Arooz is now on the App Store, for iPhone and iPad. Download →

All poetry

مژگاں ہیں غضب ابروے خم دار کے آگے

Hafeez Jaunpuri (1868–1959)

مژگاں ہیں غضب ابروے خم دار کے آگے

یہ تیر برس پڑتے ہیں تلوار کے آگے

خیر اس میں ہے واعظ کہ کبھی مے کی مذمت

کرنا نہ کسی رند خوش اطوار کے آگے

کہنا مری بالیں پہ کہ آثار برے ہیں

کرتا ہے یہ باتیں کوئی بیمار کے آگے

شکوے تھے بہت ان سے شکایت تھی بہت کچھ

سب بھول گئے وصل کی شب پیار کے آگے

خلوت میں جو پوچھو تو کہوں دل کی حقیقت

مجھ سے نہ مرا حال سنو چار کے آگے

آئینہ ابھی دیکھ کے خودبیں تو وہ ہو لیں

خود آئیں گے پھر طالب دیدار کے آگے

قاروں کا خزانہ ہو کہ حاتم کی سخاوت

سب کچھ ہے مگر کچھ نہیں مے خوار کے آگے

کیا مجھ کو ڈرائیں گی تری تیز نگاہیں

یہ آنکھ جھپکتی نہیں تلوار کے آگے

ہشیار سے ہشیار ہیں ہشیار کے آگے