موے سہتے سہتے جفا کاریاں

موے سہتے سہتے جفا کاریاں

کوئی ہم سے سیکھے وفاداریاں

ہماری تو گزری اسی طور عمر

یہی نالہ کرنا یہی زاریاں

فرشتہ جہاں کام کرتا نہ تھا

مری آہ نے برچھیاں ماریاں

گیا جان سے اک جہاں لے کے شوخ

نہ تجھ سے گئیں یہ دل آزاریاں

کہاں تک یہ تکلیف ما لا یطاق

ہوئیں مدتوں ناز برداریاں

خط و کاکل و زلف و انداز و ناز

ہوئیں دام رہ صد گرفتاریاں

کیا درد و غم نے مجھے ناامید

کہ مجنوں کو یہ ہی تھیں بیماریاں

تری آشنائی سے ہی حد ہوئی

بہت کی تھیں دنیا میں ہم یاریاں

نہ بھائی ہماری تو قدرت نہیں

کھنچیں میرؔ تجھ سے ہی یہ خواریاں

mue sahte sahte jafa kariyan

koi ham se sikhe wafadariyan

hamari to guzri isi taur umr

yahi nala karna yahi zariyan

farishta jahan kam karta na tha

miri ah ne barchhiyan mariyan

gaya jan se ik jahan le ke shokh

na tujh se gain ye dil azariyan

kahan tak ye taklif ma la yataq

huin muddaton naz bardariyan

khat-o-kakul-o-zulf-o-andaz-o-naz

huin dam rah sad giriftariyan

kya dard-o-gham ne mujhe naummid

ke majnun ko ye hi thin bimariyan

tiri ashnai se hi had hui

bahut ki thin duniya mein ham yariyan

na bhai hamari to qudrat nahin

khinchen mir tujh se hi ye khwariyan