Arooz is now on the App Store, for iPhone and iPad. Download →

All poetry

مرثیۂ سر سید ردیف ی

خوشی محمد ناظر

عرش کے نوری زمیں کے فرش پر آنے کو ہیں

اور اک خاکی کو سیر خلد دکھلانے کو ہیں

باغ جنت کو سدھارا سید عالی مقام

راہ میں اس کی ملائک نور برسانے کو ہیں

وائے حسرت چل دیا دنیا سے وہ محبوب قوم

اور جو باقی ہیں اس کے ہجر میں جانے کو ہیں

ساقیٔ مرحوم تیرے بادہ خواروں کے لیے

خون دل پینے کو اور لخت جگر کھانے کو ہیں

گلشن ملت میں غنچوں نے ابھی کھولی تھی آنکھ

ایک جھونکے سے خزاں کے اب وہ مرجھانے کو ہیں

چھپ گیا وہ روئے رخشاں مہر عالم تاب کا

اب شب یلدا کی ہر سو ظلمتیں چھانے کو ہیں

اے شاہ بے تاج وہ ماتم کی تیرے دھوم ہے

تاج داروں کے علم اس غم سے جھک جانے کو ہیں

دشت میں دوں لگ رہی ہے قیس کے ماتم میں آج

آہوان نجد کی آنکھوں میں اشک آنے کو ہیں

ایک سینے میں تھی سید کے تڑپ اسلام کی

ہم مسلماں سب برائے نام کہلانے کو ہیں

کاروان قوم کا ہنگامہ تیرے دم سے تھا

یہ نہ تھا معلوم حضرت کوچ فرمانے کو ہیں

بوسہ گاہ قوم ہوگا تیرے سنگ آستاں

نقش پا پر تیرے لاکھوں قافلے آنے کو ہیں

ہر زماں ایں رہ گزر را کاروان دیگر است

کشتگان‌ عشق را ہر لخت جان دیگر است

ہائے وہ خورشید انور چہرۂ تاباں ترا

ہائے وہ ماہ منور عارض رخشاں ترا

وہ نگاہیں جاں فزا اور وہ ادائیں دل ربا

وہ جبین دل کشا وہ دل فروز عنواں ترا

ہائے اس ریش مبارک پر وہ بارش نور کی

شام پیری میں بیاض صبح نور افشاں ترا

ہائے وہ جان بصیرت تیرا نورانی دماغ

ہائے وہ کان محبت سینۂ سوزاں ترا

وہ تری شان جلالی وہ ترا رعب‌ جمال

پڑ گئی جس پر نظر تھا بندۂ فرماں ترا

مہدی و مشتاق ہمدم شبلی و حالی ندیم

اور زین العابدیں خاصائی خاصاں ترا

بام و در کالج کے ہیں ماتم میں تیرے سر نگوں

مرثیہ خواں بن گیا ہر کاخ و ہر ایواں ترا

دل سے خشت و سنگ کے کالج میں اٹھتی ہے صدا

کیا ہوا میر عمارت خانۂ ویراں ترا

تا جہاں میں ہے ترے نانا کی امت کو بقا

قوم میں ماتم رہے گا سید احمد خاں ترا

بندہ پرور وقت رخصت یاد فرمایا نہ کیوں

ناظر مہجور تھا وابستۂ داماں ترا

اے چمن پیرائے ملت تیرے شوق دید میں

تھا نواسنج فغاں یہ بلبل بستاں ترا

سر بہ صحرا اب رہیں گے آہ دیوانے تیرے

شمع تربت کا کریں گے طوف پروانے ترے

ہائے بزم قوم میں اب جلوہ فرمائے گا کون

ماہ کے مانند ہالے میں نظر آئے گا کون

اے مسیحا قوم کے تجھ بن عظام خستہ کو

قم بہ اذنی کہہ کے اب جنبش میں پھر لائے گا کون

دیکھ کر چتون تری اٹھتے تھے دل میں ولولے

اس نگاہ گرم سے اب دل کو گرمائے گا کون

تھا ترا روئے منور ایک نجم رہنما

اب وہ نورانی فضا ظلمت میں دکھلائے گا کون

اس شعاع روح پرور سے پھر اے ماہ منیر

دل کے دریا میں وہ رقص موج دکھلائے گا کون

خانہ جنگی ہر طرف ہے معاشر اسلام میں

