مورنامہ

دشت سے بستی میں آیا ایک مور

زور تھا واں حسن کا رانی کے شور

اڑ کے گھر راجا کے پہنچا بے قرار

دیکھ اس کو ہوگیا حیران کار

جاذبہ تھا حسن کا اس کے کمال

جانور بھی ہوگیا محو جمال

تھی نگہ رخسار پر حیرت کے ساتھ

چشم تھی رفتار پر الفت کے ساتھ

گر خرام ناز سے جی لے گئی

خوش نگاہی جان تازہ دے گئی

خستۂ انداز اس کا ہر بشر

رفتہ اس کے ناز کا ہر جانور

دیکھتا تھا سیر میں جلوہ گری

جا نشینہ میں جو بیٹھی وہ پری

روبرو جاکر ہوا وہ بھی کھڑا

ٹک ٹھہر کر مضطرب ہو گر پڑا

اضطراب عشق نے تاثیر کی

دل دہی کرنے اٹھی دل گیر کی

پیار سے کہنے لگی مت ہو اداس

پاس رہ میرے کروں گی میں بھی پاس

تو ہے وحشی اس قدر مانوس ہے

انس انساں کو نہ ہو افسوس ہے

ہے مزاج اپنے پرائے سے نفور

بھاگوں ہوں مانند وحشی سب سے دور

پاس رہنے سے ترے ہے دل خوشی

ہے بلا اس بال و پر میں دلکشی

اس کشش کی تھی نہ مجھ کو کچھ خبر

ہوش اڑا کر لے گئی یہ مشت پر

اب تو دل بھی لگ گیا ہے تیرے ساتھ

یک بیک سب سے اٹھایا میں نے ہاتھ

پاس رہ کر پاس ظاہر ہے ضرور

آوے راجا گھر میں تو پھر دور دور

وہ مبادا ربط سے ہو بدگماں

دوستی ہو جاوے تیری خصم جاں

رنگ رنگ اس عشق کے ہیں گے سلوک

رنگ ہردم بدلے ہے کین ملوک

رنگ صحبت دیکھ کر رنگ اور لائے

اس کو چسپاں اختلاطی خوش نہ آئے

دل ہی راجا کا جو بدبر ہو تو پھر

ترک ہی کرنا پڑے دونوں کو سر

دل بلاے بد ہے جو چاہے کرے

کچھ نہیں پروا اسے کوئی مرے

دل نہ ہوتا تو نہ جاتی دل کی تاب

دل بدن میں ایک ہے خانہ خراب

دل سے کیسے کیسے گھر ویراں ہوئے

لوگ کیا کیا بے سر و ساماں ہوئے

دل اچٹے شہ فقیری کر گئے

جنگلوں میں شہر سے جا مر گئے

مرغ گلشن دل لگی آئے بگیر

بے کلی سے اس کے ظاہر ہیں اسیر

دل نہ ہوتا کاشکے اجسام میں

کرنی تھی ایسی عطا اجرام میں

کرتے تا معلوم قدر عافیت

ہوتی اس عالم کی بھی ایسی ہی گت

مختلط رہنے سے بعد ازچند روز

شور بدنامی اٹھا اک سینہ سوز

کھل گئی غماز لوگوں کی زباں

سب پہ ظاہر ہوگیا راز نہاں

کان راجا کے بھرے دشمن ہوا

بدگمان و بدبر و بدظن ہوا

کار ظن بد کھنچا اک طول کو

سمجھا نامعقول وہ معقول کو

اب یوں ہی کرتا ہے ظاہرداریاں

ورنہ ہیں کینہ کی باتیں ساریاں

دھوم رسوائی کی ہوئی اقران میں

کسر شاں اس کی ہوئی اعیان میں

آنا جانا گھر میں کا اب ہوچکا

پاس ربط و رابطہ سب ہوچکا

بدگمانی سے ہوا ہے کینہ ورز

ہے نمودار آنکھ سے خصمی کی طرز

گھر میں لاتے ہیں کبھو تو گھیر کر

بات کہتا ہے تو منھ کو پھیر کر

راہ میں ہے یا کبھو پھر جائے ہے

پھر گیا تو دیر میں پھر آئے ہے

چار سو چھوٹے ہوئے جاسوس ہیں

ہم دگر کے درپئے ناموس ہیں

مصلحت ہے دور رہ ٹک آج کل

اس میں شاید مٹ بھی جاوے کل مکل

سر پہ لایا ہے بلا آفت کا ربط

جی بچے ہیں شوق کا گر ہووے ضبط

دل لگی تو اک خدا کا ہے غضب

اس سے پھر یارب ہے لب پر روز و شب

دل گرفتہ دل شکستہ دل زدہ

ان نے مارے مرد کیا کارآمدہ

بے دلاں بے دل رہے تو خوب ہے

تن بدن میں ایسے اک آشوب ہے

دل کے جائے ہی ملے ہے امتیاز

اہل دل کہتے ہیں جو ہو دل گداز

دل بلاے جاں ہے اے طاؤس ہائے

اس کے پہلو سے ہے لب پر ہائے وائے

ہے گی یہ دل بستگی خانہ خراب

دربدر پھرنے کا کر دیوے ہے باب

خانہ ویرانی نہیں میری ہی اب

ہے خرابی جہاں کا دل سبب

اپنے تو گھر بار کا ہے ہی فسوس

گھر ترا بھی ویسے ہے بار خروس

کیا اڑایا ہے تجھے اے مشت پر

خاک سے لے کر گیا افلاک پر

واں سے پٹکے دیکھیے کیونکر تجھے

ساتھ آوارہ کرے کیدھر مجھے

سن کھڑا طاؤس سب سنتا رہا

درد و غم سے دیر سر دھنتا رہا

بے زبانی تھی نہ کچھ کہنا بنا

چپکے ہی آزردہ دل رہنا بنا

حزن کے ساتھ اک حزیں آواز کی

گرتے پڑتے دو قدم پرواز کی

دیر سر دیوار سے مارا کیا

صبر سے ناچار پھر چارہ کیا

پاس سے کچھ دور ہی رہنے لگا

جور ہجر یار کے سہنے لگا

بے دل و آزردہ گاہے ہے کھڑا

سر جھکائے گاہ یک سو ہے پڑا

مضطرب ہو شور کرتا ہے گہے

دل پہ رکھ دیتا ہے سر تا ٹک رہے

دور دور اس سے پھرے الفت کے ساتھ

پھر کے دیکھے اس طرف حسرت کے ساتھ

آوے راجا یا نہ آوے یہ گیا

صبر کرنا اس کو اس بن ہے بنا

نوشکیبی دل لگی پر ہے عذاب

جی ملے ڈالے ہیں غم کے پیچ و تاب

عشق و بے صبری بہت مشکل ہے کام

مرگ عاشق کا ہے یہ بھی ایک نام

جی کے گھبرائے ہوا تھا پرفشاں

طاقت پرواز اس میں تھی کہاں

فرط دل تنگی سے ہوکر دل گرا

اک پرافشانی میں سر کے بل گرا

پاؤں میں نے زور تھا نے سر میں شور

ناتواں طاؤس تھا مانند مور

دوڑی محبوبہ یہ اس کا حال دیکھ

رہ سکی نہ عاشقانہ چال دیکھ

اشک ریزاں سر پہ اس کے رو رکھا

خوف طعن خلق کا یک سو رکھا

ہو تسلی جاتے بارے رہ گیا

جان کا بھی ڈر کنارے رہ گیا

چشم وا ہونے لگی اس زار سے

کی نظر رانی کے منھ پر پیار سے

سب لگے کہنے کہ اب تو یہ جیا

جان رفتہ نے منھ ایدھر پھر کیا

ہوگئی چتون بھی اس کی اب درست

پانی چھڑکو تاکہ ہووے گرم و چست

چھرچھراوے پانی چھڑکے بال و پر

اڑچلا رانی کا کہنا یاد کر

کی نظر جاتے ادھر الفت بھری

الفت ایسی جوکہ ہو حسرت بھری

اس نظر سے رانی نے بھی رو دیا

ہوش سر سے صبر دل سے کھو دیا

روتے روتے خواب گہ میں جا گری

پھر نہ اس گھر میں کوئی دن آ پھری

یہ گیا ہو پرفشاں دیوار پر

بیٹھا لیکن منھ ادھر سے پھیر کر

لوگ تا جانیں کہ یہ بھی ہے اداس

پھر نہ آوے شاید اب رانی کے پاس

واں سے اڑ کر ایک کوٹھے پر گیا

گم ہوا واں ایسا جیسے مر گیا

یاں کھلی نمام لوگوں کی زباں

کہتے تھے راجا سے جا کیا کیا نہاں

اختلاط ان دونوں کا ظاہر کیا

اس حقیقت کا اسے ماہر کیا

وہ تو کافر آگے ہی تھا سنگ دل

اور ان کے کہنے سے ہو تنگ دل

کہہ اٹھا میں فکر میں ہوں آج کل

صاف دیتا ہوں مٹا سارا خلل

جان سے ماروں گا میں اس مور کو

