مشہور ہیں دنوں کی مرے بے قراریاں

مشہور ہیں دنوں کی مرے بے قراریاں

جاتی ہیں لا مکاں کو دل شب کی زاریاں

چہرے پہ جیسے زخم ہے ناخن کا ہر خراش

اب دیدنی ہوئی ہیں مری دستکاریاں

سو بار ہم نے گل کے گئے پر چمن کے بیچ

بھر دی ہیں آب چشم سے راتوں کو کیاریاں

کشتے کی اس کے خاک بھرے جسم زار پر

خالی نہیں ہیں لطف سے لوہو کی دھاریاں

تربت سے عاشقوں کے نہ اٹھا کبھو غبار

جی سے گئے ولے نہ گئیں راز داریاں

اب کس کس اپنی خواہش مردہ کو روئیے

تھیں ہم کو اس سے سینکڑوں امیدواریاں

پڑھتے پھریں گے گلیوں میں ان ریختوں کو لوگ

مدت رہیں گی یاد یہ باتیں ہماریاں

کیا جانتے تھے ایسے دن آ جائیں گے شتاب

روتے گذرتیاں ہیں ہمیں راتیں ساریاں

گل نے ہزار رنگ سخن سر کیا ولے

دل سے گئیں نہ باتیں تری پیاری پیاریاں

جاؤ گے بھول عہد کو فرہاد و قیس کے

گر پہنچیں ہم شکستہ دلوں کی بھی باریاں

بچ جاتا ایک رات جو کٹ جاتی اور میرؔ

کاٹیں تھیں کوہ کن نے بہت راتیں بھاریاں

mashhur hain dinon ki mire be qarariyan

jati hain la makan ko dil-e-shab ki zariyan

chehre pe jaise zakhm hai nakhun ka har kharash

ab didani hui hain miri dastakariyan

sau bar ham ne gul ke gae par chaman ke bich

bhar di hain ab-e-chashm se raton ko kiyariyan

kushte ki us ke khak bhare jism-e-zar par

khali nahin hain lutf se lohu ki dhariyan

turbat se ashiqon ke na utha kabhu ghubar

ji se gae wale na gain raz dariyan

ab kis kis apni khwahish-e-murda ko roiye

thin ham ko us se sainkron umidwariyan

parhte phirenge galiyon mein in rekhton ko log

muddat rahengi yad ye baten hamariyan

kya jante the aise din a jaenge shitab

rote gazratyan hain hamen raten sariyan

gul ne hazar rang-e-sukhan sar kiya wale

dil se gain na baten tiri pyari pyariyan

jaoge bhul ahd ko farhad-o-qais ke

gar pahunchen ham shikasta dilon ki bhi bariyan

bach jata ek rat jo kat jati aur mir

katen thin koh kin ne bahut raten bhariyan