موسم گل میں ہیں دیوانوں کے بازار کئی

موسم گل میں ہیں دیوانوں کے بازار کئی

شور بلبل کئی زنجیر کی جھنکار کئی

سب گئی بوئے مروت کی کل اس باغ سے حیف

بارے دامن کش دل رہ گئے ہیں خار کئی

کب لگ احباب کا غم مجھ کو دکھاوے گا فلک

خاک ہو گئے بہت اور ہیں سو چلن ہار کئی

اے سیہ چشمو نہیں کچھ مجھے گل زار سے کام

داغ لالہ ہی سے رکھتا ہوں سروکار کئی

سخت یاروں کی کدورت سے ہوا ہوں بے دل

کھا گئے آئینۂ دل مرا زنگار کئی

موسم گل میں مرے چاک گریباں کو دیکھ

پھاڑ گئے پیرہن صبر رفو کار کئی

دن پڑے شعلہ رخوں بن مجھے جوں دود چراغ

میری دل سوزی سے جلتے ہیں شب تار کئی

جلدی اول کی ہے پر آبلہ پاؤں میں مرے

اور وہ گل رو کی رہے راہ میں اب خار کئی

سرد مہری تری خوں گرم ہے از بس مجھ سات

ہیں رگ لعل جگر نالۂ خوں بار کئی

mausam-e-gul mein hain diwanon ke bazar kai

shor-e-bulbul kai zanjir ki jhankar kai

sab gai bu-e-murawwat ki kal is bagh se haif

bare daman kash-e-dil rah gae hain khar kai

kab lag ahbab ka gham mujh ko dikhawega falak

khak ho gae bahut aur hain so chalan har kai

ai siyah chashmo nahin kuchh mujhe gul zar se kam

dagh-e-lala hi se rakhta hun sarokar kai

sakht yaron ki kudurat se hua hun be dil

kha gae aina-e-dil mira zangar kai

mausam-e-gul mein mire chak-e-gareban ko dekh

phar gae pairahan sabr rafu kar kai

din pare shola rukhon ban mujhe jun dud-e-charagh

meri dil sozi se jalte hain shab-e-tar kai

jaldi awwal ki hai par abla paon mein mire

aur wo gul ru ki rahe rah mein ab khar kai

sard mehri tiri khun garm hai az bas mujh sat

hain rag-e-laal-e-jigar nala-e-khun bar kai