پھر نہ سنیے گا کبھی اس شور کو

ہے یہی ہنگامہ آرا جانور

قطع کے شایاں تھے اس کے بال و پر

تا نہ آتا شہر میں یہ دشت سے

باز رہتا ایسے سیر و گشت سے

یوز کاش اس کو کوئی کرتا شکار

شیربچہ اس کو رکھتا کوئی مار

چشم سے ہردم پڑا ٹپکے ہے زہر

اس کی چتون ہے بلاے شہر و دہر

کج خرامی کا ہے فتنہ پیش خیز

چلنا اس کا جوں چلے شمشیر تیز

مت اسے حیوان صاحب جانیو

بدبلا اس کو کہیں تو مانیو

رقص سے ہنگامہ پردازی کرے

پرفشاں ہو تو بداندازی کرے

بولے تو آواز اس کی دل خراش

کرم خوار و مار خوار و بدمعاش

رانی تھی ناقص جو خود مائل ہوئی

مفت لعن و طعن کی قائل ہوئی

بن ملے اس کے رہے ہے وہ اداس

میں کھڑا رہنے نہ دوں اپنے تو پاس

گھر میں آکر ان نے جو کی بود و باش

تھی اسے خانہ خرابی کی تلاش

رانی نے جو منھ لگایا سر چڑھا

قدر سے مقدار سے آگے بڑھا

پاؤں پھیلا گھر کا مالک ہوگیا

اس روش سے اپنا ہالک ہوگیا

اب نہ کریے اس کے تیں جب تک ہلاک

گھر نہیں ہوتا نظر آتا ہے پاک

اس میں گو رانی بھی جاوے جان سے

وہ بھی خوش ہو میری کسر شان سے

فکر میں طاؤس کی راجا رہا

منھ پہ رانی کے نہ ہرگز کچھ کہا

کی تسلی اور تا کھاکر فریب

ہو شکیبا کوئی دن یہ ناشکیب

قصہ کوتہ اڑ گیا یاں سے جو مور

منھ چھپا ایسا گیا جیسے کہ چور

کس طرف جاتا رہا ہو پرفشاں

کچھ نہ پیدا پھر ہوا اس کا نشاں

کچھ خبر اس کی نہیں کیدھر گیا

یاں کہیں جیتا ہے وہ یا مر گیا

یہ تاسف رانی کا جی کھا گیا

دل جو اس کا گل تھا سو مرجھا گیا

کس سے پوچھے کس کنے جاکر کہے

جوں خزاں کا پھول مرجھائی رہے

کیا بہار عشق کے دیکھے ہے رنگ

زرد اس کا ہے گل تر دل ہے تنگ

آنکھیں اس کی دو گل عنبر عجب

سو خبر کی راہ پر وا روز و شب

آوے جو کوئی منھ اس کا تک رہے

دیکھیں حیرانی اسے کب تک رہے

وہ تو گم گشتہ کہیں پیدا نہیں

یاں تسلی یہ دل شیدا نہیں

بے کلی اس گل کو رہتی ہے کمال

رنگ اڑے ہے مور کا کرتے خیال

ہوش سر سے جائے ہے پرواز کر

ہوتی ہے بے خود حزیں آواز کر

غش پڑی رہتی ہے اس اوسیر میں

پھر بحال آتی ہے ٹک تو دیر میں

دل کی حالت ہے وہی اندوہ میں

وہم لے جاتا ہے دشت و کوہ میں

کہتی رہتی تھی کہ اے باد سحر

لا کبھو طاؤس کی مجھ کو خبر

جی اسے ڈھونڈے ہے پر پاتی نہیں

اڑتی سی بھی یاں خبر آتی نہیں

دل انھیں دو طرحوں میں ٹھہرے صبا

یا اسے لا یا مجھے واں لے کے جا

ناقبول عشق ہوں میں تو ملول

اس طرف آتی ہے گر باد قبول

سن کے میرا حال ہوجاتی ہے سن

گرم رفتن ہوتی ہے پھر سر کو دھن

کام اس سے بھی نکلتا کچھ نہیں

مجھ کو وہ ناکام چھوڑے ہے یہیں

آئے ہے جو اس طرف باد دبور

کچھ کچھ اس سے بھی کہا ہے بالضرور

ان غموں کا کچھ نہ دے کر وہ جواب

سر جھکائے یاں سے نکلے ہے شتاب

باد صرصر سے بھی درد دل کہا

سرسری سا ان نے بھی کچھ سن لیا

جھکڑ آیا اس سے بھی تھی گفتگو

پھر نہ ایدھر رو کیا ان نے کبھو

لگ چلے ہے مجھ سے گر رنگ ہوا

گرم ہوکر اس سے میں کیا کیا کہا

کہتے کہتے میں ہوئی یوں ہی سبک

کی نہ ان باؤں نے تسکیں دل کی ٹک

بے قراری دل کی میرے ہے وہی

درہمی ہے حال کی سو ہے یہی

صبر ہوسکتا نہیں میں کیا کروں

کب تلک بے طاقتی سے دن بھروں

جی تو ٹک آتے ہی آتے رک گیا

تن بدن آتش سے غم کی پھک گیا

بے قراری سے کہوں کیا اے صبا

جو نہ کہنا تھا سو تجھ سے میں کہا

صبح کو جو آنکلتی ہے نسیم

اس سے بھی ہے درمیاں حال سقیم

وہ بھی کچھ کرتی نہیں دل کی دوا

سن کے سب ہوجاتی ہے ووہیں ہوا

جذب عشق اس جانور کا ہے بلا

مجھ کو برگ خشک سا دے ہے اڑا

جی کھنچا جاتا ہے میرا اس طرف

کر رہے گا جاذبہ اس کا تلف

آپ کو کھویا گیا پر مجھ کو بھی

کر گیا کھویا گیا سا چلتے ہی

رات دن آرام اب مجھ کو نہیں

خواب و خور سے کام اب مجھ کو نہیں

چت چڑھے گلہاے بال و پر ہیں اب

چپ کہ بلبل میں ہوں نالاں روز و شب

درہمی حال طاؤس اب سنو

عشق ہے تم کو بھی تو ٹک سر دھنو

یاں سے وہ واسوختہ اڑتا گیا

دیر اس کا منھ ادھر مڑتا گیا

پھر نہ ظاہر کچھ ہوا کیدھر گیا

وادی آبادی کہیں جا مر گیا

الغرض اک بن میں جا پنہاں رہا

دل جو آگے ہی گیا تھا یاں رہا

آب و دانے کی نہ کرتا تھا تلاش

دل ہی کے غم سے کیا کرتا معاش

سرنگوں افتادہ رہتا دیر دیر

غم سے محبوبہ کے ہی ہوتا تھا سیر

حیرتی عشق واں رہتا رہے

آتی جاتی باؤ سے کہتا رہے

جائے تو رانی سے کہیو واشگاف

پھیکے خط کے حرف سا مٹتا ہوں صاف

کیا لکھوں میں تو نہیں دست و قلم

پھر نہیں ہے محرم آلام و غم

اب تلک جیتا تو ہوں پر زندگی

دور تجھ سے ہوگئی شرمندگی

آنکھیں رہتی ہیں لگی تیری ہی اور

کرتا ہوں اندھا سا میں فریاد و شور

شور و فریاد آہ دونوں بے اثر

تجھ تلک پہنچیں تو دے مجھ کو خبر

صبر ٹک کرتا نہیں میں ناصبور

اب کھنچا ہے کام بیتابی کا دور

باؤ اودھر کی جو آتی ہے کبھو

منھ ادھر کرتی نہیں بیگانہ خو

یاں سے جز صرصر کوئی جاتا نہیں

سرسری بھی پھر ادھر آتا نہیں

اڑ کے پہنچوں کس طرح تیرے کنے

سست بال و پر دل و جاں انمنے

شوق ہردم کھینچے ہے اودھر مجھے

ہے نصیبوں میں تو دیکھوں گا تجھے

کوئی جھکڑ آنکلتا ہے کبھو

دیر اس سے رہتی ہے یہ گفتگو

کہیو جو ہو اس طرف تیرا گذر

مور اک جنگل میں کرتا تھا بسر

سر میں اس کے عشق کا سا شور ہے

مضطرب دن رات نالاں زور ہے

زارنالی سے طیور اس دشت کے

ترک کرنے پر ہیں سیر و گشت کے

شور سے ہوتا ہے جب وہ نالہ کش

طائر اس جنگل کے کر جاتے ہیں غش

اب کوئی اس راہ سے جاتا نہیں

جانکلتا ہے تو پھر آتا نہیں

صبح اس کے نالوں سے ہے دھوم دھام

طائروں کا شام تک ہے ازدحام

شور کرتے کرتے پھاٹا ہے گلا

اب جو نالے کرتا ہے سو تلملا

پاؤں پر پھیلاکے جب کھینچے ہے دم

آہوان دشت کر جاتے ہیں رم

روکے درندہ کسو کے کب رکے

خاک کے نیچے گزندہ جا چھپے

شور الحاصل ہے اس کا چار سو

