مرحلہ دل کا نہ تسخیر ہوا

مرحلہ دل کا نہ تسخیر ہوا

تو کہاں آ کے عناں گیر ہوا

کام دنیا کا ہے تیر اندازی

ہم ہوئے یا کوئی نخچیر ہوا

سنگ بنیادی ہیں ہم اس گھر کا

جو کسی طرح نہ تعمیر ہوا

سفر شوق کا حاصل معلوم

راستہ پاؤں کی زنجیر ہوا

عمر بھر جس کی شکایت کی ہے

دل اسی آگ سے اکسیر ہوا

کس سے پوچھیں کہ وہ انداز نظر

کب تبسم ہوا کب تیر ہوا

کون اب داد سخن دے باقیؔ

جس نے دو شعر کہے میرؔ ہوا

marhala dil ka na taskhir hua

tu kahan a ke inan gir hua

kam duniya ka hai tir andazi

ham hue ya koi nakhchir hua

sang buniyadi hain ham is ghar ka

jo kisi tarah na taamir hua

safar-e-shauq ka hasil maalum

rasta paon ki zanjir hua

umr bhar jis ki shikayat ki hai

dil isi ag se iksir hua

kis se puchhen ke wo andaz-e-nazar

kab tabassum hua kab tir hua

kaun ab dad-e-sukhan de baqi

jis ne do sher kahe mir hua