موسم گل میں جو گھر گھر کے گھٹائیں آئیں

موسم گل میں جو گھر گھر کے گھٹائیں آئیں

ہوش اڑ جاتے ہیں جن سے وہ ہوائیں آئیں

چل بسے سوئے عدم تم نے بلایا جن کو

یاد آئی تو غریبوں کی قضائیں آئیں

روح تازی ہوئی تربت میں وہ ٹھنڈی ٹھنڈی

باغ فردوس کی ہر سو سے ہوائیں آئیں

میں وہ دیوانہ تھا جس کے لیے بزم غم میں

جا بجا بچھنے کو پریوں کی ردائیں آئیں

منکر ظلم جو جلاد ہوئے محشر میں

خود گواہی کے لیے سب کی جفائیں آئیں

مجرموں ہی کو نہیں ظلم کا فرمان آیا

بے گناہوں کو بھی لکھ لکھ کے سزائیں آئیں

اس کا دیوانہ ہوں سمجھاتی ہیں پریاں مجھ کو

سر پھرانے کو کہاں سے یہ بلائیں آئیں

ترے بندے ہوے کی جن سے لگاوٹ تو نے

اے پری رو تجھے کیوں کر یہ ادائیں آئیں

حشر موقوف کیا جوش میں رحمت آئی

زار نالے کی جو ہر سو سے صدائیں آئیں

لشکر گل جو گلستاں میں خزاں پر امڈا

ساتھ دینے کو پہاڑوں سے گھٹائیں آئیں

میری تربت پہ کبھی دھوپ نہ آنے پائے

شام تک صبح سے گھر گھر کے گھٹائیں آئیں

منہ چھپانے لگے معشوق جواں ہو ہو کر

نیک و بد کی سمجھ آئی تو حیائیں آئیں

خاک اڑانے جو صبا آئی مری تربت پر

سر پٹکتی ہوئی رونے کو گھٹائیں آئیں

بخش دی اس نے مرے بعد جو پوشاک مری

قیس و فرہاد کے حصوں میں قبائیں آئیں

راحتیں سمجھے حسینوں نے جو ایذائیں دیں

پیار آیا تو پسند ان کی جفائیں آئیں

آ گیا رحم اسے دیں سب کی مرادیں اس نے

عاجزوں کی جو سفارش کو دعائیں آئیں

میرے صحرا کی زیارت کو ہزاروں پریاں

روز لے لے کے سلیمان کو رضائیں آئیں

اے شرفؔ حسن پرستوں کو بلا کے لوٹا

ان حسینوں کے دلوں میں جو دغائیں آئیں

mausam-e-gul mein jo ghar ghar ke ghataen aen

hosh ur jate hain jin se wo hawaen aen

chal base su-e-adam tum ne bulaya jin ko

yad ai to gharibon ki qazaen aen

ruh tazi hui turbat mein wo thandi thandi

bagh firdaus ki har su se hawaen aen

main wo diwana tha jis ke liye bazm-e-gham mein

ja baja bichhne ko pariyon ki ridaen aen

munkir-e-zulm jo jallad hue mahshar mein

khud gawahi ke liye sab ki jafaen aen

mujrimon hi ko nahin zulm ka farman aya

be gunahon ko bhi likh likh ke sazaen aen

us ka diwana hun samjhati hain pariyan mujh ko

sar pharane ko kahan se ye balaen aen

tire bande hue ki jin se lagawat tu ne

ai pari ru tujhe kyun kar ye adaen aen

hashr mauquf kiya josh mein rahmat ai

zar nale ki jo har su se sadaen aen

lashkar-e-gul jo gulistan mein khizan par umda

sath dene ko paharon se ghataen aen

meri turbat pe kabhi dhup na ane pae

sham tak subh se ghar ghar ke ghataen aen

munh chhupane lage maashuq jawan ho ho kar

nek-o-bad ki samajh ai to hayaen aen

khak urane jo saba ai miri turbat par

sar patakti hui rone ko ghataen aen

bakhsh di us ne mire baad jo poshak miri

qais-o-farhad ke hisson mein qabaen aen

rahaten samjhe hasinon ne jo izaen den

pyar aya to pasand un ki jafaen aen

a gaya rahm use den sab ki muraden us ne

ajizon ki jo sifarish ko duaen aen

mere sahra ki ziyarat ko hazaron pariyan

roz le le ke sulaiman ko razaen aen

ai sharaf husn paraston ko bala ke lauta

un hasinon ke dilon mein jo daghaen aen