شہر و دہ میں اب یہی ہے گفتگو

راو راجا سب کے ہاں مذکور ہے

مور کا سررفتہ پر مشہور ہے

رفتہ رفتہ یہ خبر یاں آگئی

رانی بھی سن گن کہیں سے پا گئی

آئی دل میں فکر جاں طاؤس کی

کشتہ مردہ ہوگئی افسوس کی

کین راجا کا خیال آیا اسے

کیا کہوں کیا کیا ملال آیا اسے

گر پڑی غش کر گئی مرجھا گئی

ناگہاں مانند گل کمھلا گئی

کیا خبر آئی کہ وہ تھی بے خبر

چوٹ کیسی پڑگئی تھی جان پر

بات منھ سے کچھ نکلتی ہی نہ تھی

دیر گذری تھی سنبھلتی ہی نہ تھی

کھل گئیں آنکھیں جو دل پر تھا بہت

کیا کرے ہاتھوں تلے رکھا بہت

ہر طرف کی حسرت آلودہ نگاہ

لب پہ آئی ناتواں سینے سے آہ

آہ کر پوچھا کہ راجا ہیں کہاں

ان کے کینے سے مجھے ہے خوف جاں

یہ خبر ان کو نہ پہنچی ہووے کاش

وے تو جی ماریں گے اس کا کر تلاش

بدگمانی کا کھنچا ہے دور کام

مور کا لیتا نہیں کینے سے نام

مجھ پہ بھی اس جرم سے آیا غضب

کشت و خوں کے سب ہیں درپے اس سبب

یہ لگائی لاگ سے لوگوں نے آگ

گھر جلاتی رہتی ہے آگے سے لاگ

دیکھیے کیا درمیاں آوے سلوک

آگ ہے بھڑکی ہوئی کین ملوک

لوگوں کی پھر اشتعالک دم بدم

قہر ہے بیداد ہے ظلم و ستم

آج کل سے یہ تو آئی ہے خبر

جب نہ تب ہیں گوش راجا کے ادھر

کلول ایسے جان پر سے کیا ٹلے

کیا عجب آنکھیں ملے پاؤں تلے

ہم کو پاتا ہے چھری پاتا نہیں

کب پئے خوں ریز یاں آتا نہیں

دشمنی کی بات ہی کچھ اور ہے

نے ترحم ہے نہ مطلق غور ہے

جانور کا انس کچھ ثابت نہیں

انس انساں کی سی یہ تہمت نہیں

غیرت اپنی بھی نہیں ہے مقتضی

جیتی رہتی عشق کی ہو تہمتی

زندگانی کیا ہے جب غیرت گئی

مفت ذلت ہوگئی عزت گئی

جب تلک آئی نہیں جیتے ہیں ہم

لوہو اپنا ہر زماں پیتے ہیں ہم

جو مخاطب تھا کہا ان نے کہ ہاں

اس خبر کا اب نہیں اودھم کہاں

سن کے راجا نے کہا یہ اس کی دھوم

دامداروں کو بلا کاے قوم شوم

لو خبر ہے کس طرف وہ خارزار

آپ جاؤں گا ادھر بہر شکار

گوکہ ہو وہ بادیہ پر شر و شور

راہ چلتے ہوں عصا سے مار و مور

ہر طرف راجا کے پہنچے دامدار

ہو تلاشی تا کدھر ہے دشت خار

صیدپیشہ وے گئے ہر چار اور

دیکھیں کس جنگل میں ہے وہ مورشور

کس بیاباں میں ہے اس کی بود و باش

کون سے ہے دشت و بر میں بدمعاش

راہ میں ان سب کو یہ آئی خبر

جس بیاباں میں ہے وہ تفتہ جگر

خار کا جنگل نہیں ہے دشت مار

روز روشن میں بھی ہے تیرہ و تار

دم کش اژدر نکلے ہے گر سیر کو

دور سے کھینچے ہے وحش و طیر کو

جلتے ہیں آتش زبانی سے بہت

پتلے ہوجاتے ہیں پانی سے بہت

یعنی دم سے طیر ہوتے ہیں گداز

ہے زبانہ آگ کا اس کی دراز

ایسے ایسے سو پھریں ہیں واں سدا

جن کی وحش و طیر ہے اکثر غذا

اور بھی رہتے ہیں واں اقسام مار

گھر انھوں کے ہیں اسی جنگل کے غار

ہے عجب ماروں میں مور آکر رہے

مار بھی پھر کیسے اژدر اژدہے

مرغ کر جاتے ہیں مرغ انداز دس

کیا کریں اک مور کے کھانے سے بس

مار کھاجا مور کا ہے یاں کے مار

مور دس دس کھا گئے ہیں ایک بار

گرد ہے اس دشت کے کوہ گراں

اس سے اژدر جھانکے ہے پیدا نہاں

جانور اڑتے جو ڈھب پر آگئے

چار چار ایک ایک ان کو کھا گئے

ہے زمانے سے بھی دھیمی ان کی چال

جن کے ہیں کیڑے مکوڑے پائمال

جیب کو اپنی گزوں تک دیں ہیں طول

خشت و سنگ و خاک تک کھاویں اکول

ان کے چاٹے دشت میں کم ہیں درخت

چٹ کیے ہیں کوہ تک کے سنگ سخت

ماریے پتھرچٹے مشہور ہیں

ریزہ دنداں ان کے پتھر چور ہیں

قدرت حق سے رہا ہے ان میں مور

پھر قیامت کا سا اس کے سر میں شور

مور کیا چوری چھپے آیا ہے یاں

عشق کا اعجاز اسے لایا ہے یاں

فتنہ در سر عشق کے یہ کام ہیں

مور اژدر رانی راجا نام ہیں

عشق ہے ہنگامہ ساز شور و شر

قصے قضیے عشق سے ہیں مختصر

دشت ماراں خاک ہوگا جل جلا

اژدہے مر جائیں گے سب تلملا

بھیڑ لے کر ساتھ راجا آئے گا

کل مکل میں مور مارا جائے گا

خاک میں مل جائے گا کوہ گراں

خاک سی اڑ جائے گی آخر کو واں

رانی ہوگی فرط غیرت سے ستی

جانور کے عشق کی ہے تہمتی

طعن مردم سے ہوئی ہے بسکہ تنگ

زندگی کو جانتی ہے اپنا ننگ

رفتہ رفتہ راجا کا گھر جائے گا

عشق کام ان پردوں میں کر جائے گا

لے گئے القصہ جاسوساں خبر

جیتے مرتے پہنچے کچھ راجا کے گھر

کی حقیقت اس جگہ کی تب بیاں

حال واں کا ہوگیا سب پر عیاں

راہ کی مشکل گذاری سب کہی

سننے والے لوگوں کو حیرت رہی

جنگلوں میں خارزاری نقل کی

راہ واں نکلی نہ ہرگز عقل کی

دشت ہر یک خارزار لق و دق

پاؤں چلتے چلتے جاسوسوں کے شق

سختی سنگستاں کی بیش از بیش تھی

سالکوں کی واں کف پا ریش تھی

غنچہ غنچہ اک بیاباں میں تھے خار

غیر گل خار وھاں برگ اور نہ بار

پاؤں ریگستاں میں تا زانو جلے

راہ سر کے بھل کوئی کیوں کر چلے

گرم تر اک دشت میں تھا آفتاب

سایہ واں پیدا نہ تھا نے قطرہ آب

تشنگی سے کیا عجب ہے غش بھی ہو

آب تو واں تھا نہ جو لب چش بھی ہو

شہری اس کے شور سے یکسر تھے داغ

نکلے تھے دس بیس ہم بہر سراغ

پھرتے پھرتے جنگلوں میں تھک گئے

کتنوں کے تیں شیر و اژدر بھک گئے

چلتے چلتے دور تک آئے نکل

پڑ گئے تھے آبلے تلووں میں چل

اور ابھی جنگل بڑے درپیش ہیں

پاؤں دونوں شل ہیں تلوے ریش ہیں

دیکھیے ہوتا ہے واں کیونکر نباہ

ہے بہت مشکل گذر کانٹوں سے راہ

ہر قدم خطرہ کہ ہیں شیر و پلنگ

اس پہ سر ماریں کہ رہ پرخار و سنگ

پھر تراکم چار سو اشجار کا

پھر ہراس اس میں گڑھے کا غار کا

ہاتھی ارنے خوک کی واں باش و بود

کرگدن کی دھوم سے اکثر نمود

ہیں بیاباں مہلکی یہ تو سبھی

زندگی کیونکر کرے واں آدمی

قافلہ جاسوسوں کا اودھر چلا

آدھا پر واں سو گیا گذرا کھپا

زندگی سے جمع یہ مایوس ہے

ہر خطرگہ خانۂ جاسوس ہے

کیا کرے جو رزق یوں مقسوم ہے

واں ملے مرنا جہاں معلوم ہے

کچھ ہو دشت مار تک جانا ہمیں

مور کی واں سے خبر لانا ہمیں

آب و دانہ لے چلا ہے اب تو واں

