مچھر اور مچھرانیاں

ٹوٹی پھوٹی موری میں اک مچھر صاحب رہتے ہیں

شاید وہ گھر میں بھی اپنے مچھر ہی کہلاتے ہیں

بیویاں ان کی چار عدد ہیں مچھرانی کہلاتی ہیں

موری والے گھر میں ہی جی چاروں سے بہلاتے ہیں

اک دن وہ گھر سے نکلے تو واپس آنا بھول گئے

میں تو جانوں اسی طرح سے روز کہیں اڑ جاتے ہیں

بیویاں ان کی چپ بیٹھی تھیں لیکن فکر تھی سب کو ہی

چاروں آپس میں کہتی تھیں اب آتے اب آتے ہیں

پہلی بولی سچ کہتی ہوں میں عادت سے واقف ہوں

آڑے ترچھے اڑتے وہ اب بین بجاتے آتے ہیں

دوسری بولی سچ کہتی ہوں میں عادت سے واقف ہوں

لال کھٹولا ہرے بھرے تکیے ان پر لوٹ لگاتے ہیں

تیسری بولی سچ کہتی ہوں میں عادت سے واقف ہوں

کوڑا گھر کے خمیر کے اوپر رہ رہ کر منڈلاتے ہیں

چوتھی بولی سچ کہتی ہوں میں عادت سے واقف ہوں

باسی باسی پھلوں کے رس میں خوش ہو ہو کے نہاتے ہیں

tuti phuti mori mein ik machchhar sahab rahte hain

shayad wo ghar mein bhi apne machchhar hi kahlate hain

biwiyan un ki char adad hain machchharani kahlati hain

mori wale ghar mein hi ji charon se bahlate hain

ik din wo ghar se nikle to wapas ana bhul gae

main to janun isi tarah se roz kahin ur jate hain

biwiyan un ki chup baithi thin lekin fikr thi sab ko hi

charon apas mein kahti thin ab ate ab ate hain

pahli boli sach kahti hun main adat se waqif hun

are tirchhe urte wo ab bain bajate ate hain

dusri boli sach kahti hun main adat se waqif hun

lal khatola hare bhare takiye un par laut lagate hain

tisri boli sach kahti hun main adat se waqif hun

kora ghar ke khamir ke upar rah rah kar mandlate hain

chauthi boli sach kahti hun main adat se waqif hun

basi basi phalon ke ras mein khush ho ho ke nahate hain