت کی ہے او ظالم

اڑائے آسماں یوں خاک تیری پائمالوں کی

بھلے ہیں یا برے جو کچھ ہیں بندے تو خدا کے ہیں

ندامت اس قدر واعظ نہ کر مے خانے والوں کی

ہوئی بوچھار مجھ پر شکوۂ بے جا کی پھر کیا کیا

جہاں چھیڑا انہیں بس کھل گئی گٹھری ملالوں کی

گنہ گار محبت ہیں جدھر گزریں گے محشر میں

ہمارے ساتھ ساتھ اک بھیڑ ہوگی خوش جمالوں کی

فرشتوں سے حفیظؔ اک دن لحد میں گفتگو ہوگی

ابھی سے فکر لازم ہے تمہیں ان کے سوالوں کی

ada pariyon ki surat hur ki ankhen ghazalon ki

gharaz mange ki har ik chiz hai un husn walon ki

bajae raqs-e-mai khane mein hai gardish pyalon ki

takalluf bar taraf ye bazm hai allah walon ki

nishan jab mit gaya turbat ka ae fatiha parhne

unhen kab yad ai hain wafaen marne walon ki

hawa do gaz kafan munam ko hasil mal duniya se

bandhi rakhi hi akhir rah gai gathri doshalon ki

dikha kar dil mira phir ap hi uzr-e-jafa karna

are kafir tiri ik chal hai ye lakh chalon ki

abhi tum ko bahut kuchh naz hai tirchhi nigahon par

magar dekhi nahin tasir tum ne mere nalon ki

tire hote hue ye bat ghairat ki hai o zalim

urae asman yun khak teri paimalon ki

bhale hain ya bure jo kuchh hain bande to khuda ke hain

nadamat is qadar waiz na kar mai khane walon ki

hui bauchhar mujh par shikwa-e-be ja ki phir kya kya

jahan chhera unhen bas khul gai gathri malalon ki

gunah gar-e-mohabbat hain jidhar guzrenge mahshar mein

hamare sath sath ik bhir hogi khush jamalon ki

farishton se hafiz ik din lahad mein guftugu hogi

abhi se fikr lazim hai tumhen un ke sawalon ki