آب و دانہ کچھ نہیں ملتا جہاں

دیکھیے جانا ہو کیونکر اتفاق

بھوکوں مرنا راہ چلنے میں ہے شاق

سوچ کر آپس میں وے آگے گئے

دن گئے تھے رات بھی جاگے گئے

راہ میں دو چار فاقے بھی کیے

کتنے ان میں سے موئے کتنے جیے

طے ہوئے وے دشت جوں ہی ہولناک

دشت ماراں پہنچے کچھ بے خوف و باک

دیکھی اس کے ناحیہ میں ایک دھوم

تھا چرندوں کا درندوں کا ہجوم

جمع رہتے تھے طیور دشت بھی

صبح سے تھی ترک سیر و گشت بھی

شور بیتابی سے بعضے تھے دہم

سن کے نالے بعضے کر جاتے تھے رم

حزن سے ہوتا ہے جس دم نالہ کش

پاس ہی کچھ جانور کرتے ہیں غش

دیکھ وا منقار اس کی رحم کر

کچھ نہ کچھ رکھ دیتے منھ میں جانور

کوئی دانہ بوند پانی گھاس پات

کاٹتا تھا اس طرح دن اور رات

یا رکا تو سست سی پرواز کی

اس بیاباں میں حزیں آواز کی

کچھ اڑا بیتاب کچھ رکنے لگا

سنگریزے کنکری چکنے لگا

گر کہیں دوچار دانے پا گیا

شکر کر اپنی زباں میں کھا گیا

جو کسو تالاب سے پانی پیا

آسماں کی اور منھ اپنا کیا

تو نہ دے تو یعنی مجھ کو کون دے

پرشکستہ کی خبر یوں کون لے

سن کے راجا یہ خبر شاداں ہوا

خشمگیں تر خانہ آباداں ہوا

حکم کش لوگوں سے اپنے یہ کہا

دیر اس موذی کے غم میں میں رہا

اب یہ مژدہ لائے ہیں جاسوس جا

ان بنوں میں ایک بن میں وہ بھی تھا

مجھ کو جانا اس طرف کا ہے اہم

کھا گیا ہے جان اس دشمن کا غم

لوگ میرے گرچہ ہیں حاضریراق

پھر رکھو کچھ اور بھی بہر یساق

جنگ حیوانات سے ہے بیشتر

ہیں طرف اژدر نمر شیراں شتر

یہ لڑائی طول کو گر کھنچ گئی

ہمت مردانہ سنیو ہچ گئی

ہے لڑائی سخت کوہستان کی

پھر بہم حیوان اور انسان کی

منھ پسارے اژدہے ہیں گرم جنگ

کھینچ کر نگلے ہیں دم سے خشت و سنگ

آئے ہاتھی بھی اتر گر کوہ سے

ہوسکے گا پھر نہ کچھ انبوہ سے

ہوگیا باراہ سد راہ گر

لیویں گے جاکر نفر راہ دگر

ہو اگر جاموش دشتی سے مصاف

تو کوئی دم ہی کو ہے میدان صاف

کرگدن آکر اگر ہوگا طرف

تو الٹ دیوے گا کوئی صف کی صف

منھ چڑھیں گے اس کے مردم کم بہت

اک طرف ہو جاوے گا عالم بہت

ہوگئی گر خرس سے استادگی

درمیاں آجائے گی افتادگی

منھ اگر گرگ بغل زن آگیا

دیکھیو پیٹھ اک جہاں دکھلا گیا

یوز و گرگ و شیر اگر آجائیں گے

بددلوں کی فوج کو کھا جائیں گے

مست ہاتھی ہوگئے چہرہ اگر

منھ چھپا لیں گے سپاہی بیشتر

سامنے ہوگا اگر مار سیاہ

سامنے اس کے نہ ہووے گی سپاہ

گرم کیں اژدر کوئی گر آگیا

کھا گیا چٹ کر گیا جیتا گیا

لوگ رکھو الغرض صاحب جگر

پہنچیں سر پر مدعی کے بیشتر

جدول ان کی تیغ کی جاری رہے

ان کی تردستی سے وہ عاری رہے

ساتھ راجا کے گیا جم غفیر

ہم صغیر و ہم جوان و ہم کبیر

راوراجا ساتھ جب سارے گئے

کچھ نہ بولے شرم کے مارے گئے

منزلیں طے ہوکے آئے دشت و در

اترے واں جا لوگ لشکر سربسر

بھڑکی آتش عشق کی جنگل جلے

دوں لگا وہ طائر و اژدر چلے

آگ پھیلی ان بنوں میں دور تک

جل گئے حیواں کئی لنگور تک

مار و اژدر اژدہے بھلسے گئے

شیر و گرگ و کرگدن جھلسے گئے

جل گیا طاؤس بھی اس آگ میں

جی گئے بہتیرے دل کی لاگ میں

مور کا مردہ گیا راجا کے پاس

اور جھلسے بھلسے طائر بے حواس

پھر پڑی جو آگ سب لشکر جلا

اور راجا کا بھی اودھر گھر جلا

یعنی رانی نے سنی جو یہ خبر

آتش غم سے جلا اس کا جگر

کھینچ آہ سرد یہ کہنے لگی

عشق کی بھی آگ کیا بہنے لگی

بن جلا کر بستیوں میں آلگی

پھیل کر یاں دل جگر کو جالگی

جمع کر خاشاک و خار و خس شتاب

جل گئی دے آگ وہ بھی بس شتاب

کیا لگی تھی دل کو رانی جل گئی

خاک ہوکر خاک ہی میں رل گئی

عشق ہی کی ہیں یہ تازہ کاریاں

عشق نے پردے میں جانیں ماریاں

مور کے بدلے جلایا دشت مار

مار و اژدر جل گئے چندیں ہزار

جل کے لشکر ہوگیا تھا بے چراغ

یہ خبر سن ہوگیا راجا بھی داغ

عشق سے کیا میرؔ اتنی گفت و گو

خاک اڑا دی عشق نے ہر چار سو

درمیاں نے کوہ نے انبوہ ہے

رانی کا راجا کا اب اندوہ ہے

طائر و طاؤس و حیواں اژدہے

سب کھپے کیا عشق کی کوئی کہے

یہ فسانہ رہ گیا عالم کے بیچ

بازماندہ ان کے ہیں سب غم کے بیچ

dasht se basti mein aya ek mor

zor tha wan husn ka rani ke shor

ur ke ghar raja ke pahuncha be qarar

dekh us ko hogaya hairan kar

jaziba tha husn ka us ke kamal

janwar bhi hogaya mahw-e-jamal

thi nigah rukhsar par hairat ke sath

chashm thi raftar par ulfat ke sath

gar khiram-e-naz se ji le gai

khush nigahi jan-e-taza de gai

khasta-e-andaz us ka har bashar

rafta us ke naz ka har janwar

dekhta tha sair mein jalwa giri

ja nashina mein jo baithi wo pari

rubaru jakar hua wo bhi khara

tuk thahar kar muztarib ho gir para

iztirab-e-ishq ne tasir ki

dil dahi karne uthi dil gir ki

pyar se kahne lagi mat ho udas

pas rah mere karungi mein bhi pas

tu hai wahshi is qadar manus hai

uns insan ko na ho afsos hai

hai mizaj apne parae se nafur

bhagun hun manind-e-wahshi sab se dur

pas rahne se tire hai dil khushi

hai bala is bal-o-par main dilkashi

is kashish ki thi na mujh ko kuchh khabar

hosh ura kar le gai ye musht par

ab to dil bhi lag gaya hai tere sath

yak bayak sab se uthaya main ne hath

pas rah kar pas zahir hai zarur

awe raja ghar mein to phir dur dur

wo mabada rabt se ho badguman

dosti ho jawe teri khasm-e-jan

rang rang is ishq ke hain ge suluk

rang hardam badle hai ken muluk

rang-e-sohbat dekh kar rang aur lae

us ko chaspan ikhtilati khush na ae

dil hi raja ka jo badbar ho to phir

tark hi karna pare donon ko sar

dil balai bad hai jo chahe kare

kuchh nahin parwa use koi mire

