مچلتی ہے مرے سینے میں تیری آرزو کیا کیا

مچلتی ہے مرے سینے میں تیری آرزو کیا کیا

لیے پھرتی ہے تیری چاہ مجھ کو کو بہ کو کیا کیا

رہی ہے بعد مردن بھی تمہاری جستجو کیا کیا

غبار خاک مرقد اڑ رہا ہے چار سو کیا کیا

کبھی عاشق کو سمجھایا کبھی غیروں کو بہلایا

فریب آمیز ہیں چالیں تری او حیلہ جو کیا کیا

رہائی دی مجھے قید علائق سے عنایت کی

کسی کی تیغ کا ممنون ہے میرا گلو کیا کیا

بہاریں لوٹتا ہوں آپ کے تشریف لانے میں

پھلا پھولا ہے میرا آج نخل آرزو کیا کیا

تمہیں بھی یاد ہیں کچھ قول و اقرار و قسم اپنے

ہوئی تھی درمیاں میرے تمہارے گفتگو کیا کیا

خیال ہجر سے حالت تغیر ہوتی جاتی ہے

اڑا جاتا ہے میرے دل سے رنگ آرزو کیا کیا

تمہارے واسطے سن لیتے ہیں ہر ایک کی باتیں

ہمیں کہہ جاتے ہیں باتوں ہی باتوں میں عدو کیا کیا

عدو کی منتیں کی ہیں قدم چومے ہیں درباں کے

فروغؔ بے سر و ساماں ہوا بے آبرو کیا کیا

machalti hai mire sine mein teri arzu kya kya

liye phirti hai teri chah mujh ko ku ba ku kya kya

rahi hai baad murdan bhi tumhari justuju kya kya

ghubar-e-khak-e-marqad ur raha hai char su kya kya

kabhi ashiq ko samjhaya kabhi ghairon ko bahlaya

fareb amez hain chalen tiri o hila jo kya kya

rihai di mujhe qaid-e-alaiq se inayat ki

kisi ki tegh ka mamnun hai mera galo kya kya

baharen lautta hun ap ke tashrif lane mein

phala phula hai mera aj nakhl-e-arzu kya kya

tumhen bhi yad hain kuchh qaul-o-iqrar-o-qasam apne

hui thi darmiyan mere tumhare guftugu kya kya

khayal-e-hijr se halat taghayyur hoti jati hai

ura jata hai mere dil se rang-e-arzu kya kya

tumhare waste sun lete hain har ek ki baten

hamen kah jate hain baton hi baton mein adu kya kya

adu ki minnaten ki hain qadam chume hain darban ke

farogh-e-be sar-o-saman hua be abru kya kya