مرتے مرتے یہ ہم نے کام کیا

مرتے مرتے یہ ہم نے کام کیا

جان دے کر وفا کا نام کیا

شیخ صنعا بنا ہے عشق میں دل

بت کو سجدہ کیا سلام کیا

زلف پر پیچ کھول کر رخ پر

ایک جا لطف صبح و شام کیا

تم نے مجنوں کہا تو عاشق نے

دشت پر خار میں قیام کیا

محو حیرت بنا دیا مجھ کو

تم نے کس لطف سے کلام کیا

چل کے گلشن میں دیکھ لے کیسا

موسم گل نے اہتمام کیا

مبتلا خود نثار ہو جاتے

تم نے افسوس قتل عام کیا

اپنے بندوں کے واسطے اس نے

واہ کیا کچھ نہ انتظام کیا

ساری خلقت ہوئی تماشائی

تم نے جب بام پر قیام کیا

کوئے جاناں ہے مجھ کو خلد بریں

میں نے اپنا یہیں مقام کیا

کھینچ لایا جمیلہؔ آخر کار

جذب صادق نے خوب کام کیا

marte marte ye ham ne kam kiya

jan de kar wafa ka nam kiya

shaikh sana bana hai ishq mein dil

but ko sajda kiya salam kiya

zulf pur pech khol kar rukh par

ek ja lutf-e-subh-o-sham kiya

tum ne majnun kaha to ashiq ne

dasht pur khar mein qayam kiya

mahw-e-hairat bana diya mujh ko

tum ne kis lutf se kalam kiya

chal ke gulshan mein dekh le kaisa

mausam-e-gul ne ehtimam kiya

mubtala khud nisar ho jate

tum ne afsos qatl-e-am kiya

apne bandon ke waste us ne

wah kya kuchh na intizam kiya

sari khilqat hui tamashai

tum ne jab bam par qayam kiya

ku-e-janan hai mujh ko khuld-e-barin

main ne apna yahin maqam kiya

khinch laya jamilahu akhir kar

jazb-e-sadiq ne khub kam kiya