dil na hota to na jati dil ki tab

dil badan mein ek hai khana kharab

dil se kaise kaise ghar wiran hue

log kya kya be sar-o-saman hue

dil-e-achte shah faqiri kar gae

jangalon mein shahr se ja mar gae

murgh-e-gulshan dil lagi ae bager

be kali se us ke zahir hain asir

dil na hota kashke ajsam mein

karni thi aisi ata ajram mein

karte ta maalum qadar-e-afiyat

hoti is alam ki bhi aisi hi gat

mukhtalat rahne se baad azchand roz

shor badnami utha ik sina soz

khul gai ghammaz logon ki zaban

sab pe zahir hogaya raz-e-nihan

kan raja ke bhare dushman hua

badguman-o-badbar-o-badzan hua

kar zan-e-bad khincha ik tul ko

samjha namaaqul wo maaqul ko

ab yun hi karta hai zahirdariyan

warna hain kina ki baten sariyan

dhum ruswai ki hui aqran mein

kasr shan us ki hui aayan mein

ana jana ghar mein ka ab hochuka

pas rabt-o-rabta sab hochuka

badgumani se hua hai kina waraz

hai numudar ankh se khasmi ki tarz

ghar mein late hain kabhu to gher kar

bat kahta hai to munh ko pher kar

rah mein hai ya kabhu phir jae hai

phir gaya to der mein phir ae hai

char su chhote hue jasus hain

ham digar ke darpae namus hain

maslahat hai dur rah tuk aj kal

is mein shayad mit bhi jawe kal makal

sar pe laya hai bala afat ka rabt

ji bachche hain shauq ka gar howe zabt

dil lagi to ik khuda ka hai ghazab

us se phir yarab hai lab par roz-o-shab

dil girafta dil shikasta dil zada

un ne mare mard kya karamada

be dalan be dil rahe to khub hai

tan badan mein aise ik ashob hai

dil ke jae hi mile hai imtiyaz

ahl-e-dil kahte hain jo ho dil gudaz

dil balai jan hai ai taus hae

us ke pahlu se hai lab par hae wae

hai gi ye dil bastagi khana kharab

darbadar phirne ka kar dewe hai bab

khana wirani nahin meri hi ab

hai kharabi jahan ka dil sabab

apne to ghar bar ka hai hi fasos

ghar tira bhi waise hai bar-e-khurus

kya uraya hai tujhe ai musht par

khak se le kar gaya aflak par

wan se patke dekhiye kyunkar tujhe

sath awara kare kidhar mujhe

sun khara taus sab sunta raha

dard-o-gham se der sar dhunta raha

be zabani thi na kuchh kahna bana

chupke hi azurda dil rahna bana

huzn ke sath ik hazin awaz ki

girte parte do qadam parwaz ki

der sar-e-diwar se mara kiya

sabr se nachar phir chara kiya

pas se kuchh dur hi rahne laga

jaur-e-hijr-e-yar ke sahne laga

be dil-o-azurda gahe hai khara

sar jhukae gah-e-yak so hai para

muztarib ho shor karta hai gahe

dil pe rakh deta hai sar ta tuk rahe

dur dur us se phire ulfat ke sath

phir ke dekhe is taraf hasrat ke sath

awe raja ya na awe ye gaya

sabr karna us ko is ban hai bana

naushakebi dil lagi par hai azab

ji mile dale hain gham ke pech-o-tab

ishq-o-be sabri bahut mushkil hai kam

marg ashiq ka hai ye bhi ek nam

ji ke ghabrae hua tha purfishan

taqat-e-parwaz is mein thi kahan

fart-e-dil tangi se hokar dil gira

ik purafshani mein sar ke bal gira

paon main ne zor tha ne sar mein shor

natawan taus tha manind-e-mor

dauri mahbuba ye us ka hal dekh

rah saki na ashiqana chal dekh

ashk rezan sar pe us ke ro rakha

khauf taan-e-khalq ka yak so rakha

ho tasalli jate bare rah gaya

jan ka bhi dar kinare rah gaya

chashm-e-wa hone lagi is zar se

ki nazar rani ke munh par pyar se

sab lage kahne ke ab to ye jiya

jan-e-rafta ne munh idhar phir kiya

hogai chitwan bhi us ki ab durust

pani chhirko take howe garm-o-chust

chharchharawe pani chhirke bal-o-par

urchala rani ka kahna yad kar

ki nazar jate idhar ulfat bhari

ulfat aisi joke ho hasrat bhari

is nazar se rani ne bhi ro diya

hosh sar se sabr dil se kho diya

rote rote khwab gah mein ja giri

phir na is ghar mein koi din a phiri

ye gaya ho purfishan diwar par

baitha lekin munh idhar se pher kar

log ta janen ke ye bhi hai udas

phir na awe shayad ab rani ke pas

wan se ur kar ek kothe par gaya

gum hua wan aisa jaise mar gaya

yan khuli nammam logon ki zaban

kahte the raja se ja kya kya nihan

ikhtilat in donon ka zahir kiya

is haqiqat ka use mahir kiya

wo to kafir age hi tha sang dil

aur un ke kahne se ho tang dil

kah utha mein fikr mein hun aj kal

saf deta hun mita sara khalal

jan se marunga mein is mor ko

phir na suniyega kabhi is shor ko

hai yahi hangama ara janwar

qata ke shayan the us ke bal-o-par

ta na ata shahr mein ye dasht se

baz rahta aise sair-o-gasht se

yoz kash us ko koi karta shikar

sherbachcha us ko rakhta koi mar

chashm se hardam para tapke hai zahr

us ki chitwan hai balai shahr-o-dahr

kaj khirami ka hai fitna pesh khez

chalna us ka jun chale shamshir-e-tez

mat use haiwan sahab janiyo

badbala us ko kahin to maniyo

raqs se hangama pardazi kare

purfishan ho to badandazi kare

bole to awaz us ki dil kharash

karam khwar-o-mar khwar-o-badmaash

rani thi naqis jo khud mail hui

muft laan-o-taan ki qail hui

ban mile us ke rahe hai wo udas

main khara rahne na dun apne to pas