ہائے تجھ بن ان کے یہ الجھاؤ سلجھائے گا کون

دار و گیر دہر مثل عرصۂ شطرنج ہے

یار شاطر بن کے اس کی چال بتلائے گا کون

جھگیوں کا روپ بھر کر قوم کی اسٹیج پر

ما نمی خواہیم ننگ و نام را گائے گا کون

روٹھ کر جاتا ہے سید آؤ لیں اس کو منا

ورنہ اتنی مشکلیں آسان فرمائے گا کون

دفن کرنا صحن میں کالج کے سر سید کی لاش

اس خلیل اللہ سے کعبہ کو چھڑوائے گا کون

یوں تو لاکھوں آئیں گے اس نجد میں اور جائیں گے

سید احمد سا جنوں ساماں مگر آئے گا کون

اے حریفاں آں قدح بہ شکست و آں ساقی نماند

جرعۂ جز اشک خوں در جام ما باقی نماند

سید مرحوم امت کا بھلا کرتا رہا

فکر ملت روز و شب صبح و مسا کرتا رہا

جو فلاح قوم کی آئی سمجھ میں اس کی بات

برملا کہتا رہا اور برملا کرتا رہا

تھی اسے پرواہ تحسیں اور نہ کچھ نفریں کا ڈر

اس کو جو کرنا تھا بے رو و ریا کرتا رہا

ناسزا سنتا رہا اور مرحبا کہتا رہا

کفر کے فتووں میں کام اسلام کا کرتا رہا

گر ہوئے ناکامیوں سے حوصلے یاروں کے پست

ہمت عالی کا اپنی اقتضا کرتا رہا

قوم میں پھر تازہ ذوق بت پرستی دیکھ کر

اک نیا کعبہ علی گڑھ میں بنا کرتا رہا

اے کہ کالج کے یہ قصر و خاک و ایواں دیکھیے

کام جو شاہوں کا تھا سو یہ گدا کرتا رہا

اس نے کی اسلام اور اوہام باطل میں تمیز

زنگ سے آئینۂ دیں کی جلا کرتا رہا

کفر کے حملوں میں تھا اسلام کی دائم سپر

عالم امت یہ کار انبیا کرتا رہا

شاہد اردو کی زلفوں کے نکالے پیچ و خم

حسن کے غمزوں کو فطرت آشنا کرتا رہا

یہ چلی تھی امت مرحوم سیل غدر میں

موت کے طوفاں میں کار ناخدا کرتا رہا

زندگی سید کی تھی قلب تپاں کی زندگی

تھی جہاں کی زندگی جان جہاں کی زندگی

چھپ گیا وہ مہر تاباں بزم دوراں چھوڑ کر

فصل گل میں وہ چلا بزم گلستاں چھوڑ کر

شاخ سارے آرزو کے گل بہ داماں چھوڑ کر

نالۂ دل دوز صحن بوستاں میں سر کیا

بلبلان زار نے درس گلستاں چھوڑ کر

آ لیا سیل فنا نے کارواں سالار کو

قافلہ کو دشت حرماں میں پریشاں چھوڑ کر

پیر کنعاں کی جدائی سے جگر ہے پاش پاش

گو چلا ہے مصر میں وہ ماہ کنعاں چھوڑ کر

سو گیا کنج لحد میں شاہ بے تاج و سریر

باغ و راغ و بارگاہ و قصر و ایواں چھوڑ کر

فیض سے تیرے رہی وابستہ حاصل کی امید

تشنہ لب کہتی نہ جائے ابر نیساں چھوڑ کر

یہ تو بتلا دے کہ ہے کس کا سہارا قوم کو

کعبۂ دل قبلۂ جاں تیرا داماں چھوڑ کر

کون ہوگا مرد میداں اب مصاف دہر کا

ہاتھ میں کس کے چلا ہے گو وہ چوگاں چھوڑ کر

بندہ پرور یہ جنون عشق کے شایاں نہ تھا

سیر گلزار ارم خار مغیلاں چھوڑ کر

گاہے گاہے قوم کی حالت پہ بھی کرنا نظر

سیر جنت چھوڑ کر گل گشت رضواں چھوڑ کر

اس چمن میں روح منڈلاتی رہے گی آپ کی

جائے گی بلبل کہاں بزم گلستاں چھوڑ کر

دار فانی کی ہے ناظرؔ گرچہ فانی زندگی

کشتگان‌ عشق کی ہے جاودانی زندگی