ghar mein akar un ne jo ki bud-o-bash

thi use khana kharabi ki talash

rani ne jo munh lagaya sar charha

qadr se miqdar se age barha

paon phaila ghar ka malik hogaya

is rawish se apna haluk hogaya

ab na kariye us ke tin jab tak halak

ghar nahin hota nazar ata hai pak

is mein go rani bhi jawe jan se

wo bhi khush ho meri kasr-e-shan se

fikr mein taus ki raja raha

munh pe rani ke na hargiz kuchh kaha

ki tasalli aur ta khakar fareb

ho shakeba koi din ye nashikib

qissa kotah ur gaya yan se jo mor

munh chhupa aisa gaya jaise ke chur

kis taraf jata raha ho purfishan

kuchh na paida phir hua us ka nishan

kuchh khabar us ki nahin kidhar gaya

yan kahin jita hai wo ya mar gaya

ye taassuf rani ka ji kha gaya

dil jo us ka gul tha so murjha gaya

kis se puchhe kis kanne jakar kahe

jun khizan ka phul murjhai rahe

kya bahar-e-ishq ke dekhe hai rang

zard us ka hai gul-e-tar dil hai tang

ankhen us ki do gul-e-ambar ajab

so khabar ki rah par wa roz-o-shab

awe jo koi munh us ka tak rahe

dekhen hairani use kab tak rahe

wo to gum gashta kahin paida nahin

yan tasalli ye dil-e-shaida nahin

be kali us gul ko rahti hai kamal

rang ure hai mor ka karte khayal

hosh sar se jae hai parwaz kar

hoti hai be khud hazin awaz kar

ghash pari rahti hai is osair mein

phir bahal ati hai tuk to der mein

dil ki halat hai wahi andoh mein

wahm le jata hai dasht-o-koh mein

kahti rahti thi ke ai bad-e-sahar

la kabhu taus ki mujh ko khabar

ji use dhunde hai par pati nahin

urti si bhi yan khabar ati nahin

dil unhen do tarhon mein thahre saba

ya use la ya mujhe wan le ke ja

naqubul ishq hun main to malul

is taraf ati hai gar bad-e-qubul

sun ke mera hal hojati hai sun

garm raftan hoti hai phir sar ko dhun

kam us se bhi nikalta kuchh nahin

mujh ko wo nakam chhore hai yahin

ae hai jo is taraf bad-e-dabur

kuchh kuchh us se bhi kaha hai bilzzarur

in ghamon ka kuchh na de kar wo jawab

sar jhukae yan se nikle hai shitab

bad-e-sarsar se bhi dard-e-dil kaha

sarsari sa un ne bhi kuchh sun liya

jhakkar aya us se bhi thi guftugu

phir na idhar ro kiya un ne kabhu

lag chale hai mujh se gar rang hua

garm hokar us se main kya kya kaha

kahte kahte mein hui yun hi subuk

ki na un baon ne taskin dil ki tuk

be qarari dil ki mere hai wahi

dirhami hai hal ki so hai yahi

sabr hawaskutta nahin main kya karun

kab talak be taqati se din bharun

ji to tuk ate hi ate ruk gaya

tan badan atish se gham ki phak gaya

be qarari se kahun kya ai saba

jo na kahna tha so tujh se main kaha

subh ko jo anklati hai nasim

us se bhi hai darmiyan hal-e-saqem

wo bhi kuchh karti nahin dil ki dawa

sun ke sab hojati hai wohain hua

jazb-e-ishq is janwar ka hai bala

mujh ko barg-e-khushk sa de hai ura

ji khincha jata hai mera is taraf

kar rahega jaziba us ka talaf

ap ko khoya gaya par mujh ko bhi

kar gaya khoya gaya sa chalte hi

rat din aram ab mujh ko nahin

khwab-o-khur se kam ab mujh ko nahin

chit charhe gilaai bal-o-par hain ab

chup ke bulbul mein hun nalan roz-o-shab

dirhami hal-e-taus ab suno

ishq hai tum ko bhi to tuk sar dhuno

yan se wo wasokhta urta gaya

der us ka munh idhar murta gaya

phir na zahir kuchh hua kidhar gaya

wadi abadi kahin ja mar gaya

algharaz ik ban mein ja pinhan raha

dil jo age hi gaya tha yan raha

ab-o-dane ki na karta tha talash

dil hi ke gham se kiya karta maash

sarnigun uftada rahta der der

gham se mahbuba ke hi hota tha sair

hairati-e-ishq wan rahta rahe

ati jati bao se kahta rahe

jae to rani se kahiyo washigaf

phike khat ke harf sa mitta hun saf

kya lakhon mein to nahin dast-o-qalam

phir nahin hai mahram-e-alam-o-gham

ab talak jita to hun par zindagi

dur tujh se hogai sharmindagi

ankhen rahti hain lagi teri hi aur

karta hun andha sa main fariyad-o-shor

shor-o-fariyad ah donon be asar

tujh talak pahunchen to de mujh ko khabar

sabr tuk karta nahin main nasabur

ab khincha hai kam betabi ka daur

bao udhar ki jo ati hai kabhu

munh idhar karti nahin begana khu

yan se juz sarsar koi jata nahin

sarsari bhi phir idhar ata nahin

ur ke pahunchun kis tarah tere kanne

sust bal-o-par dil-o-jan anmane

shauq hardam khinche hai udhar mujhe

hai nasibon mein to dekhunga tujhe

koi jhakkar anklata hai kabhu

der us se rahti hai ye guftugu

kahiyo jo ho is taraf tera guzar

mor ik jangal mein karta tha basar

sar mein us ke ishq ka sa shor hai

muztarib din rat nalan zor hai

zarnali se tuyur is dasht ke

tark karne par hain sair-o-gasht ke

shor se hota hai jab wo nala kash

tair is jangal ke kar jate hain ghash

ab koi is rah se jata nahin

janikalta hai to phir ata nahin

subh us ke nalon se hai dhum dham

tairon ka sham tak hai izdiham

shor karte karte phata hai gila

ab jo nale karta hai so tilmila

paon par phailikke jab khinche hai dam

ahuin-e-dasht kar jate hain ram

roke darinda kisu ke kab ruke

khak ke niche gazinda ja chhupe

shor-e-alhasil hai us ka char su

shahr-o-da mein ab yahi hai guftugu

rao raja sab ke han mazkur hai

mor ka sarrafta par mashhur hai

rafta rafta ye khabar yan agi

rani bhi sun gin kahin se pa gai

ai dil mein fikr-e-jan taus ki

kushta murda hogai afsos ki

ken raja ka khayal aya use

kya kahun kya kya malal aya use

gir pari ghash kar gai murjha gai

nagahan manind-e-gul kamhla gai

kya khabar ai ke wo thi be khabar

chot kaisi pargai thi jan par

bat munh se kuchh nikalti hi na thi

der guzari thi sambhalti hi na thi

khul gain ankhen jo dil par tha bahut

kya kare hathon tale rakha bahut

har taraf ki hasrat aluda nigah

lab pe ai natawan sine se ah

ah kar puchha ke raja hain kahan

un ke kine se mujhe hai khauf-e-jan

ye khabar un ko na pahunchi howe kash

we to ji marenge us ka kar talash

badgumani ka khincha hai dur kam

mor ka leta nahin kine se nam

mujh pe bhi is jurm se aya ghazab

kisht-o-khun ke sab hain darpe is sabab

ye lagai lag se logon ne ag

ghar jalati rahti hai age se lag

dekhiye kya darmiyan awe suluk

ag hai bharki hui ken muluk

logon ki phir ishtialak dam badam

qahr hai bedad hai zulm-o-sitam

aj kal se ye to ai hai khabar

jab na tab hain gosh raja ke idhar

kalwil aise jan par se kya tale

kya ajab ankhen mile paon tale

ham ko pata hai chhuri pata nahin

kab piye khun rez yan ata nahin

dushmani ki bat hi kuchh aur hai

ne tarahhum hai na mutlaq ghaur hai

janwar ka uns kuchh sabit nahin

uns insan ki si ye tohmat nahin

ghairat apni bhi nahin hai muqtazi

jiti rahti ishq ki ho tohmati

zindagani kya hai jab ghairat gai

muft zillat hogai izzat gai

jab talak ai nahin jite hain ham

lohu apna har zaman pite hain ham

jo mukhatib tha kaha un ne ke han

is khabar ka ab nahin odham kahan

sun ke raja ne kaha ye us ki dhum

damdaron ko bala kae qaum-e-shum

lo khabar hai kis taraf wo kharzar

ap jaunga idhar bahr-e-shikar

goke ho wo badiya par shar-o-shor

rah chalte hun asa se mar-o-mor

har taraf raja ke pahunche damdar

ho talashi ta kidhar hai dasht-e-khar

saidpesha we gae har char aur

dekhen kis jangal mein hai wo morshor

kis bayaban mein hai us ki bud-o-bash

kaun se hai dasht-o-bar mein badmaash

rah mein un sab ko ye ai khabar

jis bayaban mein hai wo tafta jigar

khar ka jangal nahin hai dasht-e-mar

roz-e-raushan mein bhi hai tira-o-tar

dam kash azhdar nikle hai gar sair ko

dur se khinche hai wahash-o-tair ko

jalte hain atish zabani se bahut

putle hojate hain pani se bahut

yaani dam se tair hote hain gudaz

hai zubana ag ka us ki daraz

aise aise so phiren hain wan sada

jin ki wahash-o-tair hai aksar ghiza

aur bhi rahte hain wan aqsam mar

ghar inhon ke hain isi jangal ke ghar

hai ajab maron mein mor akar rahe

mar bhi phir kaise azhdar azhdahe

murgh kar jate hain murgh-e-andaz-e-das

kya karen ik mor ke khane se bas

mar khaja mor ka hai yan ke mar

mor das das kha gae hain ek bar

gard hai is dasht ke koh-e-giran

us se azhdar jhanke hai paida nihan

janwar urte jo dhab par age

char char ek ek un ko kha gae

hai zamane se bhi dhimi un ki chal

jin ke hain kire makore paimal

jeb ko apni gazon tak den hain tul

khisht-o-sang-o-khak tak khawen akol

un ke chate dasht mein kam hain darakht

chat kiye hain koh tak ke sang-e-sakht

mariye pattharchitte mashhur hain

reza dandan un ke patthar chur hain

qudrat-e-haq se raha hai un mein mor

phir qayamat ka sa us ke sar mein shor

mor kya chori chhupe aya hai yan

ishq ka ejaz use laya hai yan

fitna dar sar ishq ke ye kam hain

mor azhdar rani raja nam hain

ishq hai hangama saz-e-shor-o-shar

qisse qazye ishq se hain mukhtasar

dasht maran khak hoga jal jala

azhdahe mar jaenge sab tilmila

bhir le kar sath raja aega

kal makal mein mor mara jaega

khak mein mil jaega koh-e-giran

khak si ur jaegi akhir ko wan

rani hogi fart-e-ghairat se sati

janwar ke ishq ki hai tohmati

taan mardum se hui hai baske tang

zindagi ko janti hai apna nang

rafta rafta raja ka ghar jaega

ishq kam in pardon mein kar jaega

le gae alqissa jasusan khabar

jite marte pahunche kuchh raja ke ghar

ki haqiqat is jagah ki tab bayan

hal wan ka hogaya sab par ayan

rah ki mushkil guzari sab kahi

sunne wale logon ko hairat rahi

jangalon mein kharzari naql ki

rah wan nikli na hargiz aql ki

dasht har yak kharzar-e-laq-o-diq

paon chalte chalte jasuson ke shaqq

sakhti sangsitan ki besh az besh thi

salikon ki wan kaf-e-pa rish thi

ghuncha ghuncha ik bayaban mein the khar

ghair-e-gul-e-khar wahan barg aur na bar

paon registan mein ta zanu jale

rah sar ke bhal koi kyun kar chale

garm tar ik dasht mein tha aftab

saya wan paida na tha ne qatra ab

tishnagi se kya ajab hai ghash bhi ho

ab to wan tha na jo lab chash bhi ho

shahri us ke shor se yaksar the dagh

nikle the das bis ham bahr-e-suragh

phirte phirte jangalon mein thak gae

kitnon ke tin sher-o-azhdar bhak gae

chalte chalte dur tak ae nikal

par gae the able talwon mein chal

aur abhi jangal bare darpesh hain

paon donon shil hain talwe rish hain

dekhiye hota hai wan kyunkar nibah

hai bahut mushkil guzar kanton se rah

har qadam khatra ke hain sher-o-palang

us pe sar maren ke rah purkhar-o-sang

phir tarakum char su ashjar ka

phir hiras is mein garhe ka ghar ka

hathi arne khuk ki wan bash-o-bud

kargadan ki dhum se aksar numud

hain bayaban mohliki ye to sabhi

zindagi kyunkar kare wan admi

qafila jasuson ka udhar chala

adha par wan so gaya gazra khapa

zindagi se jama ye mayus hai

har khatargah khana-e-jasus hai

kya kare jo rizq yun maqsum hai

wan mile marna jahan maalum hai

kuchh ho dasht-e-mar tak jana hamen

mor ki wan se khabar lana hamen

ab-o-dana le chala hai ab to wan

ab-o-dana kuchh nahin milta jahan

dekhiye jana ho kyunkar ittifaq

bhukon marna rah chalne mein hai shaq

soch kar apas mein we age gae

din gae the rat bhi jage gae

rah mein do char faqe bhi kiye

kitne un mein se maue kitne jiye

tai hue we dasht jun hi haulnak

dasht maran pahunche kuchh be khauf-o-bak

dekhi us ke nahayya mein ek dhum

tha charindon ka darindon ka hujum

jama rahte the tuyur-e-dasht bhi

subh se thi tark-e-sair-o-gasht bhi

shor betabi se baaze the dahum

sun ke nale baaze kar jate the ram

huzn se hota hai jis dam nala kash

pas hi kuchh janwar karte hain ghash

dekh wa minqar us ki rahm kar

kuchh na kuchh rakh dete munh mein janwar

koi dana bund pani ghas pat

katta tha is tarah din aur rat

ya ruka to sust si parwaz ki

is bayaban mein hazin awaz ki

kuchh ura betab kuchh rukne laga

sangreze kankri chukne laga

gar kahin dochar dane pa gaya

shukr kar apni zaban mein kha gaya

jo kisu talab se pani piya

asman ki aur munh apna kiya

tu na de to yaani mujh ko kaun de

purshikasta ki khabar yun kaun le

sun ke raja ye khabar shadan hua

khashmgin tar khana abadan hua

hukm kash logon se apne ye kaha

der is muzi ke gham mein main raha

ab ye muzhda lae hain jasus ja

in banon mein ek ban mein wo bhi tha

mujh ko jana is taraf ka hai aham

kha gaya hai jan is dushman ka gham

log mere garche hain haziryaraq

phir rakho kuchh aur bhi bahr-e-yasaq

jang haiwanat se hai beshtar

hain taraf azhdar namir sheran shutar

ye larai tul ko gar khinch gai

himmat-e-mardana suniyo hach gai

hai larai sakht kohistan ki

phir baham haiwan aur insan ki

munh pasare azhdahe hain garm jang

khinch kar nigle hain dam se khisht-o-sang

ae hathi bhi utar gar koh se

hosake ga phir na kuchh amboh se

hogaya barah sadd-e-rah gar

lewenge jakar nafar rah-e-digar

ho agar jamosh dashti se masaf

to koi dam hi ko hai maidan-e-saf

kargadan akar agar hoga taraf

tu ulat dewega koi saf ki saf

munh charhenge us ke mardum kam bahut

ik taraf ho jawega alam bahut

hogai gar khirs se istadagi

darmiyan ajaegi uftadagi

munh agar gurg-e-baghal zan agya

dekhiyo pith ik jahan dikhla gaya

yoz-o-gurg-o-sher agar ajaenge

baddilon ki fauj ko kha jaenge

mast hathi hogae chehra agar

munh chhupa lenge sipahi beshtar

samne hoga agar mar-e-siyah

samne us ke na howe gi sipah

garm kin azhdar koi gar agya

kha gaya chat kar gaya jita gaya

log rakho algharaz sahab-e-jigar

pahunchen sar par muddai ke beshtar

jadwal un ki tegh ki jari rahe

un ki tardasti se wo ari rahe

sath raja ke gaya jam-e-ghafir

ham saghir-o-ham jawan-o-ham kabir

raoraja sath jab sare gae

kuchh na bole sharm ke mare gae

manzilen tai hoke ae dasht-o-dar

utre wan ja log lashkar sarbasar

bharki atish ishq ki jangal jale

dun laga wo tair-o-azhdar chale

ag phaili in banon mein dur tak

jal gae haiwan kai langur tak

mar-o-azhdar azhdahe bhalse gae

sher-o-gurg-o-kargadan jhulse gae

jal gaya taus bhi is ag mein

ji gae bahutere dil ki lag mein

mor ka murda gaya raja ke pas

aur jhulse bhalse tair be hawas

phir pari jo ag sab lashkar jala

aur raja ka bhi udhar ghar jala

yaani rani ne suni jo ye khabar

atish-e-gham se jala us ka jigar

khinch ah-e-sard ye kahne lagi

ishq ki bhi ag kya bahne lagi

ban jala kar bastiyon mein alagi

phail kar yan dil jigar ko jalagi

jama kar khashak-o-khar-o-khas shitab

jal gai de ag wo bhi bas shitab

kya lagi thi dil ko rani jal gai

khak hokar khak hi mein rul gai

ishq hi ki hain ye taza kariyan

ishq ne parde mein janen mariyan

mor ke badle jalaya dasht-e-mar

mar-o-azhdar jal gae chanden hazar

jal ke lashkar hogaya tha be charagh

ye khabar sun hogaya raja bhi dagh

ishq se kya mir itni guft-o-go

khak ura di ishq ne har char su

darmiyan ne koh ne amboh hai

rani ka raja ka ab andoh hai

tair-o-taus-o-haiwan azhdahe

sab khape kya ishq ki koi kahe

ye fasana rah gaya alam ke bich

bazmanda un ke hain sab gham ke bich